ଭୁବନେଶ୍ୱର,୨୨ା୭(ବ୍ୟୁରୋ): ପ୍ଲାଷ୍ଟିକ ଅଣ୍ଡା ବିକ୍ରି କରୁଥିବା ଅଭିଯୋଗରେ ନୟାପଲୀ ଥାନା ପୋଲିସ ଜଣେ ବ୍ୟବସାୟୀକୁ ଅଟକ ରଖିଛି। ଏପିରିକି ପୋଲିସ ତାଙ୍କୁ ପଚରାଉଚରା କରିବା ସହ ସେ ବିକ୍ରି କରୁଥିବା ଅଣ୍ଡାକୁ ଜବତ କରି ତଦନ୍ତ କରୁଛି। ଯୁବକ ଜଣକ ବିକ୍ରି କରୁଥିବା ଅଣ୍ଡା ପ୍ଲାଷ୍ଟିକ କି ନାହିଁ ତାହା ଜାଣିବାକୁ ପୋଲିସ ପରୀକ୍ଷା ପାଇଁ ପଠାଇଛି। ଯଦି ଅଣ୍ଡାଟି ପ୍ଲାଷ୍ଟିକ ହୋଇଥିବା ନେଇ ଜଣାପଡେ ତେବେ ଉକ୍ତ ବ୍ୟବସାୟୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ କହିଛି। ରବିବାର ଅପରାହ୍ନ ୪ଟାରେ ନୟାପଲୀ ଭିଆଇପି କଲୋନୀ ନିକଟରେ ଜଣେ ବ୍ୟକ୍ତି ଅଣ୍ଡା ବିକ୍ରି କରୁଥିଲେ। କେତେଜଣ ଲୋକ ତାଙ୍କଠାରୁ ସିଝା ଅଣ୍ଡା ଖାଇଥିଲେ ମଧ୍ୟ ତାହା ଛିଣ୍ଡି ନ ଥିଲା। ଏପରିକି ଅନ୍ୟମାନେ କିଣି ନେଇ ଘରେ ଖାଇଥିଲେ ମଧ୍ୟ ସମାନ ଅବସ୍ଥା ହେଉଥିବା ଅଭିଯୋଗ କରିଥିଲେ। ବ୍ୟବସାୟୀ ଜଣ ଲୋକଙ୍କୁ ଠକିବା ପାଇଁ ପ୍ଲାଷ୍ଟିକ ଅଣ୍ଡା ବିକ୍ରି କରୁଥିବା ଅଭିଯୋଗ କରିଥିଲେ। ସେଠାରେ ଗ୍ରାହକଙ୍କ ସହ ବେପାରୀଙ୍କର କିଛି ସମୟ ଯୁକ୍ତିତର୍କ ହୋଇଥିଲା। ଶେଷରେ ପୋଲିସ ସେଠାରେ ପହଞ୍ଚି ଉକ୍ତ ବ୍ୟବସାୟୀକୁ କାବୁ କରି ଥାନାକୁ ନେବା ସହ କେତେକ ଅଣ୍ଡାକୁ ଜବତ କରିଥିଲା।
