ମେଲବୋର୍ନ.୨୭।୧୨(ଏଏଫ୍ପି)- ମିଡଲ ଅର୍ଡର ବ୍ୟାଟ୍ସମ୍ୟାନ ଟ୍ରାଭିସ ହେଡଙ୍କ ଶତକ ଓ ପରେ ବୋଲରଙ୍କ ପ୍ରାରମ୍ଭିକ ସଫଳତା ସହାୟତାରେ ଅଷ୍ଟ୍ରେଲିଆ ଭ୍ରମଣକାରୀ ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରେ ସ୍ଥିତି ଦୃଢ଼ କରିଛି। ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଅଷ୍ଟ୍ରେଲିଆ ପ୍ରଥମ ଇନିଂସରେ ୧୫୫.୧ ଓଭରରେ ୪୬୭ ରନ କରି ଅଲଆଉଟ ହୋଇଥିଲା। ଜବାବରେ ପ୍ରଥମ ଇନିଂସ ଆରମ୍ଭ କରି ନ୍ୟୁଜିଲାଣ୍ଡ ପ୍ରାରମ୍ଭିକ ବିପର୍ଯ୍ୟୟର ଶିକାର ହୋଇ ଶୁକ୍ରବାର ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ୧୮ ଓଭରରେ ୨ ଉଇକେଟ ହରାଇ ୪୪ ରନ ସଂଗ୍ରହ କରିଛି। ଫଳରେ ନ୍ୟୁଜିଲାଣ୍ଡ ୮ ଉଇକେଟ ହାତରେ ରଖି ଏବେ ୪୨୩ ରନ ପଛରେ ପଡିଛି। ଷ୍ଟମ୍ପ ଅପସାରଣ ବେଳକୁ ଓପନର ଟମ୍ ଲଥାମ ୯ ଓ ଅଭିଜ୍ଞ ରସ ଟେଲର ୨ ରନ କରି ଅପରାଜିତ ରହିଛନ୍ତି। ଅନ୍ୟତମ ଓପନର ଟମ୍ ବ୍ଲଣ୍ଡେଲ ୧୫ ଓ ଅଧିନାୟକ କେନ୍ ଓ୍ବିଲିୟମସନ ୯ ରନ କରି ଉଇକେଟ କିପର ଟିମ୍ ପେନ୍ଙ୍କୁ କ୍ୟାଚ୍ ଦେଇ ଯଥାକ୍ରମେ ପ୍ୟାଟ୍ କୁମିନ୍ସ ଓ ଜେମ୍ସ ପାଟିନସନଙ୍କ ଦ୍ୱାରା ଆଉଟ ହୋଇଛନ୍ତି।
ଓଭରନାଇଟ୍ ସ୍କୋର ୨୫୭/୪ରୁ ଖେଳ ଆରମ୍ଭ କରି ଅଷ୍ଟ୍ରେଲିଆ ଅଲଆଉଟ ହୋଇଥିଲା। ଅପରାଜିତ ଥିବା ବ୍ୟାଟ୍ସମ୍ୟାନ ଟ୍ରାଭିସ ହେଡ ୨୫ ରନରୁ ଖେଳ ଆରମ୍ଭ କରି ୧୧୪ ରନର ଶତକୀୟ ପାଳି ଖେଳି ନେଲ ଓ୍ବାଗନରଙ୍କ ବଲ୍ରେ ମିଚେଲ ସାଣ୍ଟନରଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏଥିସହିତ ହେଡ୍ କ୍ୟାରିୟର ଦ୍ୱିତୀୟ ଟେଷ୍ଟ ଶତକ ହାସଲ କରି ସମାଲୋଚକଙ୍କୁ ଚୁପ୍ କରିଛନ୍ତି। ସେହିପରି ୭୭ ରନରୁ ଖେଳ ଆରମ୍ଭ କରି ନିର୍ଭରଯୋଗ୍ୟ ଷ୍ଟିଭ୍ ସ୍ମିଥ୍ ୮୫ ରନ କରି ହେନେରୀ ନିକୋଲ୍ସଙ୍କୁ କ୍ୟାଚ୍ ଦେଇ ଓ୍ବାଗନର ଶିକାର ହୋଇଥିଲେ। ସେହିପରି ପେନ୍ ମଧ୍ୟ ୭୯ ରନର ଗୁରୁତ୍ୱପୂର୍ଣ୍ଣ ଅର୍ଦ୍ଧଶତକୀୟ ପାଳି ଖେଳି ଆଉଟ ହୋଇଥିଲେ। ସେ ସପ୍ତମ ଟେଷ୍ଟ ଅର୍ଦ୍ଧଶତକ ହାସଲ କରିଥିଲେ। ହେଡ ଓ ପେନ୍ ଷଷ୍ଠ ଉଇକେଟ ଯୋଡିରେ ୧୫୦ ରନ ସଂଗହ କରି ନ୍ୟୁଜିଲାଣ୍ଡ ବୋଲରଙ୍କୁ ନିରାଶ କରିଥିଲେ। ଅନ୍ୟମାନଙ୍କ ମଧ୍ୟରେ ମିଚେଲ ଷ୍ଟାର୍କ ୧, ନାଥନ ଲିୟନ ୧ ଓ କୁମିନ୍ସ ଖାତା ଖୋଲିବା ପୂର୍ବରୁ ଆଉଟ ହୋଇଥିଲେ। ପାଟିନସନ ୧୪ ରନ କରି ଅପରାଜିତ ରହିଥିଲେ। ଏକଦା ୫ ଉଇକେଟ ହରାଇ ଅଷ୍ଟ୍ରେଲିଆ ଚା’ପାନ ବିରତି ସୁଦ୍ଧା ୪୩୧ ରନ କରି ଦୃଢ଼ ସ୍ଥିତିରେ ଥିଲା। ତେବେ ଏହାପରେ ଦଳ ମାତ୍ର ୯ ଓଭରରେ ୩୬ ରନରେ ବାକି ୫ ଉଇକେଟ ହରାଇ ଅଲଆଉଟ ହୋଇଥିଲା। ବୋଲିଂରେ ନ୍ୟୁଜିଲାଣ୍ଡ ତରଫରୁ ଓ୍ବାଗନର ସର୍ବାଧିକ ୪, ଟିମ୍ ସୌଦି ୩, କଲିନ ଡି ଗ୍ରାଣ୍ଡହୋମ ୨, ଟ୍ରେଣ୍ଟ ବୋଲ୍ଟ ଗୋଟିଏ ଉଇକେଟ ଅକ୍ତିଆର କରିଥିଲେ। ଉଲ୍ଲେଖଥାଉ କି, ପର୍ଥରେ ଅନୁଷ୍ଠିତ ଟେଷ୍ଟ ମ୍ୟାଚ୍ରେ ନ୍ୟୁଜିଲାଣ୍ଡ ୨୯୬ ରନରେ ପରାସ୍ତ ହୋଇ ୩ ମ୍ୟାଚ୍ ବିଶିଷ୍ଟ ଏହି ସିରିଜରେ ୧-୦ରେ ପଛରେ ପଡିଛି।
ସଂକ୍ଷିପ୍ତ ସ୍କୋର:
ଅଷ୍ଟ୍ରେଲିଆ ପ୍ରଥମ ଇନିଂସ- ୧୫୫.୧ ଓଭରରେ ୪୬୭ ରନରେ ଅଲଆଉଟ
(ହେଡ୍-୧୧୪, ସ୍ମିଥ୍- ୮୫, ପେନ- ୭୯, ଲାବୁସେନ- ୬୩, ଓ୍ବାର୍ନର- ୪୧, ମାଥ୍ୟୁ ଓ୍ବେଡ- ୩୮, ଓ୍ବାଗନର- ୪/୮୩, ସୌଦି- ୩/୧୦୩, ଗ୍ରାଣ୍ଡ ହୋମ- ୨/୬୮, ବୋଲ୍ଟ- ୧/୯୧)।
ନ୍ୟୁଜିଲାଣ୍ଡ ପ୍ରଥମ ଇନିଂସ- ୧୮ ଓଭରରେ ୪୪/୨
(ଲଥାମ- ୯*, ଟେଲର- ୨*, ବ୍ଲଣ୍ଡେଲ- ୧୫, ଓ୍ବିଲିୟମସନ-୯, କୁମିନ୍ସ- ୧/୮, ପାଟିନସନ- ୧/୯)।