ହିଞ୍ଜିଳିକାଟୁ,୯ା୩(ଡି.ଏଡ଼୍.ଏ.) ହିଞ୍ଜିଳିକାଟୁ ମ୍ୟୁନିସିପାଲିଟି ସମେତ ବ୍ଲକର ବିଭିନ୍ନ ସ୍ଥାନରେ ରବିବାର ଅପରାହ୍ନ ପ୍ରାୟ ୫ରେ କାଳବୈଶାୀଖୀ ସହ ବର୍ଷାପବନ ହୋଇଛି। ଫଳରେ ବ୍ୟାପକ ଫସଲ ସହ ପାନ ବରଜ ନଷ୍ଟ ହୋଇଛି। ପ୍ରାୟ ୨୦ ମିନିଟ ଧରି ପ୍ରବଳ ପବନ ସାଙ୍ଗକୁ ବର୍ଷା ହୋଇଥିଲା। ବୁରୁପୋଡ଼ା, ଖଣ୍ଡରା, ଚାନ୍ଦୁଲି, ଆଙ୍କୋରଡ଼ା, ହିଞ୍ଜିଳି, ଖରିଡ଼ା, ଶିକିରି, ରାଳବ, ଆଲପୁର, ନନ୍ଦିକ, ପୁଟିଆପଦର,ଶାସନ ଆମ୍ବଗାଁ, ବାଳକୃଷ୍ଣପୁର ପ୍ରଭୃତି ପଞ୍ଚାୟତରେ ପରିବା ଫସଲ ସହ ପ୍ରାୟ ଶହେ ଏକର ଜମିର ପାନ ବରଜ ନଷ୍ଟ ହୋଇଯାଇଛି। ମନ୍ଦା ଲାଗି ହେଉଥିବା ପରିବା ବାଡ଼ ବ୍ୟାପକ କ୍ଷତିଗ୍ରସ୍ତ ହୋଇଛି। ପବନ ଯୋଗୁ ହିଞ୍ଜିଳିକାଟୁ ପରିବା ବଜାରରେ ନିର୍ମାଣାଧୀନ ପରିବା ଭେଣ୍ଡିଂ ଜୋନ୍ ଟିଣ ଉଡ଼ି ଯାଇଛି। ବ୍ଲକର ବିଭିନ୍ନ ସ୍ଥାନରେ ଛୋଟ ବଡ଼ ଗଛ ମଧ୍ୟ ଭାଙ୍ଗି ପଡିଥିବା ସୂଚନା ମିଳିଛି। ଦାରୁଭଦ୍ରାଠାରେ ଜଣେ ବ୍ୟକ୍ତିଙ୍କ ନିର୍ମାଣାଧୀନ ଗୃହର ଆଜବେଷ୍ଟସ ଉଡ଼ି ଯାଇଥିବା ରିପୋର୍ଟ ହୋଇଛି ବୋଲି ବିଡ଼ିଓ ପ୍ରସନ୍ନ କୁମାର ପାତ୍ରଙ୍କ ଠାରୁ ପ୍ରକାଶ। ବ୍ଲକର ବିଭିନ୍ନ ଗ୍ରାମରେ ବିଦ୍ୟୁତ ତାର ଛିଡ଼ି ଯାଇଥିବାରୁ ବିଦ୍ୟୁତ ସରବରାହ ବିଚ୍ଛିନ୍ନ ହୋଇଛି। ବର୍ଷା ଛାଡିବା ପରେ ସାଉଥ୍କୋ ପକ୍ଷରୁ ମରାମତି କାମ ଆରମ୍ଭ ହୋଇଛି। ମ୍ୟୁନିସିପାଲିଟି ଓ ପାଖାପାଖି ଅଞ୍ଚଳରେ ରାତି ପ୍ରାୟ ୭ସୁଦ୍ଧା ବିଦ୍ୟୁତ୍ ସରବରାହ ସ୍ବାଭାବିକ ହୋଇଛି। କାଳବୈଶାଖୀରେ ଫସଲ କ୍ଷୟକ୍ଷତି ସମ୍ପର୍କରେ ସୋମବାର ସର୍ଭେ କରାଯିବ ବୋଲି ବିଡ଼ିଓ ପାତ୍ରଙ୍କ ସମେତ କୃଷି ସହକାରୀ ଅଧିକାରୀ ପ୍ରଶାନ୍ତ କୁମାର ନାଥ ସୂଚନା ଦେଇଛନ୍ତି।
