ପାଟଣା/ଢେଙ୍କିକୋଟ,୨୦।୯(ସ୍ବ.ପ୍ର./ଡି.ଏନ.ଏ.)-କେନ୍ଦୁଝର ଜିଲା ପାଟଣା ବ୍ଲକ ତୁରୁମୁଙ୍ଗା ଦେଇ ଯାଇଥିବା ୪୯ ନମ୍ବର ଜାତୀୟ ରାଜପଥର ଏକ କମ୍ପାନୀ ଶୋ’ ରୁମ ନିକଟରୁ ଶୁକ୍ରବାର ଅପରାହ୍ନରେ ଜଣେ ବ୍ୟକ୍ତିଙ୍କ ବାଇକ ଡିକି ଭାଙ୍ଗି ଦେଢ଼ଲକ୍ଷ ଟଙ୍କା ଲୁଟ ହୋଇଛି। ଏ ନେଇ ତୁରୁମୁଙ୍ଗା ଥାନାରେ ଅଭିଯୋଗ ହେବା ପରେ ପୋଲିସ ତନାଘନା ଆରମ୍ଭ କରିଛି।
ପୋଲିସ ସୂଚନା ଅନୁଯାୟୀ ତୁରୁମୁଙ୍ଗା ଥାନା ଅନ୍ତର୍ଗତ ରାଜନଗର ଗ୍ରାମର ପ୍ରଭାତ ରଣା ଗୃହ ନିର୍ମାଣ କାର୍ଯ୍ୟ ପାଇଁ ତାଙ୍କ ମା’ଙ୍କ ପେନସନ ଟଙ୍କାରୁ ଋଣକରି ତୁରୁମୁଙ୍ଗା ସ୍ଥିତ ବ୍ୟାଙ୍କ ଅଫ ଇଣ୍ଡିଆରୁ ଶୁକ୍ରବାର ଅପରାହ୍ନ ସମୟରେ ଏହି ଟଙ୍କା ଉଠାଇଥିଲେ। ସେ ଏହି ଟଙ୍କା ନିଜ ବାଇକ୍ରେ ରଖି ଏକ ମାଂସ ଦୋକାନ ସମ୍ମୁଖରେ କିଛି ସମୟ ଅଟକିଥିଲେ। ସେଠାରେ ସେ ମାଂସ କିଣୁଥିବା ବେଳ କେହି ଦୁର୍ବୁତ୍ତ ତାଙ୍କ ବାଇକ ଡିକି ଭାଙ୍ଗି ଦେଢ଼ ଲକ୍ଷ ଟଙ୍କା ସହ ବ୍ୟାଙ୍କ ପାସ ବହି , ୪ ଟି ଏଟିଏମ କାର୍ଡ, ଗୋଟାଏ ପାନ କାର୍ଡ ଓ ଗୋଟାଏ ପୋଷ୍ଟାଲର ପିଏଲ ବହି ଲୁଟି ନେଇଥିବା ତୁରୁମୁଙ୍ଗା ଥାନାରେ ଅଭିଯୋଗ ହୋଇଛି। ଥାନାଧିକାରୀ ଅମିତାଭ ଦାଶ ଘଟଣାର ତଦନ୍ତ ଆରମ୍ଭ କରିଥିବା ସୂଚନା ଦେଇଛନ୍ତି।
