କଣାସ,୩୧ା୩(ସ୍ବ.ପ୍ର.)- କରୋନାର ବଢ଼ୁଥିବା ପ୍ରଭାବ ଯୋଗୁ ସାରା ପୃଥିବୀ ସ୍ତମ୍ଭୀଭୂତ ହୋଇପଡିଛି। ଏହାର ମୁକାବିଲା କରିବାକୁ ସରକାର ୨୧ଦିନିଆ ଲକଡାଉନ ଘୋଷଣା କରାଯାଇଥିବାବେଳେ ବହୁ ସମର୍ଥନ ମଧ୍ୟ ମିଳୁଛି। କିନ୍ତୁ ପୁରୀ ଜିଲା କଣାସ ବ୍ଲକରେ ଅନେକ ବ୍ୟକ୍ତି ଲକଡାଉନ ନ ମାନି ବାହାରେ ବୁଲୁଥିବାବେଳେ ହାଟଗୁଡ଼ିକରେ ଅଯଥା ଭିଡ଼ କରୁଛନ୍ତି। ଏଥିପାଇଁ ସ୍ଥାନୀୟ ମନ୍ଦାରହାଟର ସାପ୍ତାହିକ ହାଟକୁ ପୋଲିସ ହସ୍ତକ୍ଷେପ କରି ବନ୍ଦ କରିଦେଇଛି। ଲକଡାଉନକୁ ସମର୍ଥନ କରିବା ସହ ସାମାଜିକ ଦୂରତା ବଜାୟ ରଖିବା, ଜରୁରୀ ନ ଥିଲେ ଘରୁ ନ ବାହାରିବା ପାଇଁ ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ସାହାଯ୍ୟରେ ପ୍ରତି ଗ୍ରାମ ବୁଲି ସଚେତନ କରାଯାଉଛି। କିନ୍ତୁ ଲୋକମାନେ ଏହାକୁ ମାନୁ ନ ଥିବାରୁ ପୋଲିସ, ତହସିଲଦାର ଓ ବିଡିଓଙ୍କ ପାଇଁ ମୁଣ୍ଡବିନ୍ଧାର କାରଣ ସାଜିଛି। ସୋମବାର କଣାସଠାରେ ହେଉଥିବା ସାପ୍ତାହିକ ହାଟରେ ଏପରି ଜନଗହଳି ହୋଇଥିଲା ଯେ ପ୍ରଶାସନ ଲୋକଙ୍କୁ ହଟାଇବାରେ ବହୁ ହଇରାଣ ହୋଇଥିଲେ। ମଙ୍ଗଳବାର ଗଡସାନପୁଟ ପଞ୍ଚାୟତର ମନ୍ଦାରବସ୍ତଠାରେ ସାପ୍ତାହିକ ହାଟ ପାଳି ଥିବାରୁ ଧୀରେ ଧୀରେ ଲୋକଙ୍କ ଭିଡ଼ ହେବାକୁ ଲାଗିଥିଲା। ଖବରପାଇ କଣାସ ଥାନା ଆଇଆଇସି ତପନ ରାଉତ, ତହସିଲଦାର ଉମାକାନ୍ତ ରାଉତ ପୋଲିସ ଫୋର୍ସ ସହ ପହଞ୍ଚିବାପରେ ଲୋକେ ଦୌଡ଼ିବାକୁ ଲାଗିଥିଲେ। ପରେ ତହସିଲଦାରଙ୍କ ଉପସ୍ଥିତିରେ ପୋଲିସ ହାଟକୁ ବନ୍ଦ କରିଦିଆଯାଇଥିଲା।
