ଢେଙ୍କାନାଳ ଅଫିସ, ୧୮।୬ (ରତନ ନାୟାର): ଭାବର ଠାକୁର ସେ। ଭକ୍ତର ଭଗବାନ ବି। ଭାଗ୍ୟରେ ଥିଲେ ମିଳେ ବିଶ୍ୱନିୟନ୍ତାଙ୍କ ସେବା କରିବାର ସୁଯୋଗ। ରସିକରାଜଙ୍କ କମନୀୟ ରୂପକୁ ଦେଖିବାକୁ ବିଶ୍ୱବାସୀ ବ୍ୟାକୁଳ ହେଉଥିବାବେଳେ ମହାପ୍ରଭୁଙ୍କ ଏହି ସୂକ୍ଷ୍ମକାର୍ଯ୍ୟକୁ ନିଷ୍ଠାର ସହ କରିବାର ସୌଭାଗ୍ୟ ଜୁଟିଥାଏ ମାତ୍ର କେତେଜଣଙ୍କୁ। ବିଶ୍ୱନିୟନ୍ତାଙ୍କୁ ରଙ୍ଗତୂଳୀରେ ସଜାଉଥିବା ଏଭଳି ଜଣେ ରୂପକାର ସେବକ ହେଉଛନ୍ତି ଢେଙ୍କାନାଳ ଜିଲାର ବିଜୟ ମହାପାତ୍ର। ଅନବସର ସମୟରେ ଠାକୁରଙ୍କ ଗୁପ୍ତନୀତି ହେଉ ଅବା ଶ୍ରୀମୁଖ ଶୃଙ୍ଗାର ସବୁକାମକୁ ସେ କରିଆସୁଛନ୍ତି ନିଷ୍ଠାପର ଭାବରେ। ଦୀର୍ଘ ୫୦ ବର୍ଷ ଧରି ଏହି କାମରେ ନିଜକୁ ସମର୍ପି ଦେଇଛନ୍ତି ସେ। ପାଉଣା ନୁହେଁ, ଠାକୁରଙ୍କ ପ୍ରସାଦ ଟିକିଏ ମିଳିଗଲେ ସେତିକି ଯଥେଷ୍ଟ ବୋଲି କହିଛନ୍ତି ବିଜୟ।
ଓଡ଼ାପଡ଼ା ବ୍ଲକ ପଞ୍ଚୁପଟି ଗ୍ରାମରେ ସପରିବାର ରୁହନ୍ତି ବିଜୟ। ବୟସ ୬୦ ଟପିଲାଣି। ତଥାପି ସେ ବେଶ୍ ଚଳଚଞ୍ଚଳ। ତାଙ୍କ ହାତର ରଙ୍ଗତୂଳୀ କଥାକୁହେ। ଦୀର୍ଘ ୫୦ ବର୍ଷ ହେଲା ସେ ଏବଂ ତାଙ୍କ ବଂଶଜ ମହାପ୍ରଭୁ ବଳରାମଙ୍କ ସେବାରେ ନିଜକୁ ସମର୍ପଣ କରିଦେଇଛନ୍ତି। ଅଣସର ଘରେ ମହାପ୍ରଭୁଙ୍କ ଗୁପ୍ତନୀତି ସମ୍ପନ୍ନ କରିବା ବେଳେ ତାଙ୍କ କାନ୍ଧରେ ଥାଏ ଗୁରୁଦାୟିତ୍ୱ। ରାଜରାଜୁଡ଼ା ଅମଳରୁ ପିଢ଼ି ପରେ ପିଢ଼ି ଧରି ବିଜୟଙ୍କ ପରିବାର ଏହି କାମ କରି ଆସୁଛନ୍ତି। ସେହିପରି ମନ୍ଦିର ବାହାରେ ଝୁଲଣ ଘରେ ଅଞ୍ଚଳବାସୀଙ୍କ ଘରେ ପୂଜା ପାଉଥିବା ଚତୁର୍ଦ୍ଧା ବିଗ୍ରହଙ୍କୁ ସେ ନୂଆରଙ୍ଗରେ ସଜାଇଥାନ୍ତି। ଏହି କାର୍ଯ୍ୟ ଲାଗି ସେ ପ୍ରାପ୍ୟ ନେଇଥାନ୍ତି। ଏ ସମ୍ପର୍କରେ ବିଜୟ କୁହନ୍ତି, ୧୦ବର୍ଷର ହୋଇଥିବାବେଳେ ବାପାଙ୍କ ସହ ଆସି ଏହି କାର୍ଯ୍ୟ କରୁଥିଲେ। ଭାଇ, ପୁତୁରାମାନେ ମଧ୍ୟ ମହାପ୍ରଭୁଙ୍କ ସେବାରେ ଲାଗିଛନ୍ତି। ଦେବୋତ୍ତର ବିଭାଗ ତରଫରୁ ତାଙ୍କ ପରିବାରକୁ ଦାୟିତ୍ୱ ମିଳିଛି। ଅନବସର ନୀତି ଆରମ୍ଭ ହେଲେ ସେ ଏବଂ ତାଙ୍କ ସହଯୋଗୀମାନେ ମନ୍ଦିରକୁ ଆସିଥାନ୍ତି। ନୀତି ଶେଷ ନ ହେବା ଯାଏ କେହି ବାହାରକୁ ଆସନ୍ତି ନାହିଁ। ମନ୍ଦିର ଭିତରେ ରହି ପ୍ରସାଦ ସେବନ କରିଥାନ୍ତି। ଚଳିତ ବର୍ଷ କରୋନା ପାଇଁ ସରକାରଙ୍କ ନିୟମ ଅନୁଯାୟୀ ମାସ୍କ ପିନ୍ଧି ଶ୍ରୀଜୀଉଙ୍କ ନୀତି ଚାଲିଛି। ବର୍ଷକୁ ଥରେ ବଡ଼ ଠାକୁରଙ୍କ ସେବା କରିବା ସୌଭାଗ୍ୟର ବିଷୟ। ବୁଧବାର ଖଳିଲାଗି ଏକାଦଶୀ ନୀତି ଯଥାବିଧି ଶେଷ ହୋଇଛି। ୨୧ରେ ସୂର୍ଯ୍ୟୋପରାଗ ପଡୁଥିବାରୁ ଏହାର ଦିନକ ପୂର୍ବରୁ ୨୦ ତାରିଖରେ ନେତ୍ରୋତ୍ସବ ଅନୁଷ୍ଠିତ ହେବ ବୋଲି ସେ ସୂଚନା ଦେଇଛନ୍ତି।
ଭାବରେ ହୋଇଛି ବନ୍ଧା: ବିଜୟ
୪ବର୍ଷ ତଳର କଥା। ଅଣସର ଘରେ ମହାପ୍ରଭୁ ଶ୍ରୀବଳରାମଙ୍କ ଡାହାଣ ହାତରେ ବଜ୍ରଲେପନ ଦେଉଥିବା ବେଳେ ଅସହ୍ୟ ଗରମ ହେଉଥିଲା। ଏହି ସମୟରେ ଠାକୁରଙ୍କୁ ଦୁଃଖ ଜଣାଇ ହାତ ଟେକିଦେଲୁ। ଏହାର କିଛି ସମୟ ମଧ୍ୟରେ ହଠାତ୍ ମୁଷଳ ଧାରାରେ ବର୍ଷା ଆରମ୍ଭ ହେଲା। ପରିବେଶ ଥଣ୍ଡା ହୋଇଗଲା। ଏହି ଅନୁଭୂତି ଭାବିଲା ବେଳେ ଆଖିରେ ଲୁହ ଜକେଇ ଆସେ। ମହାପ୍ରଭୁଙ୍କ ଭାବରେ ବନ୍ଧା ହୋଇଛି। ଜୀବନ ଥିବା ଯାଏ ତାଙ୍କରି ସେବା କରୁଥିବି।
