ବମ୍ବେ: ପ୍ରଥମ ଦେଖାରେ ପ୍ରେମ। ଏଭଳି କିଛି ଘଟିଛି ବଲିଉଡ୍ ଅଭିନେତା ରାଜକୁମାର ରାଓଙ୍କ କ୍ଷେତ୍ରରେ। ଏକ ବିଜ୍ଞାପନ ଶୁଟିଂ ସମୟରେ ଅନ୍ବିତା ପଲ୍ ଓରଫ ପତ୍ରଲେଖାଙ୍କୁ ଭେଟିଥିଲେ ସେ। ପ୍ରଥର ଦେଖାରେ ହିଁ ରାଜକୁମାର ତାଙ୍କ ପ୍ରେମରେ ପଡ଼ିଯାଇଥିଲେ। କେବଳ ଏତିକି ନୁହେଁ ବିବାହ କରିବାକୁ ମଧ୍ୟ ଇଚ୍ଛା କରିଥିଲେ। ୨୦୧୪ରେ ଉଭୟ ଫିଲ୍ମ ସିଟି ଲାଇଫ୍ରେ ସେମାନେ ଅଭିନୟ କରିଥିଲେ। ବାସ୍ ଏହା ପରେ ଉଭୟଙ୍କ ମଧ୍ୟରେ ସମ୍ପର୍କ ଆହୁରି ନିବିଡ଼ ହୋଇଯାଇଥିଲା। ଏବେ ସେମାନେ ବି-ଟାଉନ୍ର ଚର୍ଚ୍ଚିତ ଯୋଡ଼ିମାନଙ୍କ ମଧ୍ୟରୁ ଗୋଟିଏ କହିଲେ ଅତ୍ୟୁକ୍ତି ହେବ ନାହିଁ।
ହରିୟାଣାର ଗୁରୁଗାଓଁରେ ରାଜକୁମାରଙ୍କ ଜନ୍ମ। ସେ ଦଶମ ଶ୍ରେଣୀରେ ପଢ଼ୁଥିବା ବେଳେ ଅଭିନୟ ପ୍ରତି ଆକର୍ଷିତ ହୋଇଥିଲେ। ପରେ ସେ ଗୁରୁଗାଓଁରୁ ଦିଲ୍ଲୀ ଆସିଥିଲେ। ଦୁଇ ବର୍ଷ ଅଭିନୟରେ ଡିପ୍ଲୋମା କରିବା ପରେ ୨୦୦୮ରେ ବମ୍ବେ ଆସିଥିଲେ। ପ୍ରାରମ୍ଭିକ ସମୟରେ ରାଜକୁମାରଙ୍କୁ ବହୁତ କଷ୍ଟ କରିବାକୁ ପଡ଼ିଥିଲା। ଖାଇବାକୁ ପଇସା ନ ଥିବା ଯୋଗୁ ସେ ସାଙ୍ଗମାନଙ୍କଠାରୁ ଖାଉଥିଲେ। କେବଳ ଏତିକି ନୁହେଁ ପରବର୍ତ୍ତୀ ସମୟରେ ନିଜ ନାଁର ବନାନ ଆଉ ସଂଜ୍ଞା ବଦଳାଇଦେଇଥିଲେ। ବାସ୍ତବରେ ତାଙ୍କ ନା ରାଜକୁମାର ଯାଦବ ଥିବା ବେଳେ ସେ ଏହାକୁ ବଦଳାଇ ଦେଇ ରାଓ କରିଥିଲେ।
୨୦୦୯ରେ ଦିବାକର ବାନାର୍ଜୀଙ୍କ ଫିଲ୍ମ ‘ଲଭ୍, ସେକ୍ସ ଔର ଧୋକା’ରେ ସେ ଅଭିନୟ କରିଥିଲେ। ୨୦୧୦ରେ ଫିଲ୍ମ ରିଲିଜ ହୋଇଥିଲା। ଏହାପରେ ସେ ଆଉ ପଛକୁ ଚାହିଁ ନାହାନ୍ତି। ଏକାଧିକ ହିଟ୍ ଦେଇ ସେ ଏବେ ବଲିଉଡ୍ର ଭର୍ସାଟାଇଲ୍ ଅଭିନେତା ପାଲଟିଛନ୍ତି। ଫିଲ୍ମ ଶହିଦ୍ ପାଇଁ ତାଙ୍କୁ ରାଷ୍ଟ୍ରୀୟ ପୁରସ୍କାର ମଧ୍ୟ ମିଳିଛି।
