ନୂଆଦିଲ୍ଲୀ,୨୮।୩:ଆଇପିଏଲ ୨୦୨୬ରେ ବୈଭବ ସୂର୍ଯ୍ୟବଂଶୀ ତାଙ୍କ ବିସ୍ଫୋରକ ବ୍ୟାଟିଂରେ ସମସ୍ତଙ୍କୁ ଆଶ୍ଚର୍ଯ୍ୟ କରୁଛନ୍ତି। ପଡିଆ ବାହାରେ ମଧ୍ୟ ତାଙ୍କର ଲୋକପ୍ରିୟତା ସ୍ପଷ୍ଟ ଦେଖାଯାଉଛି। ପ୍ରଶଂସକମାନେ ବୈଭବଙ୍କ ସହ ଏକ ଫଟୋ ଉଠାଇବାକୁ ଆଗ୍ରହୀ ଦେଖାଯାଉଛନ୍ତି। କିନ୍ତୁ ବୈଭବ ସେମାନଙ୍କ ସହିତ ଏକ ଫଟୋ ଉଠାଇବା ପାଇଁ ଟଙ୍କା ଦାବି କରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛନ୍ତି। ଅନଲାଇନରେ ପ୍ରସାରିତ ଏକ ଭିଡିଓରେ ବୈଭବ ପ୍ରଶଂସକମାନଙ୍କୁ ଏକ ଫଟୋ ବଦଳରେ ଟଙ୍କା ମାଗୁଥିବାର ଦେଖାଯାଉଛି।
ନିକଟରେ ୨ ଜଣ ଫ୍ୟାନ୍ ବୈଭବଙ୍କ ସହ ଫଟୋ ଉଠାଇବାକୁ ଅନୁରୋଧ କରିଥିଲେ। ଏହା ଶୁଣି ବୈଭବ ତାଙ୍କୁ ୧୦୦ ଟଙ୍କା ଦେଲେ ଫଟୋ ଉଠେଇବି ବୋଲି କହିଥିଲେ। ତାଙ୍କ କଥା ଶୁଣି ଯୁବ ପ୍ରଶଂସକମାନେ ଟଙ୍କା ଦେବାକୁ ପ୍ରସ୍ତୁତ ଥିଲେ। ଦୁଇ ଜଣ ପ୍ରଶଂସକ ଫଟୋ ପାଇଁ ୨୦୦ ନୋଟ ମଧ୍ୟ ବାହାର କରିଥିଲେ। ପରବର୍ତ୍ତୀ ସମୟରେ ବୈଭବ ପ୍ରଶଂସକମାନଙ୍କୁ କହିଥିଲେ ଯେ, ସେ କେବଳ ମଜା କରୁଥିଲେ। ରାଜସ୍ଥାନ ରୟାଲ୍ସ ଭିଡିଓଟିକୁ ସୋସିଆଲ ମିଡିଆରେ ଶେୟାର କରିଛି।
ଚଳିତ ସିଜିନରେ ବୈଭବଙ୍କ ପ୍ରଦର୍ଶନ ଚମତ୍କାର ଠାରୁ କମ ନୁହେଁ। ୮ଟି ମ୍ୟାଚରେ ୮ଟି ଇନିଂସରେ ସେ ୪୪.୬୨ ହାରରେ ଏବଂ ୨୩୪.୮୭ ଷ୍ଟ୍ରାଇକ ରେଟରେ ୩୫୭ ରନ କରିଛନ୍ତି। ଏଥିରେ ସେ ଗୋଟିଏ ଶତକ ଏବଂ ଦୁଇଟି ଅର୍ଦ୍ଧଶତକ ମାରିଛନ୍ତି।
ସୂଚନାଯୋଗ୍ୟ ଯେ ବୈଭବ ସୂର୍ଯ୍ୟବଂଶୀ ତାଙ୍କ IPL କ୍ୟାରିଅରରେ ଏପର୍ଯ୍ୟନ୍ତ ୧୫ଟି ମ୍ୟାଚ ଖେଳିଛନ୍ତି। ଏହି ମ୍ୟାଚରେ ୧୫ଟି ଇନିଂସରେ ବ୍ୟାଟିଂ କରି, ସେ ୪୦.୬୦ ହାରରେ ଏବଂ ୨୨୨.୨୬ ଷ୍ଟ୍ରାଇକ ରେଟରେ ୬୦୯ ରନ ସଂଗ୍ରହ କରିଛନ୍ତି। ତାଙ୍କ ସ୍କୋରରେ ଦୁଇଟି ଶତକ ଏବଂ ତିନୋଟି ଅର୍ଦ୍ଧଶତକ ସାମିଲ ଅଛି। ତାଙ୍କର ସର୍ବାଧିକ ସ୍କୋର ୧୦୩ ରନ।
ଉଲ୍ଲେଖଯୋଗ୍ୟ ଯେ, ବୈଭବ ପୂର୍ବ ସିଜିନରେ ବିଶେଷକରି ୨୦୨୫ରେ ରାଜସ୍ଥାନ ରୟାଲ୍ସ ପାଇଁ ଖେଳୁଥିବା ସମୟରେ ତାଙ୍କର ଆଇପିଏଲ ଡେବ୍ୟୁ କରିଥିଲେ। ରାଜସ୍ଥାନ ବୈଭବଙ୍କୁ ୧.୧୦ କୋଟି ମୂଲ୍ୟରେ କିଣିଥିଲା।