କଟକ ଅଫିସ୍,୨୬।୪: କରୋନା ଭୂତାଣୁକୁ ମୁକାବିଲା କରିବାରେ ଡାକ୍ତର ଏବଂ ସ୍ବାସ୍ଥ୍ୟ କର୍ମୀମାନେ ପ୍ରମୁଖ ଭୂମିକା ନେଉଛନ୍ତି। ହେଲେ ରାଜ୍ୟର ଅନେକ ସ୍ଥାନରେ ସେମାନେ ଅସଦାଚରଣ ଏବଂ ଆକ୍ରମଣର ଶିକାର ହେଉଛନ୍ତି। ଏନେଇ ଭାରତୀୟ ମେଡିକାଲ୍ ସଂଘ(ଆଇଏମ୍ଏ)ପ୍ରତିନିଧିମାନେ ରାଜ୍ୟ ପୋଲିସ ମହାନିର୍ଦ୍ଦେଶକ ଅଭୟଙ୍କ ସହ ଶନିବାର ସାକ୍ଷାତ୍ ଆଲୋଚନା କରିଛନ୍ତି। ଆକ୍ରମଣ ରୋକିବା ଦିଗରେ କଡା ପଦକ୍ଷେପ ନେବା ପାଇଁ ଦାବି କରିଛନ୍ତି।
ସଂଘ ଓଡ଼ିଶା ଶାଖା ପୂର୍ବତନ ସଭାପତି ଡା. ପୂର୍ଣ୍ଣଚନ୍ଦ୍ର ମହାପାତ୍ର, ବର୍ତ୍ତମାନ ସଭାପତି ଡା. ନିବେଦିତା ପାଣି, ସମ୍ପାଦକ ଡା. ବ୍ରଜକିଶୋର ଦାଶ ଏବଂ ଅନ୍ୟ ସଦସ୍ୟମାନେ ଆଲୋଚନାରେ ଭାଗ ନେଇଥିଲେ। ଡାକ୍ତର ଏବଂ ଅନ୍ୟ ସ୍ବାସ୍ଥ୍ୟସେବା ଅଧିକାରୀ ଓ କର୍ମୀମାନଙ୍କ ସୁରକ୍ଷା ଏବଂ ତାଙ୍କ ବିରୋଧରେ ହେଉଥିବା ଅପରାଧ ନିରାକରଣ ନେଇ ଆଲୋଚନା ହୋଇଥିଲା। କରୋନା ପରିସ୍ଥିତି ସମୟରେ ସେମାନଙ୍କ ସୁରକ୍ଷା ଓଡ଼ିଶା ପୋଲିସର ପ୍ରତିବଦ୍ଧତା ବୋଲି ଡିଜିପି ପ୍ରତିଶ୍ରୁତି ଦେଇଥିଲେ। ସେହିଭଳି ଆଇଏମ୍ଏ ତରଫରୁ ପୋଲିସର କଠିନ ପରିଶ୍ରମକୁ ପ୍ରଶଂସା କରାଯାଇଥିଲା। ଏଥି ସହ ଜିଲାସ୍ତରରେ ଜିଲା ପୋଲିସ ଏବଂ ଆଇଏମ୍ଏର ଜିଲା ଶାଖା ପଦାଧିକାରୀଙ୍କ ମଧ୍ୟରେ ସମନ୍ବୟ ରକ୍ଷା ନିମନ୍ତେ ମଧ୍ୟ ଅନୁରୋଧ କରାଯାଇଥିଲା। ଶେଷରେ ପ୍ରଚଳିତ ସୁରକ୍ଷା ସମ୍ବନ୍ଧୀୟ ବ୍ୟବସ୍ଥାକୁ ପରବର୍ତ୍ତୀ ସମୟରେ ଜାରି ରଖିବାକୁ ଆଇଏମ୍ଏର ପଦାଧିକାରୀମାନେ ନିବେଦନ କରିଥିଲେ। ଆଲୋଚନା ବେଳେ ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ(ଆଇନ୍ ଶୃଙ୍ଖଳା) ସୌମେନ୍ଦ୍ର ପ୍ରିୟଦର୍ଶୀ ଉପସ୍ଥିତ ଥିଲେ।
