କୁଜଙ୍ଗ,୧୧ା୭(ସ୍ବ.ପ୍ର.): ପାରାଦୀପ ବନ୍ଦର ପକ୍ଷରୁ ଭୂତମୁଣ୍ଡାଇଠାରେ ୧୦ହଜାର ଟ୍ରକ୍ ରହଣୀ ପାଇଁ ଏକ ଟ୍ରକ୍ ଟର୍ମିନାଲ ନିର୍ମାଣ କରିବାକୁ ଉଦ୍ୟମ ଚାଲିଛି। ତେବେ ଏକ ଜନବସତି ଅଞ୍ଚଳରେ ଏଭଳି ଏକ ପ୍ରଦୂଷଣ ସୃଷ୍ଟିକାରୀ ପ୍ରକଳ୍ପ ନିର୍ମାଣକୁ ସ୍ଥାନୀୟ ଲୋକେ ଜୋରଦାର ବିରୋଧ କରିଛନ୍ତି। ଗତ ୮ ତାରିଖରେ ୫ ପଞ୍ଚାୟତର ସରପଞ୍ଚ ଓ ଗ୍ରାମବାସୀ କୁଜଙ୍ଗଠାରେ ଜିଲାପାଳଙ୍କ ଜନ ଅଭିଯୋଗ ଶୁଣାଣିରେ ଏହି ପ୍ରସଙ୍ଗରେ ଦାବିପତ୍ର ଦେଇଥିଲେ। ସେତେବେଳେ ଜିଲାପାଳ ସଂଗ୍ରାମ କେଶରୀ ମହାପାତ୍ର ଉକ୍ତ ସ୍ଥାନକୁ ନିଜେ ବୁଲି ଦେଖିବା ପରେ ବିଚାର କରିବେ ବୋଲି ପ୍ରତିଶ୍ରୁତି ଦେଇଥିଲେ। ତେବେ କେତେଜଣ ଠିକାଦାରଙ୍କ ଧମକଚମକୁ ନେଇ ଗ୍ରାମରେ ଉତ୍ତେଜନା ପ୍ରକାଶ ପାଇଛି। ପୋଲିସ ଫୋର୍ସ ମୁତୟନ କରାଯାଇ ବଳପୂର୍ବକ ଟ୍ରକ ଟର୍ମିନାଲ ନିର୍ମାଣ କରାଯିବ ବୋଲି ପ୍ରଚାର ହେବାରୁ ବୁଧବାର ଏଠାରେ ଜଟିଳ ପରିସ୍ଥିତି ସୃଷ୍ଟି ହୋଇଛି। ଭୂତମୁଣ୍ଡାଇ ପଞ୍ଚାୟତର ଶତାଧିକ ମହିଳା ଏନେଇ ବିକ୍ଷୋଭ ପ୍ରଦର୍ଶନ କରିବା ସହ ପ୍ରସ୍ତାବିତ ଟ୍ରକ୍ ଟର୍ମିନାଲ ସ୍ଥାନ ଓ ବଜାର ପାର୍ଶ୍ୱରେ ସଭା କରିଛନ୍ତି। କୌଣସି ଜଟିଳ ପରିସ୍ଥିତି ଆସିଲେ ମୁକାବିଲା କରାଯିବ ଓ ଆନ୍ଦୋଳନରେ ମହିଳାମାନେ ଆଗରେ ରହି ଲଢ଼େଇ କରିବେ ବୋଲି ଏଥିରେ ସଂକଳ୍ପ ନେଇଥିଲେ। ଭୂତମୁଣ୍ଡାଇ ପଞ୍ଚାୟତର ନାରିନେତ୍ରୀ ସୌଦାମିନୀ ସ୍ବାଇଁ ମହିଳାମାନଙ୍କୁ ସଂକଳ୍ପ କରାଇ ନିର୍ମାଣ କାର୍ଯ୍ୟ ଚାଲିଲେ ବିରୋଧ କରାଯିବ ଓ ମାଟିଗୋଡ଼ି ପକାଇ ଦିଆଯିବ ନାହିଁ ବୋଲି ଘୋଷଣା କରିଥିଲେ। ପରେ ମହିଳାମାନେ ଭୂତମୁଣ୍ଡାଇ ସରପଞ୍ଚ ଜ୍ୟୋତିର୍ମୟୀ ସ୍ବାଇଁଙ୍କ ନେତୃତ୍ୱରେ ଏକ ଶୋଭାଯାତ୍ରାରେ ବାହାରି ପଡ଼ିଆଠାରେ ବିକ୍ଷୋଭ ପ୍ରଦର୍ଶନ କରିଥିଲେ। ବିଶ୍ୱାଳି ପଞ୍ଚାୟତର ସରପଞ୍ଚ ସୁପ୍ରଭା ସାହୁ, ସମିତି ସଭ୍ୟ ରଞ୍ଜନ ସେଠୀ, ଆଲୋକ ସାହୁ, ସୁନ୍ଦରମଣି ସ୍ବାଇଁ, ଅରକ୍ଷିତ ଦାସ, ଦୁଷ୍ମନ୍ତ ମାଝି, ରଞ୍ଜିତା ପଣ୍ଡା, ଅରକ୍ଷିତ ଦାସ, ଦେବବାଳା ମହାପାତ୍ର, ପ୍ରମୋଦ ଜେନା ଓ ଶାରଦା ପ୍ରସନ୍ନ ଦାସ ପ୍ରମୁଖ ବକ୍ତବ୍ୟ ପ୍ରଦାନ କରିଥିଲେ। ସ୍ଥାନୀୟ ଅଞ୍ଚଳବାସୀଙ୍କୁ ନେଇ ଗଠିତ ଆଞ୍ଚଳିକ ସୁରକ୍ଷା ସମିତିର ମୁଖପାତ୍ର ଶ୍ରୀବଲ୍ଲଭ କର ଏହାକୁ ସଞ୍ଚାଳନା କରିଥିଲେ। ପୂର୍ବତନ ସରପଞ୍ଚ ସଞ୍ଜୟ ସ୍ବାଇଁ ଧନ୍ୟବାଦ ଦେଇଥିଲେ। ସୂଚନାଯୋଗ୍ୟ, ୨୦୧୨ରେ ପିଡିଏ (ପାରାଦୀପ ଡେଭଲପମେଣ୍ଟ ଅଥରିଟି) ପକ୍ଷରୁ ଆଖପାଖ ୫ ପଞ୍ଚାୟତର ନେତୃତ୍ୱଙ୍କୁ ନେଇ ସଭା କରାଯାଇଥିଲା। ସରକାରୀ ନକ୍ସା ମୁତାବକ ଯେଉଁ ସ୍ଥାନରେ ଟ୍ରକ ଟର୍ମିନାଲ ନିର୍ମାଣ ସେତେବେଳେ ନିଷ୍ପତ୍ତି ହୋଇଥିଲା, ବର୍ତ୍ତମାନ ବନ୍ଦର କର୍ତ୍ତୃପକ୍ଷ ସେହି ସ୍ଥାନରେ ନିର୍ମାଣ ନ କରି ଏକ ଜନବସତି ଅଞ୍ଚଳକୁ ଚିହ୍ନଟ କରିଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି।