ଭଦ୍ରକ ଅଫିସ,୧୬ା୧୦- ଭଦ୍ରକ ଜିଲା ମୁଖ୍ୟ ଚିକିତ୍ସାଳୟ ବାରଣ୍ଡାରେ ସୋମବାର ଜଣେ ପ୍ରସୂତି ପିଲା ଜନ୍ମ କରିବା ଘଟଣାପରେ ମଙ୍ଗଳବାର ଭାଜପା ମହିଳା ମୋର୍ଚ୍ଚାର ଏକ ପ୍ରତିନିଧି ଦଳ ପ୍ରସୂତିଙ୍କୁ ଭେଟି ଫେରିଛନ୍ତି। ସେମାନେ ଜିଲା ମୁଖ୍ୟ ଚିକିତ୍ସାଳୟକୁ ଯାଇ ସେଠାରେ ସମ୍ପୃକ୍ତା ମହିଳାଙ୍କୁ ଭେଟି ତାଙ୍କର ଏବଂ ଜନ୍ମିତ ଶିଶୁଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଥିଲେ। ଏଥିସହ କିଭଳି ପରିସ୍ଥିତିରେ ବିଭାଗୀୟ ଡାକ୍ତର ଆସନ୍ନ ପ୍ରସବା ରାନୁଲତା ଖିଲାରଙ୍କୁ ଚିକିତ୍ସା କରିବା ବଦଳରେ କଟକ ପଠାଇବାକୁ ନିର୍ଦ୍ଦେଶ ଦେଲେ ସେ ବିଷୟରେ ସୂଚନା ସଂଗ୍ରହ କରିଥିଲେ। ପରେ ଟିମ୍ର ସଦସ୍ୟାମାନେ ସିଡିଏମ୍ଓ ଡା. ଆର୍ଯ୍ୟ ମିଶ୍ରଙ୍କୁ ଭେଟି ପୂରା ଘଟଣାକ୍ରମ ନେଇ ଆଲୋଚନା କରି ରୋଗୀକୁ ସର୍ବନିମ୍ନ ଚିକିତ୍ସା ସୁବିଧା ଦିଆ ନ ଯିବା ଏବଂ ଗର୍ଭବତୀ ମହିଳା ଓ୍ବାର୍ଡ ବାରଣ୍ଡାରେ ପିଲା ଜନ୍ମ ଦେବା ସମୟରେ କୌଣସି ଡାକ୍ତର କିମ୍ବା ନର୍ସ ସହାୟତା କରିବାକୁ ଆଗେଇ ନ ଆସିବା ନେଇ ଉଦ୍ବେଗ ପ୍ରକାଶ କରିଥିଲେ। ସ୍ବାସ୍ଥ୍ୟସେବା ବ୍ୟବସ୍ଥା କ୍ଷେତ୍ରରେ ଏଭଳି ଅପରିଣାମଦର୍ଶୀ କାର୍ଯ୍ୟ ଗ୍ରହଣୀୟ ନୁହେଁ ବୋଲି ସେମାନେ ଦର୍ଶାଇଥିଲେ। ଭାଜପା ମହିଳା ମୋର୍ଚ୍ଚାର ରାଜ୍ୟ ସଭାନେତ୍ରୀ ପ୍ରଭାତୀ ପରିଡ଼ା ଏବଂ ଜିଲା ସଭାନେତ୍ରୀ ମନସ୍ମିତା ଖୁଣ୍ଟିଆଙ୍କ ନିର୍ଦ୍ଦେଶ କ୍ରମେ ମେଡିକାଲକୁ ଯାଇଥିବା ପ୍ରତିନିଧି ଦଳରେ ଜିଲା ଉପସଭାନେତ୍ରୀ ଜିଲା ପରିଷଦ ସଭ୍ୟା ଉମାମଣି ସାହୁ, ସୁମିତ୍ରା ପାଣି, ସାଧାରଣ ସମ୍ପାଦିକା ମନୋରମା ପାତ୍ର, ପୁଷ୍ପାଞ୍ଜଳି ବେହେରା, ଆଇଟିସେଲର ସଂଯୋଜିକା ତପସ୍ବିନୀ ମହାପାତ୍ର, ନଗର ସଭାନେତ୍ରୀ ଉର୍ମିଳା ସାହୁ, ଉପସଭାନେତ୍ରୀ ପଦ୍ମିନୀ ଦ୍ୱିବେଦୀ ପ୍ରମୁଖ ସାମିଲ ଥିଲେ। ଭଦ୍ରକ ଜିଲା ଭାଜପା ସଭାପତି ବଦ୍ରି ନାରାୟଣ ଧଳ ଏହି ଗସ୍ତ ସମୟରେ ଉପସ୍ଥିତ ଥିଲେ।
