ମୁମ୍ବାଇ: ବଲିଉଡ୍ ଅଭିନେତ୍ରୀ ଆଲୟା ଫର୍ନିଚରଓ୍ବାଲା ଏବେ ଖୁବ୍ ବିଜି ରହୁଛନ୍ତି। ମାସକ ତଳେ ରିଲିଜ୍ ହୋଇଥିବା ଫିଲ୍ମ ‘ଜଓ୍ବାନୀ ଜାନେମନ୍’ରେ ପୂଜା ବେଦୀଙ୍କ ଝିଅ ଆଲୟା ନିଖୁଣ ଅଭିନୟ କରି ଦର୍ଶକଙ୍କ ହୃଦୟ ଜିତି ଯାଇଛନ୍ତି।
ଏକ ସାକ୍ଷାତକାରରେ ଆଲୟା କହିଛନ୍ତି, ମୋତେ ଲୋକଙ୍କ ପ୍ରଶଂସା ବହୁତ ଖୁସି ଦେଇଛି। ନିତିନ୍ କକ୍କରଙ୍କ ଦ୍ୱାରା ନିର୍ଦ୍ଦେଶିତ ତଥା ଲଣ୍ଡନର ପୃଷ୍ଠଭୂମି ଉପରେ ଆଧାରିତ ଏହି ଫିଲ୍ମକୁ ପୂଜା ଏଣ୍ଟରଟେନ୍ମେଣ୍ଟରେ ପ୍ରସ୍ତୁତ କରାଯାଇଥିଲା। ୩୧ ଜାନୁୟାରୀରେ ରିଲିଜ୍ ହୋଇଥିବା ଫିଲ୍ମଟି ଭାରତରେ ଗୋଟିଏ ସପ୍ତାହରେ ପ୍ରାୟ ୨୦ କୋଟି ଟଙ୍କାର ବ୍ୟବସାୟ କରିଥିଲା। ଏହା ପରଠାରୁ ଆଲୟାଙ୍କ ନିକଟକୁ ଅଫର ଉପରେ ଅଫର ଆସୁଛି। ତେଣୁ କେଉଁ ଫିଲ୍ମରେ ଅଭିନୟ କରିବେ ସେ ସମ୍ପର୍କରେ କିଛି ନିଷ୍ପତ୍ତି ନେଇନାହାନ୍ତି। ଏବେ ସିନା ଆଲୟାଙ୍କ ନିକଟକୁ ଏତେ ଅଫର ଆସୁଛି ମାତ୍ର ପ୍ରଥମ ଫିଲ୍ମରେ ଅଭିନୟ କରିବା ତାଙ୍କ ପାଇଁ ବହୁ କଷ୍ଟକର ଥିଲା। ଯେତେବେଳେ ଦର୍ଶକେ ତାଙ୍କୁ ପସନ୍ଦ କରୁ ନ ଥିଲେ ସେ ନିରାଶ ହୋଇପଡୁଥିଲେ। ତେଣୁ ସେ ଚିନ୍ତା କଲେ ଯଦି ଜଣେ ପ୍ରଯୋଜକ ଗୋଟିଏ ଗୋଟିଏ ଫିଲ୍ମରେ କୋଟିକୋଟି ଟଙ୍କା ଖର୍ଚ୍ଚ କରିପାରୁଛନ୍ତି ସେ କାହିଁକି ଅଭିନୟ କରି ପରିଶ୍ରମର ମୂଲ୍ୟ ଉଠାଇ ନ ପାରିବେ। ତା’ ପରେ କାମରେ ଧ୍ୟାନ ଦେଲେ। ଯାହାର ଉଦାହରଣ ‘ଜଓ୍ବାନୀ ଜାନେମନ୍’। ଫିଲ୍ମଟି ତାଙ୍କୁ ବହୁତ ସଫଳତା ଆଣିଦେଲା।
