ଲାଠୋର, ୯ା୯ (ଡି.ଏନ୍.ଏ.): ଗଲା ଦିନାକେତେ ହେଲା ଲଘୁଚାପ ପରଭାବରେ ପଶ୍ଚିମ ଓଡ଼ିଶାର ଅନେକ ଜିଲାରେ ବରଷା ଲାଗି ରହିଛେ। ବରଷା ପାଏନ୍ରେ ଗଲା ଶନିବାର ରାତି ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ପଁଚେତ୍ ଅଧୀନ ପିପଲବାହାଲ ବାଗପଡ଼ାର ବଲରାମ ମେହେରକଁର ଘର ଭାଂଗି ଯାଇଛେ। ଏନ୍ତାଥି ପରିବାର ଲୋକ୍ ଅଲପ୍କେ ଗୁଟେ ବଡ଼ ବିପଦ୍ରୁ ବରତି ଯାଇଛନ୍।
ସୂଚନା ଅନ୍ସାରେ ବାଗପଡ଼ାର ବଲରାମ ମେହେରକଁର ପରିବାର କହେଲେ ମାଏକିନା ନୀଲାବତୀ, ଝି’ ଯୋଶିଲା, ଚୁମକି ଆର ପୁଓ ହରେଶକେ ନେଇ ସଁସାର। ପରିବାରଟା ନିହାତି ଗରିବ୍, ଜମିବାଡ଼ି ବଲି କିଛି ନାଇଁ। ବଲରାମ ବଜାରକେ ବଜାର ବୁଲିବୁଲି ଫେନ୍ସି ସାମାନ ବିକୁଛନ୍। ସେଥ୍ରେ ଯାହା କମାନି ହେଉଛେ ପରିବାର ଚଲବାର ସଂଗେ ପିଲାଛୁଆକର ପାଠ୍ପଢ଼ା ଖରଚ୍ ତୁଲଉଛନ୍। ଏନ୍ତାଥି ଘରେ ସବୁବେଲେ ଅଭାବ ଅନାଟନ ଲାଗି ରହୁଛେ। ବଛର କେତେ ତଲେ ବଲରାମ ନିଜର ଲାଗେଲେସରମାନକରନୁ ୮୦ ହଜାର ଟଁକା ଉଧାର କରି ଘରଖଁଡ଼େ ତିଆରିଥିଲେ। ହାଡ଼ଭଂଗା ପରିଶ୍ରମ କରି ସେ ଏଭ୍ତକ ୫୦ ହଜାର ଟଁକା ସୁଝିଥିଲାବେଲେ ଆହୁରି ୩୦ ହଜାର ଟଁକା ବାକି ରହିଛେ। ଗଲା ଶନିବାର ବଲରାମ କେହେନ୍ସି କାମେ ଝନେ ଲାଗେଲେସର ଘରକେ ଯାଇଥିଲେ। ଏନ୍ତାଥି ଘରେ ପରିବାର ଲୋକ୍ ଖାଇପିଇ ରାତି ଶୁଇଥିଲାବେଲେ ବରଷା ପାଏନ୍ ଲାଗି ହଠାତ୍ ଘରଟା ଭାଂଗି ଯାଇଥିଲା। ହେଲେ ଅଲପ୍କେ ପରିବାର ଲୋକ୍ ବିପଦ୍ରୁ ବରତି ଯାଇଥିଲାବେଲେ ଘରର ଅନେକ ସାମାନ ଭାଂଗିରୁଜି ଯାଇଛେ। ଇଆଡ଼େ ଅନେକ ଦିନୁ ବଲରାମ ସରକାରୀ ଯୋଜନାରେ ଘରଖଁଡ଼େ ପାଏବାର ଲାଗି ସରକାରୀ ବାବୁମାନକୁ ଗୁହାରି କରି ନିରାଶ ହେଇଛନ୍। ଏହେଦ୍କା ସେ କେନେ୍ଥେଇ କୁଟୁମ ପୁଷ୍ବେ, ଘରଟା ମରାମତି କରବେ ସେ ଚିନ୍ତାରେ ଘାରି ହେଉଛନ୍। ଇଆଡ଼େ ଲାଗେସେରମାନକର ୩୦ ହଜାର ଟଁକା ସୁଝବାର ଚିନ୍ତା ତାହାକୁ ଖାଇଯାଉଛେ। ଇ ସବୁ କଥା ଚିନ୍ତା କରି ବଲରାମର ଅଁାଖିରୁ ଝୁମରା ଛାଡ଼ି ଯାଇଛେ। ଇ ଦିଗେ ଥାନୀୟ ପରଶାସନ ଦୁରୁଷ୍ଟି ଦେଇ ବଲରାମକୁଁ ଯେତେ ଜଲଦି ହେବା ଘରଭଂଗା ସାହାଯ୍ ସଂଗେ ପ୍ରଧାନମନ୍ତ୍ରୀ ଆବାସ ଯୋଜନାରେ ପକାଘର ଖଁଡ଼େ ଯୁଗେଇ ଦେବାକେ ବାଗପଡ଼ାବାସୀ ଦାବି କରିଛନ୍।
