ଆରଡ଼ି, ୧।୯ (ଡି.ଏନ.ଏ.)- ସୋମବାର ବିଦ୍ୟାଦାତା ବିଘ୍ନବିନାଶକ ଗଜାନନଙ୍କ ପୂଜା। ଏଥିପାଇଁ ଗଁାଠୁ ସହର ସବୁଠି ଚାଲିଛି ପ୍ରସ୍ତୁତି। କାରିଗରମାନେ ଗଜାନନଙ୍କ ମୂର୍ତ୍ତିରେ ଶେଷ ସ୍ପର୍ଶ ଦେବାରେ ଲାଗିପଡ଼ିଛନ୍ତି। ଭଦ୍ରକ ଜିଲାର ଆରଡ଼ି ନିକଟସ୍ଥ ଦୋହରାପାଟଣା ଗଁାରେ ୨୫ ବର୍ଷ ଧରି ଏହି ପୂଜା ଅନୁଷ୍ଠିତ ହୋଇଆସୁଥିବା ବେଳେ ଚଳିତବର୍ଷ ଭିନ୍ନ ଧରଣର ପୂଜାର ଆୟୋଜନ କରାଯାଇଛି। ୮ ମାସ ତଳେ ସଡ଼କ ଦୁର୍ଘଟଣାରେ ପ୍ରାଣ ହରାଇଥିବା ନିଜ କ୍ଲବ ସଦସ୍ୟ ନୀଳମାଧବ ନାୟକଙ୍କ ସ୍ମୃତିରେ ଚଳିତବର୍ଷ ପୂଜା ପାଳନ କରାଯିବ ବୋଲି ଅନୁଷ୍ଠାନର କର୍ମକର୍ତ୍ତା କହିଛନ୍ତି। ଏଥିସହିତ ନିଜ କ୍ଲବର ନାମକୁ ନୀଳମାଧବ କ୍ଲବ ଭାବେ ନାମିତ କରିଛନ୍ତି। ୫ ଦିନ ବ୍ୟାପୀ ପୂଜା ପାଳନ ଲାଗି ସ୍ଥିର ହୋଇଥିବା ବେଳେ ପୂଜା ମାଧ୍ୟମରେ ସଚେତନତାର ବାର୍ତ୍ତା ପ୍ରଚାର ପାଇଁ ଉଦ୍ୟମ କରାଯାଇଛି।
ପୂଜାର ପ୍ରଥମ ଓ ଦ୍ୱିତୀୟ ଦିନରେ ଗଁାର ଯୁବକମାନଙ୍କୁ ଏକତ୍ର କରାଯାଇ ଦ୍ରୁତଗତିରେ ଗାଡ଼ି ନ ଚଳାଇବାକୁ ଏକ ଶପଥ କାର୍ଯ୍ୟକ୍ରମ ଅନୁଷ୍ଠିତ ହେବ। ତୃତୀୟ ଓ ଚତୁର୍ଥ ଦିନରେ ମଦ୍ୟପାନ ନ କରିବା ପାଇଁ କ୍ଲବ ସଦସ୍ୟ ନିଜେ ଶପଥ କରିବା ସହ ଅନ୍ୟମାନଙ୍କୁ ଶପଥ କରାଇବେ। ୫ ମ ଦିନ ଗ୍ରାମ ସଫେଇ କାର୍ଯ୍ୟକ୍ରମ ସହ ନିରକ୍ଷର ମହିଳା ଓ ପୁରୁଷଙ୍କୁ ସାକ୍ଷର କରିବାକୁ ପ୍ରତି ଘର ବୁଲିବା ସହ ସମସ୍ତଙ୍କୁ ସହଯୋଗ କରିବାକୁ ଅନୁରୋଧ କରାଯିବ ବୋଲି କ୍ଲବର ସଭାପତି ଶୁଭେନ୍ଦୁ କୁମାର ନାୟକ ସୂଚନା ଦେଇଛନ୍ତି। ଏଥିସହିତ ଗଜାନନଙ୍କ ପୂଜା ଭକ୍ତି ଓ ଆଧ୍ୟାତ୍ମିକତାରେ ସମ୍ପାଦନ କରାଯିବ ବୋଲି ସମ୍ପାଦକ ସମ୍ବିତ କୁମାର ନାୟକ କହିଛନ୍ତି। ଏଭଳି ନିଆରା କାର୍ଯ୍ୟକ୍ରମ କ୍ଲବ ହାତକୁ ନେଇଥିବାରୁ ସ୍ଥାନୀୟ ଅଞ୍ଚଳରେ ପ୍ରଶଂସା କରାଯାଇଛି।
