ଓଡ଼ଗଁ।,୩୦ା୬(ସ୍ବ.ପ୍ର.): ସମ୍ପ୍ରତି ସମସ୍ତ ସ୍କୁଲରେ ମଧ୍ୟାହ୍ନ ଭୋଜନ ପ୍ରଚଳନ ଥିବା ବେଳେ ପିଲାମାନେ ବଳକା ଖାଦ୍ୟକୁ ନେଇ ଏଣେତେଣେ ଫିଙ୍ଗିବା ନିତିଦିନିଆ ଘଟଣା ହୋଇଛି। ଏହି ବଳକା ମଧ୍ୟାହ୍ନ ଭୋଜନ ଜରିଆରେ ଜୀବେଦୟା କାର୍ଯ୍ୟକ୍ରମ ଗଛସାର୍ଙ୍କ ଏକ ନିଆରା ଉଦ୍ୟମ। ନୟାଗଡ଼ ଜିଲା କଣ୍ଟିଲୋର ଅନ୍ତର୍ଯାମୀ ସାହୁ ଜଣେ ଅବସରପ୍ରାପ୍ତ ଶିକ୍ଷକ ହୋଇଥିବା ବେଳେ ଜିଲା ତଥା ରାଜ୍ୟରେ ଗଛ ସାର ଭାବେ ବେଶ ପରିଚିତ। ସେ ତାଙ୍କର ଏହି କାର୍ଯ୍ୟକ୍ରମକୁ ବିଭିନ୍ନ ସ୍କୁଲ ବୁଲି ପିଲାଙ୍କ ମଧ୍ୟରେ ସଚେତନତାର ବାର୍ତ୍ତା ପ୍ରଚାର କରୁଥିବା ଦେଖିବାକୁ ମିଳିଛି।
ଗଛ ସାର୍ଙ୍କୁ ପରିବେଶ ଚିନ୍ତା। ସେ ଜୀବନ କାଳ ଭିତରେ ଅଗଣତି ଗଛ ରୋପଣ କରିବା ପରେ ବର୍ତ୍ତମାନ ଜୀବେ ଦୟା ତଥା ଜୈବିକ ବିବିଧତା ନିମନ୍ତେ ଅଭିନବ ଉପାୟରେ ଏକ ଅଭିଯାନ ଆରମ୍ଭ କରିଛନ୍ତି। ସେ କୁରାଳ, ବାହାଡ଼ାଝୋଲା ଅଞ୍ଚଳରେ ବିଭିନ୍ନ ସ୍କୁଲକୁ ଯାଇ ବଳକା ମଧ୍ୟାହ୍ନ ଭୋଜନର ସଦୁପଯୋଗ କରିବା ଦ୍ୱାରା କିପରି ପରିବେଶ ସୁରକ୍ଷା ଓ ଜୀବେ ଦୟା ହୋଇପାରିବ ସେ ସମ୍ପର୍କରେ ପିଲାଙ୍କୁ ସଚେତନ କରୁଛନ୍ତି। ଏଥିନିମନ୍ତେ ସେ ସ୍କୁଲ ପ୍ରଧାନ ଶିକ୍ଷକ ତଥା ପରିଚାଳନା କମିଟି ସଦସ୍ୟଙ୍କୁ ସ୍କୁଲର ଏକ କୋଣରେ ଗୋଟିଏ ସିମେଣ୍ଟ ପିଣ୍ଡି ଏବଂ ତତ୍ ସଂଲଗ୍ନ ସ୍ଥାନରେ ଏକ ପାଣି ପାତ୍ର ନିର୍ମାଣ କରିବାକୁ ପରାମର୍ଶ ଦେଇଛନ୍ତି। ପିଲାମାନେ କିମ୍ବା ପାଚିକା ମଧ୍ୟାହ୍ନ ଭୋଜନରୁ ବଳକା ଖାଦ୍ୟ ଏଣେତେଣେ ନ ଫିଙ୍ଗି ନିର୍ଦ୍ଦିଷ୍ଟ ସିମେଣ୍ଟ ପିଣ୍ଡିରେ ପକାଇବେ। ଏହାକୁ କାଉ, କୁକୁର ତଥା ଅନ୍ୟ ପ୍ରାଣୀ ଖାଇବା ସହ ନିକଟରେ ଥିବା ପାଣି ପାତ୍ରରୁ ଜଳ ଗ୍ରହଣ କରିବେ। ଏହାଦ୍ୱାରା ସ୍କୁଲ ପରିବେଶ ସୁରକ୍ଷିତ ରହିବା ସହିତ ପିଲାଙ୍କ ମନରେ ଜୀବେ ଦୟା ଭଳି ସଚେତନତା ସୃଷ୍ଟି ହୋଇପାରୁଥିବା ସେ ପ୍ରକାଶ କରିଛନ୍ତି। ଏହିକ୍ରମରେ କୁରାଳ କ୍ଲଷ୍ଟର ଅନ୍ତର୍ଗତ ଗିରିଡିପଲ୍ଲୀ ଉଚ୍ଚ ପ୍ରାଥମିକ ବିଦ୍ୟାଳୟର ଇକୋ କ୍ଲବ ଏବଂ ନାଥିଆପଲ୍ଲୀ ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟର ଛାତ୍ରୀଛାତ୍ର ସେମାନଙ୍କ ସ୍କୁଲରେ ଏହିପରି ଦୁଇଟି ପିଣ୍ଡି ଓ ପାତ୍ର ନିର୍ମାଣ କରି ଉଦାହରଣ ସୃଷ୍ଟି କରିଛନ୍ତି। ଏହିପରି ସେ ସ୍ଥାନୀୟ ଅଞ୍ଚଳରେ ବିଭିନ୍ନ ସ୍କୁଲକୁ ସାଇକେଲରେ ଯାଇ ପ୍ରାୟ ଏକହଜାରରୁ ଊର୍ଦ୍ଧ୍ୱ ପିଲାଙ୍କୁ ସଚେତନତା ବାର୍ତ୍ତା ଦେଇଥିବା ପ୍ରକାଶ କରିଛନ୍ତି। ଏପରି କି ଲୋପ ପାଉଥିବା ଘରଚଟିଆ ସଂରକ୍ଷଣ ପାଇଁ ସେ ଲୋକଙ୍କୁ ଏହି ପକ୍ଷୀର ବସା ତିଆରି କରି ପ୍ରଦର୍ଶିତ କରୁଛନ୍ତି। ବଳକା ମଧ୍ୟାହ୍ନ ଭୋଜନର ସଦୁପଯୋଗ କରିବାକୁ ସେ ସରକାରୀ ସ୍ତରରେ ଆବଶ୍ୟକ ନିର୍ଦ୍ଦେଶନାମା ଜାରି କରିବାକୁ ଅନୁରୋଧ କରିଛନ୍ତି।
