ଭୁବନେଶ୍ୱର,୧୫ା୪(ବ୍ୟୁରୋ)- ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କରୋନା ମୁକାବିଲା ସ୍ବରୂପ ହିତାଧିକାରୀଙ୍କ ନିକଟରେ ଆବଶ୍ୟକ ସାମଗ୍ରୀ ପହଞ୍ଚାଯିବା ଉପରେ ସର୍ବାଧିକ ଗୁରୁତ୍ୱ ଦେଇଛନ୍ତି। ଲକ୍ଡାଉନ କାରଣରୁ ସାଧାରଣ ଲୋକେ ଯେପରି ଅସୁବିଧା ନ ଭୋଗନ୍ତି, ସେଥିପ୍ରତି ରାଜ୍ୟସ୍ତରରୁ ବ୍ଲକସ୍ତରୀୟ ମନିଟରିଂ ହେଉଛି। ସର୍ବୋପରି ବିଭିନ୍ନ ଟୁଇଟ ଜରିଆରେ ଆସିଥିବା ଅଭିଯୋଗ ଉପରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ ତ୍ୱରିତ ପଦକ୍ଷେପ ଗ୍ରହଣ କରାଯାଇଛି।
ପିଡିଏସ୍ ସାମଗ୍ରୀ ବିକ୍ରି ବେଳେ ମାପ ଓ ଓଜନରେ ଠକିଥିବା ଅଭିଯୋଗରେ ପୁରୀ ଜିଲା ନିମାପଡ଼ା ବ୍ଲକ ଅନ୍ତର୍ଗତ ହରିପୁର ଗ୍ରାମପଞ୍ଚାୟତର ଗୋବିନ୍ଦ ଚନ୍ଦ୍ର ସାହୁଙ୍କ ରିଟେଲ୍ ଲାଇସେନ୍ସକୁ ପୁରୀ ଉପଜିଲାପାଳ ରଦ୍ଦ କରିଛନ୍ତି। ହରିପୁର ଗ୍ରାମବାସୀଙ୍କଠାରୁ ଏ ସମ୍ପର୍କରେ ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ ଅଭିଯୋଗ ପାଇବା ପରେ ଆବଶ୍ୟକ କାର୍ଯ୍ୟାନୁଷ୍ଠାନ ଲାଗି ଜିଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ। କୋରାପୁଟ ଜିଲାର ଦୋରାଗୁଡ ଗ୍ରାମପଞ୍ଚାୟତର କେନ୍ଦୁଗୁଡା ଗ୍ରାମର ହିତାଧିକାରୀ ଡମଣି ପାମିଆଙ୍କ ରାଶନ କାର୍ଡ ଅଚଳ ହୋଇଯାଇଥିଲା। ଏହି ସମସ୍ୟା ସମ୍ପର୍କରେ ଅବଗତ ହେବା ପରେ ପାମିଆଙ୍କୁ ଆଗୁଆ ୩ ମାସ ପାଇଁ ରାଶନ ପ୍ରଦାନ କରାଯାଇଛି। ଏଥିସହିତ କଳାହାଣ୍ଡି ଜିଲାର କେସିଙ୍ଗା ବ୍ଲକର ଉତ୍କେଳା ଗାଁର ବିଧବା ବୃଦ୍ଧା ନିପୁର ପଟେଲଙ୍କ ରାଶନ କାର୍ଡ଼ ନଥିବାରୁ ରିହାତି ଚାଉଳ ପାଇ ନ ଥିବା ଖବର ପ୍ରକାଶ ପାଇଥିଲା। ଏହା ପରେ ମନ୍ତ୍ରୀଙ୍କ ପକ୍ଷରୁ ତୁରନ୍ତ ଏ ସମସ୍ୟାର ସମାଧାନ ପାଇଁ ସ୍ଥାନୀୟ ପ୍ରଶାସନ ସହ ଯୋଗାଯୋଗ କରିବା ପାଇଁ କୁହାଯାଇଥିଲା। ଅପରପକ୍ଷେ ଏକ ବିଶେଷ ସୂତ୍ରରୁ ଖବର ପାଇଁ ଯୋଗାଣ ଅଧିକାରୀଙ୍କୁ ଜିଲାରେ ରାଶନ ପ୍ରଦାନ କିପରି ଚାଲିଛି, ତାହା ଅନୁଧ୍ୟାନ କରିବାକୁ ନିର୍ଦ୍ଦେଶ ଦେଇଥିଲେ। ମନ୍ତ୍ରୀଙ୍କ ନିର୍ଦ୍ଦେଶକ୍ରମେ କୋରାପୁଟ ଜିଲାର ମୁଖ୍ୟ ଯୋଗାଣ ଅଧିକାରୀ ଏକ ନିର୍ଦ୍ଦିଷ୍ଟ ଅଭିଯୋଗ ଉପରେ ତୁରନ୍ତ ହସ୍ତକ୍ଷେପ କରିଥିଲେ। ଏହା ପରେ ପଦ୍ମପୁର ଗ୍ରାମପଞ୍ଚାୟତ ଅଧୀନ ରେଙ୍ଗିଆଗୁଡା ଗ୍ରାମର ଅନ୍ତ୍ୟୋଦୟ କାର୍ଡଧାରୀ ଗୌରୀମାଳ କୁଳଦୀପଙ୍କୁ ସରକାରୀ ଯୋଜନା ମୁତାବକ ୩ ମାସ ପାଇଁ ୧୦୫ କି.ଗ୍ରା ଚାଉଳ ଏବଂ ୧୦୦୦ ଟଙ୍କାର ନଗଦ ସହାୟତା ରାଶି ପ୍ରଦାନ କରାଯାଇଛି।
