ନୂଆଦିଲ୍ଲୀ, ୨୭ା୪- ବିଭିନ୍ନ କାରଣରୁ ପ୍ରକୃତିରେ ପରିବର୍ତ୍ତନ ଦେଖାଯାଇଥାଏ। କିନ୍ତୁ ସମୟ ଆସିଲେ ପ୍ରକୃତି କିପରି ସେହି ପରିବର୍ତ୍ତନରୁ ପୁଣି ନିଜକୁ ମୁକ୍ତ କରିନିଏ ତାହା ଏଥର ଦେଖାଯାଇଛି ଆର୍କଟିକ(ଉତ୍ତର ମେରୁ ଅଞ୍ଚଳ) ଉପରେ। ଚଳିତ ମାସ ଆର୍କଟିକରେ ବିଶେଷଜ୍ଞମାନେ ଠାବ କରିଥିବା ୧ ମିଲିୟନ ବର୍ଗ କିମି ଓସାରର ବିରଳ ଓଜୋନ ଛିଦ୍ର ଏବେ ବନ୍ଦ ହୋଇଯାଇଛି। ୟୁରୋପିଆନ କମିଶନ ଦ୍ୱାରା କାର୍ଯ୍ୟକାରୀ ହେଉଥିବା କୋପରନିକସ୍ ଆଟମୋସ୍ଫିୟର ମନିଟରିଂ ସର୍ଭିସ(ସିଏଏମଏସ୍) ଏବଂ କୋପରନିକସ କ୍ଲାଇମେଟ ଚେଞ୍ଜ ସର୍ଭିସ(ସି୩ଏସ୍) ଉକ୍ତ ଛିଦ୍ର ଆପେ ଆପେ ବନ୍ଦ ହୋଇଥିବା ନିଶ୍ଚିତ କରିଛନ୍ତି। ଏଜେନ୍ସି ପକ୍ଷରୁ ଏକ ଟୁଇଟ କରାଯାଇ ଏହା ପଛର କାରଣ ସମ୍ପର୍କରେ ତଥ୍ୟ ପ୍ରଦାନ କରାଯାଇଛି।
ଏଥିରେ କୁହାଯାଇଛି, ମେରୁ ଅଞ୍ଚଳରେ ପୋଲାର ଭର୍ଟେକ୍ସ (ଏକ ପ୍ରକାରର ଝଡ଼) ସଙ୍ଗଠିତ ହୋଇଥାଏ। ଏଥିଯେୋଗୁ ସେଠାରେ ଲୋ ପ୍ରେସର ବା ନିମ୍ନ ଚାପ କ୍ଷେତ୍ର ସୃଷ୍ଟି ସହ ବିଶାଳ ମାତ୍ରାରେ ଥଣ୍ଡା ପବନ ପ୍ରବାହିତ ହୋଇଥାଏ। ଏଥିସହ ଷ୍ଟ୍ରାଟୋସ୍ଫିୟରିକ ମେଘ ବା ବାଦଲ ଉତ୍ପନ ହୋଇଥାଏ। କ୍ଲୋରୋଫ୍ଲୋରୋ କାର୍ବନ ଗ୍ୟାସ ସହ ଏହି ବାଦଲର ମିଶ୍ରଣ ଯୋଗୁ ସୃଷ୍ଟି ହେଉଥିବା କେମିକାଲ ଓଜୋନ ସ୍ତରକୁ ନଷ୍ଟ କରିଦେଇଥାଏ। ସାଧାରଣତଃ ଏପରି ଝଡ଼ ଜୁଲାଇରୁ ସେପ୍ଟମ୍ବର ମାସ ମଧ୍ୟରେ ଦକ୍ଷିଣ ମେରୁ ଅଞ୍ଚଳ ଆଣ୍ଟାର୍କଟିକ ଉପରେ ସୃଷ୍ଟି ହୋଇଥାଏ। ଏହି ସମୟରେ ଷ୍ଟ୍ରାଟୋସ୍ଫିୟର(ବାୟୁମଣ୍ଡଳର ଦ୍ୱିତୀୟ ସ୍ତର) ପ୍ରାକୃତିକ ଭାବେ ଥଣ୍ଡା ରହିଥାଏ । କିନ୍ତୁ ପାଣିପାଗ ପରିବର୍ତ୍ତନ ଯୋଗୁ ଚଳିତବର୍ଷ ଏହି ଝଡ଼ ଆର୍କଟିକ ଉପର ଓଜନସ୍ତରରେ ଛିଦ୍ର ସୃଷ୍ଟି କରିଥିଲା। ଏହାର ଆକାର ପ୍ରାୟ ୧ ମିଲିୟନ ବର୍ଗ କିମି ବୋଲି ଜଣାପଡ଼ିଥିଲା। ଯଦି ଏହି ଛିଦ୍ର ବାୟୁ ସ୍ରୋତ ସହ ଦକ୍ଷିଣକୁ ଗତି କରିଥାନ୍ତା ତେବେ ଜୀବଜଗତ ପାଇଁ ଏକ ବଡ଼ ବିପଦ ସୃଷ୍ଟି ହୋଇଥାନ୍ତା। ବର୍ତ୍ତମାନ ପୋଲାର ଭର୍ଟେକ୍ସ ଦୁର୍ବଳ ହୋଇଯାଇଥିବାରୁ ଓଜୋନ ସ୍ତରରେ ସ୍ବାଭାବିକତା ଫେରିଆସିବା ସହ ବିପଦ ଆଶଙ୍କା ମଧ୍ୟ ଟଳିଯାଇଛି ।ଏପରି ପୋଲାର ଭର୍ଟେକ୍ସ ଆଉଥରେ ହୋଇପାରେ ବୋଲି ଏଜେନ୍ସି ପକ୍ଷରୁ ପୂର୍ବାନୁମାନ କରାଯାଇଛି। ତେବେ ତାହା ସେତେମାତ୍ରାରେ ଓଜୋନ ସ୍ତରକୁ ପ୍ରଭାବିତ କରି ନ ପାରେ ବୋଲି ଏଜେନ୍ସି ପକ୍ଷରୁ କୁହାଯାଇଛି।
