ପୁରୀ ଅଫିସ,୨୭ା୨: ଓଡ଼ିଶାର ଆଦିବାସୀ ଅଞ୍ଚଳଗୁଡ଼ିକରୁ ବାହାର ରାଜ୍ୟକୁ ମାନବଚାଲାଣ କରାଯାଉଛି। ଏ ନେଇ ବିଭିନ୍ନ ମହଲରେ ଉଦ୍ବେଗ ପ୍ରକାଶ ପାଉଛି। ଟ୍ରେନରେ ମାନବ ଚାଲାଣ ର଼୍ୟାକେଟ ସକ୍ରିୟ ହୋଇ ଉଠିଛନ୍ତି। ଗଞ୍ଜାମ, କନ୍ଧମାଳ, ଗଜପତି, ରାୟଗଡ଼ା ପ୍ରଭୃତି ଅଞ୍ଚଳରୁ ନାବାଳିକା, ନାବାଳକଙ୍କୁ ଦାଦନ ଖଟିବା ଲାଗି ଏଜେଣ୍ଟଙ୍କ ଜରିଆରେ ବାହାର ରାଜ୍ୟକୁ ପଠାଯାଉଛି। ମୁଖତଃ ସୁରଟ, ବମ୍ବେ, ବାଙ୍ଗାଲୁରୁ, ଚେନ୍ନାଇ ପ୍ରଭୃତି ଅଞ୍ଚଳକୁ ଅଧିଖ ଚାଲାଣ କରାଯାଉଥିବା ଜଣାପଡିଛି। ତେବେ ପୁରୀ ଷ୍ଟେଶନ ଏମାନଙ୍କ ଲାଗି ଏକ ସୁରକ୍ଷିତ ସ୍ଥାନ ପାଲଟିଛି। ପୁରୀଠାରୁ ବିଭିନ୍ନ ଗନ୍ତବ୍ୟ ସ୍ଥଳକୁ ଯାତାୟାତ ସୁବିଧା ଥିବାରୁ ଅଧିକାଂଶ ନାବାଳିକା ନାବାଳକଙ୍କୁ ଧରି ଏହି ଷ୍ଟେଶନରୁ ଯାତ୍ରା କରିଥାନ୍ତି। ନିକଟରେ ପୁରୀ ଷ୍ଟେଶନରୁ ୫ଜଣ ନାବାଳକ ଓ ୩ ସାବାଳକ ଧରାପଡ଼ିଥିଲେ। ଏମାନଙ୍କୁ ବାହାର ରାଜ୍ୟକୁ ଚାଲାଣ କରୁଥିବା ନେଇ ପୋଲିସ ୨ଜଣ ଏଜେଣ୍ଟଙ୍କୁ ଗିରଫ କରିଥିଲା। ବିଭିନ୍ନ ଅଞ୍ଚଳରୁ ସଂଗୃହିତ ପିଲାଙ୍କୁ ପର୍ଯ୍ୟାୟକ୍ରମେ ଟ୍ରେନ ଯୋଗେ ଏଠାରୁ ବାହାର ରାଜ୍ୟକୁ ଚାଲାଣ କରାଯାଉଥିବା ନେଇ ଜନୈକ ଏଜେଣ୍ଟ ପୋଲିସ ଆଗରେ ସ୍ବୀକାର କରିଛନ୍ତି। ମଙ୍ଗଳବାର କଟକ ପୋଲିସ ମୁଖ୍ୟାଳୟଠାରେ ରେଳ ସୁରକ୍ଷା କମିଟିର ତ୍ରୈମାସିକ ବୈଠକରେ ଏନେଇ ଉଦ୍ବେଗ ପ୍ରକାଶ ପାଇଥିଲା। ପୋଲିସ ମହାନିର୍ଦ୍ଦେଶକ ଅଭୟ ଏନେଇ ସମସ୍ତ ଅଧିକାରୀଙ୍କୁ ସତର୍କ ରହିବାକୁ ତାଗିଦ୍ କରିଥିଲେ। ଆରପିଏଫ, ଜିଆରପି ଏବଂ ପୋଲିସ ମଧ୍ୟରେ ସମନ୍ବୟତା ରଖି ଷ୍ଟେଶନ ପରିସରରେ ଘଟୁଥିବା ସମସ୍ତ ଗତିବିଧି ଉପରେ ନଜର ରଖିବା ଲାଗି ନିର୍ଦ୍ଦେଶ ଦେଇଥିଲେ। ବିଶେଷତଃ ମାନବଚାଲାଣ ରୋକିବା ଉପରେ ଗୁରୁତ୍ୱାରୋପ କରିଥିଲେ। ମିଳିଥିବା ସୂଚନା ପ୍ରକାରେ ରୀତିମତ ଭାବେ ପୁରୀର ବ୍ରହ୍ମଗିରି, ସତ୍ୟବାଦୀ, ଅସ୍ତରଙ୍ଗ ପ୍ରଭୃତି ନାବାଳିକା ଓ ସାବାଳିକାମାନଙ୍କୁ ବାହାର ରାଜ୍ୟକୁ ଚାଲାଣ କରାଯାଉଥିବା ଜଣାପଡିଛି। ୨୦୧୮ରେ ବ୍ରହ୍ମଗିରି ଓ କୃଷ୍ଣପ୍ରସାଦ ଅଞ୍ଚଳର ୧୮ଜଣ ନାବାଳିକା ଓ ସାବାଳିକାଙ୍କୁ ଟ୍ରେନରେ ଚାଲାଣ ବେଳେ ଧରାପଡିଥିଲା। ଏ ନେଇ ଆରପିଏଫ ଥାନାଧିକାରୀ ଅନିଲ କୁମାର ସିଂ କୁହନ୍ତି, ମାନବାଚାଲାଣ ରୋକିବା ଲାଗି ଆରପିଏଫ ପକ୍ଷରୁ ବିଶେଷ ଗୁରୁତ୍ୱ ଦିଆଯାଉଛି। ଏ ନେଇ ଷ୍ଟେଶନରୁ ଟ୍ରେନ ଛାଡିବାର କିଛି ସମୟ ପୂର୍ବରୁ ଟ୍ରେନ ପରିସର ଚେକିଂ କରାଯାଉଛି। କୌଣସି ବ୍ୟକ୍ତି ବିଶେଷ ଅଥବା ପ୍ଲାଟଫର୍ମରେ ନାବାଳିକା ବସିଥିବା ସନ୍ଦେହ ହେଲେ ସେମାନଙ୍କୁ ତୁରନ୍ତ ଥାନାକୁ ଆଣି ପଚରାଉଚୁରା କରାଯାଉଛି। ନିକଟରେ ମାନବଚାଲାଣ କରୁଥିବା ବ୍ୟକ୍ତିଙ୍କୁ ମଧ୍ୟ ଗିରଫ କରି କୋର୍ଟଚାଲାଣ କରାଯାଇଛି। ଏନେଇ ଆରପିଏଫ ପକ୍ଷରୁ ଦୃଷ୍ଟି ଦିଆଯାଉଛି ବୋଲି ସେ କହିଥିଲେ।
