ନୂଆଦିଲ୍ଲୀ,୨୬-୬: କେନ୍ଦ୍ର ସରକାର ଆସନ୍ତା ଏକ ବର୍ଷ ଭିତରେ ନୂଆ ରାଷ୍ଟ୍ରୀୟ ଇ-ବାଣିଜ୍ୟ (ଇ-କମର୍ସ) ନୀତି ଜାରି କରିବେ। ଏହାଦ୍ୱାରା ଇଣ୍ଟରନେଟ୍ ଜରିଆରେ ଅନ୍ଲାଇନରେ ହେଉଥିବା କାରବାରର ସମଗ୍ର ବିକାଶ ହୋଇପାରିବ ବୋଲି ବାଣିଜ୍ୟ ଏବଂ ଉଦ୍ୟୋଗ ମନ୍ତ୍ରୀ ପୀୟୂଷ ଗୋୟଲ କହିଛନ୍ତି। ଇ-ବାଣିଜ୍ୟ କମ୍ପାନୀଙ୍କ ସହ କ୍ରମାଗତ ଦୁଇଦିନ ଧରି ହେଉଥିବା ଆଲୋଚନା କାଳରେ କେନ୍ଦ୍ରମନ୍ତ୍ରୀ ଉକ୍ତ ପ୍ରତିଶ୍ରୁତି ଦେଇଛନ୍ତି। ଏଥିପୂର୍ବରୁ କେନ୍ଦ୍ର ସରକାର ଚଳିତବର୍ଷ ଫେବୃୟାରୀରେ ରାଷ୍ଟ୍ରୀୟ ଇ-କମର୍ସ ନୀତି ଚିଠା ଘୋଷଣା କରିଥିଲେ। ସୀମାପାର ତଥ୍ୟ ପ୍ରବାହକୁ ରୋକିବା, କଟକଣା ଜାରି କରିବା ଭଳି ବିବାଦୀୟ ପ୍ରସଙ୍ଗଗୁଡ଼ିକ ଏଥିରେ ସ୍ଥାନିତ ହୋଇଥିଲା। ଯାହାକୁ ଇ-କମର୍ସ କମ୍ପାନୀଗୁଡ଼ିକ ବିରୋଧ କରୁଛନ୍ତି। ଏହାକୁ ଦୃଷ୍ଟିରେ ରଖି ଉଦ୍ୟୋଗ ସମ୍ପର୍କିତ ଏବଂ ଆଭ୍ୟନ୍ତରୀଣ ବ୍ୟାପାର ବିଭାଗ(ଡିପିଆଇଆଇଟି) ଅନ୍ତର୍ଗତରେ ଏକ ଆନ୍ତଃମନ୍ତ୍ରୀସ୍ତରୀୟ କମିଟି ଗଠନ କରାଯିବ। ଏହି କମିଟି ପ୍ରତ୍ୟକ୍ଷ ବିଦେଶୀ ନିବେଶ ଏବଂ ଇ-ବାଣିଜ୍ୟ ନୀତିର ଚିଠାକୁ ନେଇ ସମ୍ପୃକ୍ତ ପକ୍ଷଙ୍କ ଅଭିଯୋଗର ସମାଧାନ କରିବେ।
