ନୂଆଦିଲ୍ଲୀ, ୧୪।୬ (ପି.ଟି.)-ଶୁକ୍ରବାର ଫିଫା (ଫେଡେରେଶନ ଅଫ୍ ଇଣ୍ଟରନ୍ୟାଶନାଲ ଫୁଟ୍ବଲ ଆସୋସିଏଶନ୍ସ) ର଼୍ୟାଙ୍କିଙ୍ଗ ତାଲିକା ପ୍ରକାଶ ପାଇଛି। ଏଥିରେ ଭାରତ ୧୦୧ତମ ସ୍ଥାନ ବଜାୟ ରଖିଛି। ଭାରତ ନିକଟରେ ଥାଇଲାଣ୍ଡରେ ଅନୁଷ୍ଠିତ କିଙ୍ଗ୍ସ କପ୍ରେ ତୃତୀୟ ସ୍ଥାନ ଅଧିକାର କରିଥିଲା। ଫିଫା ସ୍ବୀକୃତିପ୍ରାପ୍ତ ଏହି ଟୁର୍ନାମେଣ୍ଟରେ ନୂଆ କୋଚ୍ ଇଗୋର ଷ୍ଟିମାକ୍ଙ୍କ ନେତୃତ୍ୱରେ ଭାରତ ଏହାଠାରୁ ଉଚ୍ଚ ର଼୍ୟାଙ୍କିଙ୍ଗପ୍ରାପ୍ତ କୁରାକାଓଠାରୁ ୧-୩ରେ ପରାଜିତ ହୋଇଥିଲା। ପରେ ଦଳ ଆୟୋଜକ ଥାଇଲାଣ୍ଡ ବିପକ୍ଷରେ ୧-୦ ଗୋଲରେ ବିଜୟ ଲାଭ କରିଥିଲା। ଏହି ଫଳାଫଳ କିନ୍ତୁ ଭାରତର ର଼୍ୟାଙ୍କିଙ୍ଗ ସ୍ଥିତିରେ କୌଣସି ଫରକ ଆଣି ନ ଥିଲା। ଏହା ପୂର୍ବରୁ ଏପ୍ରିଲ ୪ ରେ ଫିଫା ର଼୍ୟାଙ୍କିଙ୍ଗ ତାଲିକା ପ୍ରକାଶ ପାଇଥିଲା। ଏଥିରେ ଭାରତର ର଼୍ୟାଙ୍କିଙ୍ଗ ପଏଣ୍ଟ ୧୨୧୯ ରହିଥିଲା। ଦଳ ତାହା ବଜାୟ ରଖିଛି। ଫିଫା ର଼୍ୟାଙ୍କିଙ୍ଗ ତାଲିକାରେ ଏସୀୟ ରାଷ୍ଟ୍ରଗୁଡ଼ିକ ମଧ୍ୟରେ ଭାରତୀୟ ଦଳ ୧୮ତମ ସ୍ଥାନରେ ରହିଛି। ଏସିଆର ଟପ୍ ୫ ମଧ୍ୟରେ ଇରାନ (୨୦ତମ) ଶୀର୍ଷରେ ରହିଥିବାବେଳେ ଏହା ପଛକୁ ଯଥାକ୍ରମେ ଜାପାନ (୨୮ତମ), କୋରିଆ (୩୭ତମ), ଅଷ୍ଟ୍ରେଲିଆ (୪୩ତମ) ଏବଂ କାତାର (୫୫ତମ) ରହିଛନ୍ତି। ଓଭରାଲ ଓ୍ବାଲର୍ଡ ର଼୍ୟାଙ୍କିଙ୍ଗ୍ସରେ ବେଲଜିୟମ ପୂର୍ବ ଭଳି ପ୍ରଥମ ସ୍ଥାନରେ ରହିଥିବା ବେଳେ ଏହା ପଛକୁ ଯଥାକ୍ରମେ ଫ୍ରାନ୍ସ, ବ୍ରାଜିଲ, ଇଂଲଣ୍ଡ ଏବଂ ପର୍ତ୍ତୁଗାଲ ରହିଛନ୍ତି।
