ବଲାଙ୍ଗୀର ଅଫିସ, ୧୪ା୪: ବଲାଙ୍ଗୀର କଳିଙ୍ଗ ଇଷ୍ଟିଚ୍ୟୁଟ୍ ଅଫ୍ ସୋସିଆଲ ସାଇନ୍ସସେସ୍ (କିସ୍) କ୍ୟାମ୍ପସଠାରେ ମଙ୍ଗଳବାରଠାରୁ ୨ ଶହ ଶଯ୍ୟା ବିଶିଷ୍ଟ କୋଭିଡ୍ ହସ୍ପିଟାଲ କାର୍ଯ୍ୟକ୍ଷମ ହୋଇଛି । ଜିଲାପାଳ ଅରିନ୍ଦମ୍ ଡାକୁଆ ଏ ନେଇ ମଙ୍ଗଳବାର ସୂଚନା ଦେଇଛନ୍ତି । ଜିଲାର ୫ଟି ସହରାଞ୍ଚଳରେ ୩୩୦୦ରୁ ଉର୍ଦ୍ଧ୍ୱ ଶଯ୍ୟା ବିଶିଷ୍ଟ ଆଇସୋଲେଶନ୍ ସେଣ୍ଟର କରାଯାଇଛି । ସେହିପରି ଜିଲାର ୩୧୭ ପଞ୍ଚାୟତରେ ୧୩ହଜାରରୁ ଉର୍ଦ୍ଧ୍ୱ ଶଯ୍ୟା ବିଶିଷ୍ଟ ସଙ୍ଗରୋଧ କେନ୍ଦ୍ର ବ୍ୟବସ୍ଥା ସରିଥିବା ଜିଲାପାଳ ଡାକୁଆ ସୂଚନା ଦେଇଛନ୍ତି ।
ଜିଲାରେ କରୋନା ମୁକାବିଲା ପାଇଁ କୋଭିଡ୍ ହସ୍ପିଟାଲ, କରୋନା ହେଲ୍ଥ ସେଣ୍ଟର ଏବଂ କରୋନା କେୟାର ସେଣ୍ଟର ଏଭଳି ତିନୋଟି ପର୍ଯ୍ୟାୟ ଚିକିତ୍ସା ବ୍ୟବସ୍ଥା କରାଯାଇଛି । କିସ୍ କ୍ୟାମ୍ପସରେ କାର୍ଯ୍ୟକ୍ଷମ ହୋଇଥିବା କୋଭିଡ୍ ହସ୍ପିଟାଲରେ କୋଭିଡ୍ ପଜିଟିଭ ରୋଗୀଙ୍କୁ ଚିକିତ୍ସା କରାଯିବ। ସେଠାରେ ୩ଜଣ ଡାକ୍ତର, ପାରା ମେଡିକାଲ ଷ୍ଟାଫ୍, ସୁରକ୍ଷା ଗାର୍ଡ ବ୍ୟବସ୍ଥା କରାଯାଇଛି । ବଲାଙ୍ଗୀର ପଲିଟେକ୍ନିକ୍ଠାରେ ୧୦୦ ଶଯ୍ୟା ବିଶିଷ୍ଟ କରୋନା ହେଲ୍ଥ ସେଣ୍ଟର ବ୍ୟବସ୍ଥା ରହିଛି । ଏଠାରେ ମଧ୍ୟମ ଲକ୍ଷଣ ଥିବା ରୋଗୀଙ୍କୁ ରଖାଯାଇ ଚିକିତ୍ସା କରାଯିବ । ଏଠାରେ ଅକ୍ସିଜେନ୍ ଏବଂ ଆମ୍ବୁଲାନ୍ସ ସେବା ଉପଲବ୍ଧ ହେବ। ଏଠାରେ ଏଲୋପାଥିକ୍ ଡାକ୍ତର ନିୟୋଜିତ ରହିବେ । କରୋନା କେୟାର ସେଣ୍ଟରରେ ସାଧାରଣ ଲକ୍ଷଣ ଥିବା ରୋଗୀଙ୍କୁ ରଖି ଚିକିତ୍ସା କରାଯିବ । ସେଠାରେ ଆୟୁଷ ଡାକ୍ତର ନିୟୋଜିତ ରହିବେ ବୋଲି ସୂଚନା ଦେଇଛନ୍ତି । ଆଜି ପର୍ଯ୍ୟନ୍ତ ବଲାଙ୍ଗୀର ଜିଲାର ୩୨୪ ଜଣଙ୍କ ସ୍ବାବ୍ ପରୀକ୍ଷା ପାଇଁ ଭୁବନେଶ୍ୱର ପଠାଯାଇଛି । ସେଥିରୁ ୯୦ଟି ପରୀକ୍ଷାର ନେଗେଟିଭ ରିପୋର୍ଟ ଆସିଛି। କିସ୍ କ୍ୟାମ୍ପସ୍ ଠାରେ ଅନ୍ୟମାନଙ୍କ ସହ ଅତିରିକ୍ତ ଜିଲାପାଳ ଅନନ୍ତ ନାରାୟଣ ସିଂ ଲାଗୁରୀ, ସିଡିଏମ୍ଓ ଡା. ନାରାୟଣ ଥନାପତି, କୋଭିଡ୍ ହସ୍ପିଟାଲ ଇନଚାର୍ଜ ଡା. ଅବିନାଶ ନାୟକ, ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ଜୟଦେବ ପାଣିଗ୍ରାହୀ ଉପସ୍ଥିତ ଥିଲେ । ବଲାଙ୍ଗୀରରେ କୋଭିଡ୍ ହସ୍ପିିଟାଲ ଖୋଲାଯିବାକୁ ଗତ ୩ ତାରିଖ ଭୁବନେଶ୍ୱର କଳିଙ୍ଗ ଇଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ, ବଲାଙ୍ଗୀର ଜିଲା ପ୍ରଶାସନ ଓ ଓଡିଶା ଖଣି ନିଗମ ମଧ୍ୟରେ ତ୍ରିପାକ୍ଷିକ ରାଜିନାମା ସ୍ବାକ୍ଷାରିତ ହୋଇଥିଲା ।
