ନୂଆଦିଲ୍ଲୀ, ୩୦ା୩ (ପି.ଟି.)-ଅଲିମ୍ପିକ୍ସରେ ଭାଗ ନେବାକୁଥିବା ବକ୍ସର ମାନଙ୍କ ଲାଗି ଅନ୍ଲାଇନ୍ କୋଚିଂ ବ୍ୟବସ୍ଥା ସୋମବାରଠାରୁ ଆରମ୍ଭ ହେବ। କୋଭିଡ୍-୧୯ ଯୋଗୁ ଦେଶରେ ଜାତୀୟ ଲକ୍ଡାଉନ୍ ଘୋଷଣା କରାଯାଇଛି। ବକ୍ସରମାନଙ୍କ ଟ୍ରେନିଂକୁ ଏହା ପ୍ରଭାବିତ କରିଛି। ଏଥିସହିତ ବକ୍ସରମାନଙ୍କ ମାନସିକ ଅବସ୍ଥାରେ ସ୍ଥିରତା ବଜାୟ ରଖିବା ତଥା ପୁଷ୍ଟିସାଧନ କ୍ଷେତ୍ରରେ ମଧ୍ୟ ଧ୍ୟାନ ଦିଆଯିବ ବୋଲି ଭାରତୀୟ ବକ୍ସିଂ ମହାସଂଘ ତରଫରୁ ସୂଚନା ଦିଆଯାଇଛି। ୨୦୨୧ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଥିବା ଟୋକିଓ ଅଲିମ୍ପିକ୍ସ ପାଇଁ ଭାରତର ୯ଜଣ ବକ୍ସର ଇତିମଧ୍ୟରେ ଯୋଗ୍ୟତା ହାସଲ କରିସାରିଛନ୍ତି। ସେମାନେ ହେଲେ ଏମ୍.ସି. ମେରୀକମ୍ (୫୧କେଜି), ସିମରନଜିତ୍ କୌର (୬୦କେଜି), ଲଭଲିନା ବର୍ଗୋହାନି (୬୯କେଜି), ପୂଜା ରାଣୀ (୭୫କେଜି), ଅମିତ ଫଙ୍ଗାଲ (୫୨କେଜି), ମନୀଷ କୌଶିକ୍ (୬୩ କେଜି), ବିକାଶ କ୍ରିଷନ (୬୯କେଜି), ଆଶିଷ କୁମାର (୭୫କେଜି) ଓ ସତୀଶ କୁମାର (+୯୧କେଜି)। ବକ୍ସିଂ ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ) ସଭାପତି ଅଜୟ ସିଂ ରବିବାର ଏହି ବକ୍ସରମାନଙ୍କ ସହିତ ରବିବାର ଏକ କନଫରେନ୍ସ କଲ୍ କରିଥିଲେ। କରୋନା ମହାମାରୀ ବିରୋଧରେ ଲଢେଇ ପାଇଁ ଏପ୍ରିଲ ୧୪ ପର୍ଯ୍ୟନ୍ତ ଲକ୍ଡାଉନ୍ ଘୋଷଣା କରାଯାଇଛି। ସେ ସମୟରେ ଅଲିମ୍ପିକ୍ସ ପାଇଁ କିପରି ପ୍ରସ୍ତୁତ ହେବାକୁ ପଡ଼ିବ ତାହା ସିଂ ବ୍ୟାଖ୍ୟା କରିଥିଲେ। ନିଜକୁ ସବୁ ବେଳେ ଫିଟ୍ ରଖିବାକୁ ପଡ଼ିବ। କୋଚ୍ମାନଙ୍କ ପରାମର୍ଶକ୍ରମେ ବ୍ୟାୟାମ ଦ୍ୱାରା ଯଥା ସମ୍ଭବ ଶରୀରର ଓଜନ ବଜାୟ ରଖିବାକୁ ପଡ଼ିବ ବୋଲି ସିଂ ବକ୍ସରମାନଙ୍କୁ କହିଥିଲେ। ବିଏଫ୍ଆଇର କାଯର୍ର୍ୟନିର୍ବାହୀ ନିର୍ଦ୍ଦେଶକ ଆର.କେ. ସାଚେଟ ଖାଦ୍ୟପେୟର ନିୟନ୍ତ୍ରଣ ରଖିବା ଲାଗି କହିଛନ୍ତି। ଦିଲ୍ଲୀରେ ୧୪ ଦିନିଆ ଆଇସୋଲେଶନରେ ରହିବା ପରେ ଭାରତୀୟ ବକ୍ସିଂର ହାଇପରଫର୍ମାନ୍ସ ଡାଇରେକ୍ଟର ସାଣ୍ଟିଆଗୋ ନିଏଭା ବର୍ତ୍ତମାନ ଦିଲ୍ଲୀରେ ଅବସ୍ଥାନ କରୁଛନ୍ତି। ସେ ପୁରୁୁଷ ବକ୍ସରମାନଙ୍କ ଶ୍ରେଣୀ ପରିଚାଳନା କରିବେ। ମହିଳାମାନଙ୍କ ଶ୍ରେଣୀ ସେମାନଙ୍କ ହାଇପରଫର୍ମାନ୍ସ ଡାଇରେକ୍ଟର ରାଫେଲି ବର୍ଗାମାସ୍କୋ ପରିଚାଳନା କରିବେ। ବର୍ତ୍ତମାନ ସାଣ୍ଟିଆଗୋ ଏକମାତ୍ର ବକ୍ସିଂ କୋଚ୍ ଯିଏକି ପଟିଆଲାରେ ଅବସ୍ଥାନ କରୁଛନ୍ତି। ସେ ସେଠାରେ ରହିଥିବା ବକ୍ସିଂ ହଲ୍ର ସଦୁପଯୋଗ କରିପାରିବେ। ଯୋଗାଯୋଗ ଜରିଆରେ ବକ୍ସରମାନଙ୍କୁ ବିଭିନ୍ନ ପ୍ରକାର ଟେକ୍ନିକ୍ ସମ୍ପର୍କରେ ଶିକ୍ଷାଦାନ କରିପାରିବେ। ଚଳିତ ମାସ ପ୍ରଥମ ଭାଗରେ ଜୋର୍ଡାନଠାରେ ଅନୁଷ୍ଠିତ ଏସିଆନ କ୍ୱାଲିଫାୟର୍ସରେ ଭାରତୀୟ ବକ୍ସରମାନେ ଅଦ୍ଭୂତପୂର୍ବ ସଫଳତା ହାସଲ କରିଛନ୍ତି। ସେଥିରେ ୯ଜଣ ବକ୍ସର ଅଲିମ୍ପିକ ଯୋଗ୍ୟତା ହାସଲ କରିପାରିଛନ୍ତି। ଜାତୀୟ ଲକ୍ଡାଉନ୍ ଯୋଗୁ ସମଗ୍ର ଦେଶରେ ସମସ୍ତ କ୍ରୀଡ଼ା କାର୍ଯ୍ୟକଳାପ ସ୍ଥିର ହୋଇଯାଇଛି। ଖବର ଲେଖା ହେବାବେଳକୁ ଦେଶରେ କରୋନା ଭାଇରସ୍ରେ ସଂକ୍ରମିତ ସଂଖ୍ୟା ୯୭୯ରେ ପହଞ୍ଚତ୍ ସାରିଥିବାବେଳେ ୨୫ ଜଣଙ୍କର ମୃତ୍ୟୁ ଘଟିସାରିଲାଣି ।
