ବଡ଼ଗାଁ, ୨୧।୪ (ଡି.ଏନ.ଏ)-ବଡ଼ଗାଁର ରାମଲୀଳା ଯାତ୍ରାର ସପ୍ତମ ରଜନୀରେ ରାମଚନ୍ଦ୍ରଙ୍କ ବନବାସ ମଞ୍ଚସ୍ଥ ହୋଇଛି। ଦାସୀ ମନ୍ଥରାଙ୍କ କୁମନ୍ତ୍ରଣାରେ ପଡି ରାଜା ଦଶରଥଙ୍କ ମଧ୍ୟମା ରାଣୀ କୈକେୟୀ ରାଜାଙ୍କ ଦୁର୍ବଳ ମୂହୂର୍ତ୍ତର ସୁଯୋଗ ନେଇ ୨ବର ଦେବା ପାଇଁ ସର୍ତ୍ତ ରଖିଥିଲେ । ପ୍ରଥମ ବରରେ ରାମଚନ୍ଦ୍ର ୧୪ ବର୍ଷ ବନବାସ କରିବେ ଓ ଦ୍ୱିତୀୟ ବରରେ ନିଜ ପୁତ୍ର ଭରତ ରାଜସିଂହାସନରେ ଅଭିଷିକ୍ତ ହୋଇ ଅଯୋଧ୍ୟାର ରାଜା ହେବେ। ଏହି ବର ଯୋଗୁ ରାଜା ଦଶରଥ ଧର୍ମ ସଙ୍କଟରେ ପଡିଥିଲେ। ଏହି ସମୟରେ ପିତୃଭକ୍ତ ରାମ ପିତାଙ୍କ ମର୍ମବେଦନା ବୁଝିପାରି ପିତୃସତ୍ୟ ରକ୍ଷା ପାଇଁ ବନବାସ ଯିବାକୁ ବିନାଦ୍ୱିଧାରେ ଆଗଭର ହୋଇଥିଲେ। ଶ୍ରୀରାମଙ୍କ ସହିତ ଭାଇ ଲକ୍ଷ୍ମଣ ଓ ସ୍ତ୍ରୀ ସତୀ ସୀତାଙ୍କ ସହିତ ବନ ଅଭିମୁଖେ ଯାତ୍ରା କରିଥିଲେ। ଏହି କରୁଣଦୃଶ୍ୟକୁ କଳାକାରଙ୍କ ଦ୍ୱାରା ହୃଦୟସ୍ପର୍ଶୀ ହୋଇଥିଲା। ଶ୍ରୀରାମ, ଲକ୍ଷ୍ମଣ, ସୀତା, ଦଶରଥ, କୌଶଲ୍ୟା, କୈକେୟୀ, ମନ୍ଥରା, ବଶିଷ୍ଠ ଋଷି ଭୂମିକାରେ ଯଥାକ୍ରମେ ଲୁଲୁ ପାଣିଗ୍ରାହୀ, ଦୀପକ ପୃଷେଟ, କମଳେନ୍ଦୁ ପାଣିଗ୍ରାହୀ, ଭିକାରୀ ଚରଣ ସା, ଦିବ୍ୟଲୋଚନ ମିଶ୍ର, ସୁରେଶ ସେଠ, ମହାଦେବ ସା, ସୋନୁ ପାଣିଗ୍ରାହୀ ଅଭିନୟ କରିଥିଲେ। ଯାତ୍ରା ଆରମ୍ଭ ପୂର୍ବରୁ ରାଉରକେଲା ଶ୍ରୀକ୍ଷେତ୍ର କଳା ପରିଷଦ ଦ୍ୱାରା ସଙ୍ଗୀତ ପରିବେଷଣ ଓ ବଡ଼ଗାଁ ବ୍ଲକ ତଳିମୁଣ୍ଡା ଗ୍ରାମର ରାଧାକୃଷ୍ଣ ଆଦିବାସୀ ସାଂସ୍କୃତିକ ଦଳ ଦ୍ୱାରା ନୃତ୍ୟ ପରିବେଷଣ କରାଯାଇଥିଲା। ଏଥିରେ ରାଧାକୃଷ୍ଣ ଦଳର ଶିଶୁ ବାଦ୍ୟକାର କ୍ଷୀରୋଦ ନାଏକ ଦର୍ଶକଙ୍କ ଦୃଷ୍ଟି ଆକର୍ଷଣ କରିପାରିଥିଲେ ।
