ତେଲକୋଇ, ୯।୮(ଡି.ଏନ.ଏ.)-ତେଲକୋଇ ବ୍ଲକ ଅଧୀନରେ ଥିବା ଓରିଆ ପଞ୍ଚାୟତ ପିଟାନାଳିରେ ରହିଛି ଆଦର୍ଶ ବିଦ୍ୟାଳୟ। ଲଗାଣ ବର୍ଷା ହେଲେ ଘାଟିରୁ ପାଣି ଯାକ ଏହି ନାଳ ମଧ୍ୟକୁ ଆସିଥାଏ। ଏହା ଉପରେ ପାଣି ଚାଲେ। ଲୋକଙ୍କ ସହ ଛାତ୍ରୀଛାତ୍ର ଯାତାୟାତରେ ବହୁ ସମସ୍ୟାର ସମ୍ମୁଖୀନ ହୋଇଥାନ୍ତି। ପ୍ରଶାସନ ଜାଣିଥିଲେ ମଧ୍ୟ ଏପର୍ଯ୍ୟନ୍ତ ଏହାର କୌଣସି ସ୍ଥାୟୀ ସମାଧାନ କରାଯାଇ ନାହିଁ। ସରକାର ପିଲାମାନଙ୍କ ଭବିଷ୍ୟତ ଲାଗି ବିଭିନ୍ନ ପ୍ରକାର ଯୋଜନା କରୁଥିଲେ ମଧ୍ୟ ଏହି ଆଦିବାସୀ ଅଧ୍ୟୁଷିତ ଅଞ୍ଚଳରେ ସବୁ ଯୋଜନା ଫେଲ ମାରିଛି। ଛାତ୍ରାବାସ ଥିଲେ ମଧ୍ୟ ବିଭିନ୍ନ ସମସ୍ୟା ଲାଗି ଏପର୍ଯ୍ୟନ୍ତ କାମରେ ଆସୁନାହିଁ। ପିଲାମାନେ ବିପଦର ସହିତ ଏହି ନାଳକୁ ପାରି ହୋଇ ସ୍କୁଲକୁ ଯାଇଥାନ୍ତି। ଏଥିରେ ତାଙ୍କର ଜୀବନ ପ୍ରତି ମଧ୍ୟ ବିପଦ ରହିଛି।
ବୁଧବାର ରାତିରୁ ଲଗାଣ ବର୍ଷ ଯୋଗୁ ପିଟାନାଳି ନାଳ ଉପରେ ପାଣି ଯୋଗୁଁ ଛାତ୍ରୀଛାତ୍ର ବିଦ୍ୟାଳୟରୁ ଆସିବା ଓ ବିଦ୍ୟାଳୟକୁ ଯିବା ବାଧାପ୍ରାପ୍ତ ହୋଇଛି । ବୁଧବାର ଅପରାହ୍ନ ୪ଟାରେ ଉକ୍ତ ନାଳ ଉପରେ ୩ଫୁଟ ପାଣି ଚାଲିବା ଯୋଗୁଁ ଛାତ୍ରଛାତ୍ରୀ ସ୍କୁଲରୁ ଫେରିବା କଷ୍ଟକର ହୋଇପଡିଥିଲା । ଖବର ପାଇ ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ଛାତ୍ରୀଛାତ୍ରଙ୍କୁ ରଶି ସାହାଯ୍ୟରେ ନାଳ ପାର କରିଥିଲେ । ତେବେ ପିଟାନାଳି ଗ୍ରାମରୁ ଶହେ ମିଟର ଦୂରରେ ରହିଛି ଆଦର୍ଶ ବିଦ୍ୟାଳୟ । ମଝିରେ ନାଳ ଉପରେ ଏକ ତଳୁଆ ପୋଲ କରାଯାଇଛି । ବର୍ଷା ହେଲେ ପୋଲ ଉପରେ ୩ଫୁଟ ପାଣି ସହିତ ଏହା ଖରସ୍ରୋତା ଯୋଗୁଁ ଛାତ୍ରଛାତ୍ରୀଙ୍କ ଯାତାୟାତରେ ଗୁରୁତର ବାଧା ଉପୁଜିଛି। ୬ଷ୍ଠ ଶ୍ରେଣୀ ଠାରୁ ୧୦ଶ୍ରେଣୀ ପର୍ଯ୍ୟନ୍ତ ୩୨୦ଜଣ ଛାତ୍ରୀଛାତ୍ର ଅଧ୍ୟୟନ କରନ୍ତି । ଏଥି ପାଇଁ ଛାତ୍ରମାନଙ୍କ ପଇଁ ଶହେ ୧୦ଶଯ୍ୟା ବିଶଷ୍ଟ ହଷ୍ଟେଲ ଗୃହ ନିର୍ମାଣ ହୋଇଥିଲେ ହେଁ ବିଦ୍ୟୁତ ସଂଯୋଗ ଓ ପାନୀୟଜଳ ଯୋଗାଣ ପାଇଁ ଅଦ୍ୟାବଧି ଛାତ୍ରାବାସ ଖୋଲାଯାଇ ପାରିନାହିଁ। ଏଥିପାଇଁ ଛାତ୍ରୀଛାତ୍ରମାନେ ତେଲକୋଇ ଅଞ୍ଚଳର ବିଭିନ୍ନ ଗ୍ରାମରେ ଘରଭଡା ନେଇ ଦୈନିକ ଭଡା ଗାଡିରେ ସ୍କୁଲକୁ ଆସିଥାନ୍ତି । ଏବେ ପିଟାନାଳି ନାଳ ସ୍କୁଲକୁ ଯିବା ଲାଗି ପ୍ରତିବନ୍ଧକ ହୋଇଛି। ଏସମ୍ପର୍କରେ ଆଦର୍ଶ ବିଦ୍ୟାଳୟର ପ୍ରିନ୍ସିପାଲ ପାର୍ଥସୁନ୍ଦର ମହାକୁଡ଼ଙ୍କୁ ପଚାରିବାରୁ ପିଟାନାଳି ପୋଲ ଉଚ୍ଚ ନ ହେଲେ ଛାତ୍ରୀଛାତ୍ରଙ୍କ ଯାତାୟାତରେ ବାଧା ନିଶ୍ଚିତ ହେବ। ଛାତ୍ରାବାସ କରୁଥିବା ବିଭାଗୀୟ ଅବହେଳା ଯୋଗୁଁ ଛାତ୍ରାବାସ ଖୋଲାଯାଇ ପାରି ନାହିଁ । ଏନେଇ ଜିଲା ପ୍ରଶାସନକୁ ଅବଗତ କରାଯାଇଛି ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
