ନୂଆଦିଲ୍ଲୀ, ୩-୯: ଆର୍ବିଆଇର ପ୍ରମ୍ପଟ କରେକ୍ଟିଭ ଆକ୍ସନ (ପିସିଏ) କାର୍ଯ୍ୟାନୁଷ୍ଠାନ ପରିସରରୁ ଅବଶିଷ୍ଟ ୪ ରାଷ୍ଟ୍ରାୟତ୍ତ ବ୍ୟାଙ୍କ ବାହାରିବେ। ସରକାର ବ୍ୟାଙ୍କଗୁଡିକୁ ସଦ୍ୟତମ ପୁଞ୍ଜି ପ୍ରଦାନ କରିବାକୁ ନିକଟରେ ଘୋଷଣା କରିଛନ୍ତି। ଏହା ଦ୍ୱାରା ବ୍ୟାଙ୍କଗୁଡିକ ପିସିଏରୁ ବାହାରିବେ ବୋଲି ଅର୍ଥ ମନ୍ତ୍ରଣାଳୟ ଆଶା ରଖିଛି। ବର୍ତ୍ତମାନ ଇଣ୍ଡିଆନ ଓଭରସିଜ ବ୍ୟାଙ୍କ( ଆଇଓବି), ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ, ୟୁକୋ ବ୍ୟାଙ୍କ ଏବଂ ୟୁନାଇଟେଡ ବ୍ୟାଙ୍କ ଅଫ୍ ଇଣ୍ଡିଆ ପିସିଏ ପରିସରରେ ରହିଛନ୍ତି। ଏହା ଦ୍ୱାରା ସେମାନଙ୍କ ଉପରେ ଋଣ ଯୋଗାଣ, ପରିଚାଳନା କ୍ଷତିପୂରଣ ଏବଂ ନିର୍ଦ୍ଦେଶକଙ୍କ ଫି ଭଳି ବିଭିନ୍ନ କଟକଣା ଜାରି କରାଯାଇଛି। ଏହି ୪ ବ୍ୟାଙ୍କକୁ ସରକାର ଶୁକ୍ରବାର ୧୦,୮୦୦ କୋଟି ଟଙ୍କାର ପୁଞ୍ଜି ସହାୟତା ପ୍ରଦାନ କରିଛନ୍ତି। ୪ ବ୍ୟାଙ୍କ ମଧ୍ୟରୁ ଆଇଓବି ସର୍ବାଧିକ ୩,୮୦୦ କୋଟି ଟଙ୍କା ପାଇଛି।
ସେହିଭଳି ସେଣ୍ଟ୍ରାଲ ବ୍ୟାଙ୍କ ଇଣ୍ଡିଆ ୩,୩୦୦ କୋଟି , ୟୁକୋ ବ୍ୟାଙ୍କ ୨,୧୦୦ କୋଟି ଏବଂ ୟୁନାଇଟେଡ ବ୍ୟାଙ୍କ ଅଫ୍ ଇଣ୍ଡିଆ ୧୬୦୦ କୋଟି ଟଙ୍କା ପାଇଛି। ଏହି ପୁଞ୍ଜି ସହାୟତା ଦ୍ୱାରା ବ୍ୟାଙ୍କଗୁଡିକ ପିସିଏରୁ ବାହାରିବାକୁ ସକ୍ଷମ ହେବେ ବୋଲି ଅର୍ଥ ସଚିବ ରାଜୀବ କୁମାର କହିଛନ୍ତି। ୟୁନାଇଟେଡ ବ୍ୟାଙ୍କ ମିଶ୍ରଣ ଯୋଗୁ ପିସିଏରୁ ବାହାରିବାକୁ ଥିବା ବେଳେ ଆଇଓବି, ସେଣ୍ଟ୍ରାଲ ବ୍ୟାଙ୍କ ଏବଂ ୟୁକୋ ବ୍ୟାଙ୍କକୁ ସରକାର ପ୍ରଦାନ କରିଥିବା ପୁଞ୍ଜି ସହାୟତା ଦ୍ୱାରା ପିସିଏରୁ ମୁକୁଳିବାକୁ ସହାୟତା କରିବ ବୋଲି କୁମାର ସ୍ପଷ୍ଟ କରିଛନ୍ତି। ୧୦ ରାଷ୍ଟ୍ରାୟତ୍ତ ବ୍ୟାଙ୍କକୁ ମିଶାଇ ୪ ବଡ ବ୍ୟାଙ୍କ ଗଠନ ନେଇ ସରକାର ଗତ ସପ୍ତାହରେ ଘୋଷଣା କରିଛନ୍ତି। ଏହା ଦ୍ୱାରା ୟୁନାଇଟେଡ ବ୍ୟାଙ୍କ ଅଫ୍ ଇଣ୍ଡିଆ ଏବଂ ଓରିଏଣ୍ଟାଲ ବ୍ୟାଙ୍କ ଅଫ୍ କମର୍ସ ପଞ୍ଜାବ ନ୍ୟାଶନାଲ ବ୍ୟାଙ୍କ ସହ ମିଶ୍ରଣ ଘଟିବ। ପୂର୍ବରୁ ପିସିଏ ପରିସରରୁ ୫ ରାଷ୍ଟ୍ରାୟତ୍ତ ବ୍ୟାଙ୍କ ବାହାରିିଛନ୍ତି। ଏହା ମଧ୍ୟରେ ବ୍ୟାଙ୍କ ଅଫ୍ ଇଣ୍ଡିଆ, ବ୍ୟାଙ୍କ ଅଫ୍ ମହାରାଷ୍ଟ୍ର, ଓରିଏଣ୍ଟାଲ ବ୍ୟାଙ୍କ ଅଫ୍ କମର୍ସ, ଆଲ୍ଲାହାବାଦ ବ୍ୟାଙ୍କ, କର୍ପୋରେଶନ ବ୍ୟାଙ୍କ ରହିଛନ୍ତି। ସରକାରଙ୍କ ୨ଟି ପର୍ଯ୍ୟାୟରେ ପୁଞ୍ଜି ଯୋଗାଣ ଦ୍ୱାରା ଏଭଳି ସ୍ଥିତିକୁ ବ୍ୟାଙ୍କଗୁଡିକ ଆସିଛନ୍ତି।
ପୁଞ୍ଜି ଯୋଗାଣ ଦ୍ୱାରା ବ୍ୟାଙ୍କଗୁଡିକ ସେମାନଙ୍କ ପୁଞ୍ଜି ଆବଶ୍ୟକତା ସୀମା ହାସଲ କରିବାକୁ ସକ୍ଷମ ହୋଇଛନ୍ତି। ଅପରପକ୍ଷରେ ନେଟ୍ ଏନ୍ପିଏ ସ୍ତର ୬%ରୁ ତଳକୁ ବ୍ୟାଙ୍କଗୁଡିକ ଖସାଇ ପାରିଛନ୍ତି। ଗତ ବର୍ଷ ଏପ୍ରିଲରେ ରିଜର୍ଭ ବ୍ୟାଙ୍କ ୧୧ ରାଷ୍ଟ୍ରାୟତ୍ତ ବ୍ୟାଙ୍କକୁ ପିସିଏ କଟକଣା ଜାରି କରିଥିଲା। ବ୍ୟାଙ୍କ ଅଫ ବରୋଦା ସହ ଦେନା ବ୍ୟାଙ୍କ ମିଶ୍ରଣ ହେବା ପରେ ଏହା ଅଲଗା ନାମରେ ପରିଚିତ ହୋଇଛି। ସେହିଭଳି ଆଇଡିବିଆଇ ବ୍ୟାଙ୍କକୁ ଏଲ୍ଆଇସି ଅଧିଗ୍ରହଣ କରିଛି। ବ୍ୟାଙ୍କ କେବେ ପିସିଏରୁ ବାହାରିବ ତାହା ସମ୍ପୃକ୍ତ ବ୍ୟାଙ୍କଗୁଡିକର କାର୍ଯ୍ୟଧାରାର ବିଚାରକୁ ନେଇ ରିଜର୍ଭ ବ୍ୟାଙ୍କ ନିଷ୍ପତ୍ତି ନେଇଥାଏ ବୋଲି କୁମାର କହିଛନ୍ତି। ଏନ୍ପିଏ ସମସ୍ୟା ସମାଧାନ ଲାଗି ଅର୍ଥମନ୍ତ୍ରଣାଳୟ ବିଭିନ୍ନ ପଦକ୍ଷେପ ନେଉଛି। ଏହା ଫଳରେ ୨୦୧୮-୧୯ ଆର୍ଥତ୍କ ବର୍ଷରେ ୧.୦୬ ଲକ୍ଷ କୋଟି ଟଙ୍କାର ଏନ୍ପିଏ ହ୍ରାସ ଏବଂ ୧.୨୧ ଲକ୍ଷ କୋଟି ଟଙ୍କାର ଋଣ ଅସୁଲ ହୋଇଛି, ଯାହା ଏକ ରେକର୍ଡ।
