ଇକାଟେରିନବର୍ଗ(ରୁଷିଆ),୨୦।୯(ପିଟି): ଏସିଆନ ଚାମ୍ପିୟନ ଅମିତ ପଙ୍ଘାଲ (୫୨ କେଜି) ଶୁକ୍ରବାର ପ୍ରଥମ ଭାରତୀୟ ବକ୍ସର ଭାବେ ବିଶ୍ୱ ପୁରୁଷ ବକ୍ସିଂ ଚାମ୍ପିୟନଶିପ ଫାଇନାଲରେ ପ୍ରବେଶ କରିଛନ୍ତି। ସେମିଫାଇନାଲ କାଜାଖସ୍ତାନର ସାକେନ ବିବୋସିନୋଭଙ୍କୁ ହରାଇ ଦେଇଛନ୍ତି। ଦ୍ୱିତୀୟ ସିଡ୍ ପଙ୍ଘାଲ ୩-୨ ବ୍ୟବଧାନରେ ମ୍ୟାଚ୍କୁ ଜିତି ନେଇଛନ୍ତି। ସେ ଫାଇନାଲରେ ଉଜବେକିସ୍ତାନର ଶାଖୋବିଦିନ ଜୋଇରୋଭଙ୍କୁ ଭେଟିବେ। ଅନ୍ୟ ଏକ ସେମିଫାଇନାଲରେ ଜୋଇରୋଭ ଫ୍ରାନ୍ସର ବିଲାଲ ବେନ୍ନାମାଙ୍କୁ ପରାସ୍ତ କରିଥିଲେ। ପଙ୍ଘାଲଙ୍କ ଅଭିଯାନ ୨୦୧୭ରୁ ଏସିଆନ୍ ଚାମ୍ପିୟନଶିପରୁ ଆରମ୍ଭ ହୋଇଛି। ସେହିବର୍ଷ ବିଶ୍ୱ ଚାମ୍ପିୟନଶିପ୍ରେ ପଦାର୍ପଣ କରି ସେ କ୍ୱାର୍ଟର ଫାଇନାଲରେ ପ୍ରବେଶ କରିଥିଲେ। ଏହାପରେ ସମ୍ମାନଜନକ ଷ୍ଟ୍ରାଣ୍ଡଜା ସ୍ମାରକୀ ଟୁର୍ନାମେଣ୍ଟ (ବୁଲଗେରିଆ) ଓ ପରେ ୨୦୧୮ ଏସିଆନ୍ ଗେମ୍ସରେ ସ୍ବର୍ଣ୍ଣ ପଦକ ଜିତିଥିଲେ। ଅଲିମ୍ପିକ୍ସ ବକ୍ସିଂ ଇଭେଣ୍ଟର ବିଭିନ୍ନ ଓଜନ ବର୍ଗରୁ ୪୯ କେଜି ବର୍ଗ ବାଦ୍ ପଡ଼ିବା ପରେ ସେ ୫୨ କେଜି ବର୍ଗରେ ପ୍ରତିଦ୍ୱନ୍ଦ୍ୱିତା ଆରମ୍ଭ କରିଥିଲେ। ଚଳିତବର୍ଷ ସେ ନୂଆ ଓଜନ ବର୍ଗରେ ଏସିଆନ ଚାମ୍ପିୟନଶିପ୍ ସ୍ବର୍ଣ୍ଣ ପଦକ ଜିତି ସାରିଛନ୍ତି। ଉଲ୍ଲେଖଥାଉ କି, ବିଶ୍ୱ ଚାମ୍ପିୟନଶିପ୍ର କୌଣସି ସଂସ୍କରଣରେ ଭାରତ ଗୋଟିଏ ବ୍ରୋଞ୍ଜ ପଦକରୁ ଅଧିକ ଜିତି ପାରିନାହିଁ। ଫାଇନାଲରେ ପଙ୍ଘାଲ ଓ ସେମିଫାଇନାଲରେ ମନୀଷ କୌଶିକ (୬୩ କେଜି) ପ୍ରବେଶ କରି ଇତିହାସ ରଚିଛନ୍ତି। ଏଥିପୂର୍ବରୁ ବିଜେନ୍ଦର ସିଂ (୨୦୦୯), ବିକାଶ କ୍ରିଷ୍ଣନ (୨୦୧୧), ଶିବା ଥପ୍ପା (୨୦୧୫) ଓ ଗୌରବ ବିଧୁରି (୨୦୧୭) ବିଶ୍ୱ ଚାମ୍ପିୟନଶିପ୍ରେ ବ୍ରୋଞ୍ଜ ପଦକ ଜିତିଛନ୍ତି।
