ଯାଜପୁର ରୋଡ,୧୦।୮(ନି.ପ୍ର.): କ୍ରାନ୍ତି ଦିବସ ଅବସରରେ ଶୁକ୍ରବାର ସ୍ମୃତି ସଂସଦ କମିଟିର ଆବାହକ ମଦନ ମୋହନ ଜେନାଙ୍କ ଅଧ୍ୟକ୍ଷତାରେ ଶୁକ୍ରବାର ଡ. ଫନିପାଲ ବିଦ୍ୟାଳୟ ପରିସରରେ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଯାଇଛି। ଏଥିରେ ଡ଼. ଫନିପାଲ ଜଣେ ସ୍ବାଧିନତା ସଂଗ୍ରାମୀ। ସେ ପ୍ରଜା ମଣ୍ଡଳ ଆନ୍ଦୋଳନ ଓ ଯାଜପୁର ରୋଡ ଅଞ୍ଚଳରେ ବାମପନ୍ଥୀ ମୁଖ୍ୟଧାରାର ନେତୃତ୍ୱ ନେଇଥିଲେ। ଗରିବ ନିସ୍ପେଶିତ ଲୋକଙ୍କ ସେବାରେ ଶେଷ ଜୀବନ ପର୍ଯ୍ୟନ୍ତ ନିଜକୁ ଉତ୍ସର୍ଗିତ କରିଥିଲେ। ୧୯୮୫ରେ ତାଙ୍କ ନାମରେ ଫନିପାଲ ପ୍ରାଥମିକ ବିଦ୍ୟାଳୟ ପ୍ରତିଷ୍ଠା କରାଯାଇଥିଲା। ଏବେ ଶିକ୍ଷା ବିଭାଗ ପ୍ରାଥମିକ ବିଦ୍ୟାଳୟଗୁଡିକୁ ନିକଟସ୍ଥ ଉଚ୍ଚ ବିଦ୍ୟାଳୟ ସହିତ ମିଶ୍ରଣ କରିବା ପାଇଁ ନିର୍ଦ୍ଦେଶ ଜାରି କରିଛନ୍ତି। ଏହି କ୍ରମରେ ଫନିପାଲଙ୍କ ନାମ ପରିବର୍ତ୍ତନ କରାଗଲେ ସ୍ବାଧିନତା ସଂଗ୍ରାମୀଙ୍କ ସମ୍ନାନ କ୍ଷଣ୍ଣ ହେବ । ତେଣୁ ଏହି ବିଦ୍ୟାଳୟକୁ ମିଶ୍ରଣ କରା ନ ଯାଇ ସ୍ଥିତାଅବସ୍ଥା ବଜାଇ ରଖାଯିବା ନେଇ ଖବରଦାତା ସମ୍ମିଳନୀରେ ଦାବି କରାଯାଇଛି। ଏଥିପ୍ରତି ଶିକ୍ଷା ବିଭାଗ ଦୃଷ୍ଟି ନଦେଲେ କ୍ରାନ୍ତି ଦିବସରୁ ସରକାରଙ୍କ ବିରୋଧ ପ୍ରତିବାଦରେ ଅଭିଯାନ ଆରମ୍ଭ ହେବ। ଅକ୍ଟୋବର ୨ରେ କଳିଙ୍ଗନଗର ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯିବ। ଏଥିରେ ବ୍ୟାସନଗର ପୌର ପରିଷଦର ରାଜନେତା, ବୁଦ୍ଧିଜୀବୀ, ଆଇନଜୀବୀ, ସମାଜସେବୀ ସାମିଲ ହେବା ପାଇଁ ନିଷ୍ପତ୍ତି ନିଅଯାଇଥିବା ଖବରଦାତା ସମ୍ମିଳନୀରେ ସୂଚନା ଦିଆଯାଇଛି। ଶ୍ରମିକ ନେତା ବିଦ୍ୟାଧର ମହାନ୍ତି, ବରିଷ୍ଠ ଆଇନିଜିବୀ ତଥା ଭାଜପା ନେତା ଚନ୍ଦ୍ର ଶେଖର ପଣ୍ଡା, ରାଜ୍ୟ ଭାଜପା ଯୁବ ମୋର୍ଚ୍ଚା ସଂଯୋଜକ ଅଯୋଧ୍ୟା ଜେନା, ବିଶିଷ୍ଟ ଶିକ୍ଷାବିତ୍ ଆଶିଷ୍ ରାଏ, ପରମାନ୍ଦ ସେଠୀ ପ୍ରମୁଖ ଖବରଦାତା ସମ୍ମିଳନୀରେ ଯୋଗ ଦେଇଥିଲେ। ପ୍ରକାଶ ଯେ, ସ୍ଥାନୀୟ ସ୍ବାଧୀନତା ସଂଗ୍ରାମୀ ଡ. ଫନିପାଲ ବିଦ୍ୟାଳୟକୁ ରାଜ୍ୟ ସରକାର ୧୫ା୧୨ା୧୮ରେ ଶଶିଭୂଷଣ ବାଳିକା ଉଚ୍ଚ ବିଦ୍ୟାଳୟ ସହିତ ମିଶ୍ରଣ କରିବାକୁ ନର୍ଦ୍ଦେଶ ଦେଇଛନ୍ତି । ଏହାକୁ ଫନିପାଲ ସ୍ମୃତି ସଂସଦ ପକ୍ଷରୁ ବିରୋଧ କରାଯାଇଛି। ସ୍କୁଲର ନାମକୁ ପରିବର୍ତ୍ତନ ନ କାରାଯାଇ ଓ ମିଶ୍ରଣ ପ୍ରକ୍ରିୟାକୁ ବନ୍ଦ କରିବା ପାଇଁ ଯାଜପୁର ଜିଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି। ଏହି ବିଦ୍ୟାଳୟରେ ୨ ଶହ ଛାତ୍ରୀଛାତ୍ର ପାଠ ପଢୁଥିବାରୁ ବାଳିକା ଉଚ୍ଚ ବିଦ୍ୟାଳୟରେ ମିଶିବା ଯଥାର୍ଥ ନୁହେଁ ବୋଲି ଦାବି ପତ୍ରରେ ଉଲ୍ଲେଖ କରାଯାଇଥିଲା। ହେଲେ ବର୍ତ୍ତମାନ ପର୍ଯ୍ୟନ୍ତ କୌଣସି ପଦେକ୍ଷେପ ନିଆଯାଇ ପାରି ନ ଥିବା ସ୍ମୃତି ସଂସଦ ପକ୍ଷରୁ କୁହାଯାଇଛି।
