ଫିଲ୍ମରେ ଦିବ୍ୟାଙ୍ଗମାନଙ୍କୁ ସୁଯୋଗ ଦେବାକୁ ଅଭିନବ ପ୍ରୟାସ: ପ୍ରତିଭା ଦେଖାଇବେ ‘ସୁପର୍ ୨୨’
06 ଭୁବନେଶ୍ୱର, ୩।୧୧(ବ୍ୟୁରୋ): ସେମାନେ ଦିବ୍ୟାଙ୍ଗ। ହେଲେ ନାଚିବା, ଗାଇବା ଓ ଅଭିନୟ କରିବା ପାଇଁ ତାଙ୍କ ନିକଟରେ ଯଥେଷ୍ଟ ଦକ୍ଷତା ରହିଛି। ସକ୍ଷମଙ୍କ ଭଳି ସବୁକିଛି କରିବାର ମନୋବଳ ବି ଅଛି। ବାସ୍ ପ୍ରତିଭା ଦେଖାଇବା ଲାଗି ଆବଶ୍ୟକ ହେଉଛି ଗୋଟିଏ ମଞ୍ଚ, ଯେଉଁଠି ସେମାନେ ନିଜ ଭିତରେ ଲୁକ୍କାୟିତ କଳାକୁ ବାହାରକୁ ଆଣିପାରିବେ ଓ ଦୁନିଆକୁ ଜଣାଇଦେବେ ଦିବ୍ୟାଙ୍ଗ ହେଲେ ବି ଆମେ ସକ୍ଷମ। ପ୍ରତିଭାବାନ୍ ଦିବ୍ୟାଙ୍ଗମାନଙ୍କୁ ଏଭଳି ଏକ ମଞ୍ଚ ଯୋଗାଇଦେବାକୁ ଅଣ୍ଟା ଭିଡ଼ିଛନ୍ତି ଅଭିନେତା ସବ୍ୟସାଚୀ ମିଶ୍ର। ସବ୍ୟସାଚୀ ଏବଂ ତାଙ୍କ ଦଳ ଦ୍ୱାରା ପ୍ରତିଷ୍ଠିତ ସାମାଜିକ ଅନୁଷ୍ଠାନ ‘ସ୍ମାଇଲ୍ ପ୍ଲିଜ୍’ ପକ୍ଷରୁ ଆୟୋଜିତ ହେବାକୁ ଯାଉଛି ଏକ ନିଆରା କାର୍ଯ୍ୟକ୍ରମ ‘ସୁପର୍ ୨୨’ ଶୋ। ଦିବ୍ୟାଙ୍ଗ କଳାକାରମାନଙ୍କୁ ନିଜ ପ୍ରତିଭା ପ୍ରଦର୍ଶନ ପାଇଁ ଏକ ପ୍ଲାଟଫର୍ମ ଯୋଗାଇବା ଲକ୍ଷ୍ୟରେ ଆସନ୍ତା ୪ ତାରିଖରେ ନୟାପଲ୍ଲୀସ୍ଥିତ କ୍ରାଉନ୍ ହୋଟେଲରେ ଏହି କାର୍ଯ୍ୟକ୍ରମ ଆୟୋଜିତ ହେବ। ‘ସ୍ମାଇଲ୍ ପ୍ଲିଜ୍’ ପକ୍ଷରୁ ଶନିବାର ଆୟୋଜିତ ଏକ ଖବରଦାତା ସମ୍ମିଳନୀରେ ସୂଚନା ଦେଇ ସବ୍ୟସାଚୀ କହିଛନ୍ତି, ବିଗତ ଏକ ବର୍ଷ ହେବ ‘ସ୍ମାଇଲ୍ ପ୍ଲିଜ୍’ ଓଡ଼ିଶାର କୋଣାନୁକୋଣରୁ ପ୍ରତିଭାବାନ ଦିବ୍ୟାଙ୍ଗମାନଙ୍କୁ ଚିହ୍ନଟ କରିବାର ଅଭିଯାନ ଚଳାଇଛି। ଏହି ଅଭିଯାନକୁ ଆଉ ପାଦେ ଆଗକୁ ନେଇ ୨୨ ଦକ୍ଷ ଏବଂ ବିଭିନ୍ନ କଳାରେ ନିପୁଣ ଦିବ୍ୟାଙ୍ଗଙ୍କୁ ଚିହ୍ନଟ କରି ‘ସୁପର୍ ୨୨ ଶୋ’ ଆୟୋଜନ କରିବାକୁ ସ୍ଥିର କରାଯାଇଛି। ମନୋରଞ୍ଜନ ତଥା ଚଳଚ୍ଚିତ୍ର ଜଗତରେ ମୁଖ୍ୟ ଚରିତ୍ରରେ ଦିବ୍ୟାଙ୍ଗମାନଙ୍କୁ ଅଭିନୟ କରିବାର ସୁଯୋଗ ଦେବା ନିମନ୍ତେ ‘ସୁପର୍ ୨୨’ କାର୍ଯ୍ୟକରିବ। ଏହି ଦକ୍ଷତା ସନ୍ଧାନ କାର୍ଯ୍ୟକ୍ରମ ଦ୍ୱାରା ଦିବ୍ୟାଙ୍ଗମାନଙ୍କୁ ସମାଜରେ ଏକ ଗୁରୁତ୍ୱପୂର୍ଣ୍ଣ ସ୍ଥାନ ଦିଆଯାଇପାରିବ ବୋଲି ସବ୍ୟସାଚୀ କହିଥିଲେ। ଖବରଦାତା ସମ୍ମିଳନୀରେ ଅଭିନେତ୍ରୀ ଅର୍ଚ୍ଚିତା ସାହୁ ଉପସ୍ଥିତ ରହି କହିଥିଲେ, ‘ସୁପର୍ ୨୨’ ଦଳରେ ଦକ୍ଷତାସମ୍ପନ୍ନ ୮ ଦିବ୍ୟାଙ୍ଗ ମହିଳା ସାମିଲ ହୋଇଛନ୍ତି। ଦୃଢ଼ ଆମତ୍ବିଶ୍ୱାସ ସହ ବିଭିନ୍ନ ସାମାଜିକ ବାଧାବିଘ୍ନକୁ ପ୍ରତିହତ କରି ଆଜି ଏଠାରେ ପହଞ୍ଚତ୍ବାରେ ଏମାନେ ସଫଳ ହୋଇଛନ୍ତି। ‘ସ୍ମାଇଲ୍ ପ୍ଲିଜ୍’ ଟିମ୍ର କଠିନ ପରିଶ୍ରମ ଓ ନିରବଚ୍ଛିନ୍ନ ସାମାଜିକ କାର୍ଯ୍ୟକ୍ରମ ଯୋଗୁ ଏହା ସଫଳ ହୋଇପାରିଛି। ଦିବ୍ୟାଙ୍ଗମାନଙ୍କ ବୃହତ୍ତର ସ୍ବାର୍ଥକୁ ଦୃଷ୍ଟିରେ ରଖି ଏଭଳି ଅଭିଯାନ ଆରମ୍ଭ କରାଯାଇଥିବା ସେ କହିଥିଲେ। ‘ସୁପର୍ ୨୨’ ଦଳରେ ଆଗାମୀ ଦିନରେ ଅଧିକରୁ ଅଧିକ ଦିବ୍ୟାଙ୍ଗମାନଙ୍କୁ ସାମିଲ କରିବାକୁ ଲକ୍ଷ୍ୟ ରଖାଯାଇଥିବା ପ୍ରିଲ୍ୟୁଡ୍ ପ୍ରତିଷ୍ଠାତା ନିର୍ଦ୍ଦେଶକ ଏବଂ ମାଇଁ ସିଟି ଲିଙ୍କସ୍ ସମ୍ପାଦକ ସତ୍ୟବ୍ରତ ସାନୁ ରଥ କହିଥିଲେ।