ଲଣ୍ଡନ,୨୩।୫(ପି.ଟି.)- ନିଜ ନୂଆ ବହି ‘ବୋଲ. ସ୍ଲିପ୍. ରିପିଟ୍’ରେ ଇଂଲଣ୍ଡର ସର୍ବାଧିକ ଟେଷ୍ଟ ଉଇକେଟ ହାସଲକାରୀ ଦ୍ରୁତ ବୋଲର ଜେମ୍ସ ଆଣ୍ଡରସନ ଏକ ମଜାଦାର କଥା ଉଲ୍ଲେଖ କରିଛନ୍ତି। ସାଥୀ ଦ୍ରୁତ ବୋଲର ଷ୍ଟୁଆର୍ଟ ବ୍ରଡଙ୍କୁ ପ୍ରଥମ ଦେଖାରେ ସେ ଅଲଗା ଭାବିଥିଲେ। ସେ ବ୍ରଡଙ୍କୁ ଜଣେ ସୁନ୍ଦରୀ ତରୁଣୀ ଭାବିନେଇଥିଲେ। ବ୍ରଡଙ୍କ ନୀଳ ଆଖି, ସୁନେଲୀ କେଶ ଓ ସୁନ୍ଦର ଚେହେରା ଆଣ୍ଡରସନଙ୍କୁ ଭ୍ରମରେ ପକାଇଥିଲା।
୩୬ ବର୍ଷୀୟ ଆଣ୍ଡରସନ ଏପର୍ଯ୍ୟନ୍ତ ୧୪୮ଟି ଟେଷ୍ଟ ଖେଳି ୫୭୫ଟି ଉଇକେଟ ହାସଲ କରି ଇଂଲଣ୍ଡର ସଫଳତମ ଟେଷ୍ଟ ବୋଲର ସାବ୍ୟସ୍ତ ହୋଇଛନ୍ତି। ସେହିପରି ଏକ ଟିମ୍ ବୈଠକରେ କୋଚ୍ ଆଣ୍ଡି ଫ୍ଲାଓ୍ବାର କିଛି କହୁଥିବା ବେଳେ ଅଫ୍ ସ୍ପିନର ଗ୍ରେମ୍ ସ୍ବାନ ଜୋରରେ ପାଡିବା କଥା ମଧ୍ୟ ସେ ତାଙ୍କ ବହିରେ ଉଲ୍ଲେଖ କରିଛନ୍ତି।
ଏତେ ଜୋରରେ ଓ ଶବ୍ଦରେ କୌଣସି ବ୍ୟକ୍ତି ପାଡିବାର ମୁଁ ପୂର୍ବରୁ କେବେ ଶୁଣି ନ ଥିଲି। ଫଳରେ ପ୍ଲାଓ୍ବାର ସ୍ବାନଙ୍କ ଆଡକୁ ଅନାଇଥିଲେ ଓ ସ୍ବାନ ଅବଶ୍ୟ ଏଥିପାଇଁ ସରି କହିଥିଲେ। ଏହା ମୋ ନିୟନ୍ତ୍ରଣରେ ନ ଥିଲା ବୋଲି ସ୍ବାନ କହିଥିଲେ।
ବ୍ରଡ ଓ ମୁଁ ୧,୦୦୦ ଉଇକେଟ ହାସଲ କରିଛୁ। ଆମ ଦୁହିଙ୍କ ବୋଲିଂ କୌଶଳ ଭିନ୍ନ। ତେଣୁ ଆମ ଭିତରେ ପ୍ରତିଯୋଗିତା ହୋଇ ନ ଥାଏ। ଆମ ଦୁହିଙ୍କ ଯୋଡି ବେଶ୍ ସଫଳ ଥିଲା। ବୋଲିଂ କଲାବେଳେ ଆମ ପରସ୍ପରର ପରାମର୍ଶ ନେଉଥିଲୁ। କଣ କରିବାକୁ ହେବ ଓ କ’ଣ ନ କରିବାକୁ ହେବ ସେ ନେଇ ଆଲୋଚନା କରୁଥିଲୁ ବୋଲି ଆଣ୍ଡରସନ ଉଲ୍ଲେଖ କରିଛନ୍ତି। ୨୦୧୪ରେ ଓଲ୍ଡ ଟ୍ରାଫର୍ଡରେ ଖେଳାଯାଇଥିବା ଭାରତ ବିପକ୍ଷ ଏକ ମ୍ୟାଚ୍ରେ ବ୍ରଡଙ୍କ ମୁହଁରେ ବଲ୍ ବାଜିଥିଲା। ଏହାପରେ ସେ ସ୍ବପ୍ନରେ ବଲ ତାଙ୍କ ଆଡକୁ ଉଡି ଆସୁଥିବା ଦେଖିଥିଲେ। ସାଧାରଣତଃ ବ୍ରଡଙ୍କୁ ଅଳସୁଆ ବୋଲି କେତେକ ଭାବିଥାନ୍ତି। କିନ୍ତୁ ପ୍ରକୃତରେ ବ୍ରଡ କଠିନ ପରିଶ୍ରମୀ ଥିଲେ। ଏହିଭଳି କେତକେ ଗୁରୁତ୍ୱପୂର୍ଣ୍ଣ ତଥା ମଜାଦାର କଥା ଆଣ୍ଡରସନ ତାଙ୍କ ବହିରେ ଉଲ୍ଲେଖ କରିଛନ୍ତି।
