ପାରାଦୀପ,୧୧ା୨(ସ୍ବ.ପ୍ର.): ରାଜ୍ୟ ସରକାର ବେଆଇନଭାବେ ଗଢ଼ି ଉଠିଥିବା କୋଠାବାଡିକୁ ବୈଧ କରିବା ପାଇଁ ସର୍ବକ୍ଷମା ସୁବିଧା କରିଛନ୍ତି। ଏହାର ଅବଧି ଆସନ୍ତା ୨୦ ତାରିଖ ପର୍ଯ୍ୟନ୍ତ ରହିଛି। କିନ୍ତୁ ପରିତାପର ବିଷୟ ପାରାଦୀପ ଉନ୍ନୟନ କର୍ତ୍ତୃପକ୍ଷ (ପିଡିଏ) ଅଧୀନରେ ଥିବା ୧୨୦ ଗ୍ରାମର ୧୦ ହଜାରରୁ ଊର୍ଦ୍ଧ୍ୱ ବେଆଇନ ଘର ମଧ୍ୟରୁ ସୋମବାର ସୁଦ୍ଧା ମାତ୍ର ୨୦ଜଣ ଏହି ସୁବିଧା ପାଇଁ ଆବେଦନ କରିଛନ୍ତି। ଏ ନେଇ ପିଡିଏ ପକ୍ଷରୁ ଏକାଧିକଥର ବିଜ୍ଞାପନ ସତ୍ତ୍ୱେ ଘରବାଡ଼ି କରିଥିବା ଲୋକଙ୍କ ମଧ୍ୟରେ କୌଣସି ପ୍ରଭାବ ପଡ଼ୁ ନ ଥିବା ଲକ୍ଷ୍ୟ କରାଯାଇଛି। ସର୍ବକ୍ଷମା ଅବଧି ପରେ ପିଡିଏ କର୍ତ୍ତୃପକ୍ଷ କଠୋରତା ହେବେ କି ନାହିଁ ସେ ନେଇ ସଂଶୟ ରହିଛି। କାରଣ ପିଡିଏ ହେବାଠାରୁ ଏପର୍ଯ୍ୟନ୍ତ ସେପରି କୌଣସି ଆଖିଦୃଶିଆ ପଦକ୍ଷେପ ଗ୍ରହଣ କରାଯାଇନାହିଁ। ୧୯୯୬ରେ ପାରାଦୀପରେ ନୂତନ ସହରାଞ୍ଚଳ ପାଇଁ ପିଜେଆରଆଇଟି(ପାରାଦୀପ ଜଗତ୍ସିଂହପୁର ରେଜିଓନାଲ ଇମ୍ପୃଭମେଣ୍ଟ ଟ୍ରଷ୍ଟ) ଗଠନ ହୋଇଥିଲା। ୨୦୦୫ ନଭେମ୍ବରରେ ତାହା ପିଡିଏ ମାନ୍ୟତା ପାଇଥିଲା। ଉକ୍ତ ସଂସ୍ଥାକୁ ୨୪ ବର୍ଷ ହେଲାଣି। ପିଡିଏର ସୀମା କହିଲେ, ପାରାଦୀପ ସହରଠାରୁ ରାହାମା ପର୍ଯ୍ୟନ୍ତ ୧୨୦ ଗ୍ରାମକୁ ନେଇ ହୋଇଛି। ଏହିସବୁ ଅଞ୍ଚଳରେ ପିଡ଼ିଏ ଶିଳ୍ପ ସ୍ଥାପନ, ବସ୍ଷ୍ଟାଣ୍ଡ, ରେଳଷ୍ଟେସନ, ଟର୍ମିନାଲ, ମେଡିକାଲ, ଏୟାରଷ୍ଟ୍ରିପ, ଯାତ୍ରୀ ବିଶ୍ରାମାଗାର ବଜାର, ପ୍ଲଟ୍, ଘରବାଡି ବ୍ୟବସ୍ଥିତ କରିବା କଥା ଏବଂ ୨୦୫୦କୁ ନେଇ ପିଡିଏର ନୂତନ ପ୍ଲାନ୍ ଭିଜନ୍ ୫୦ ମଧ୍ୟ କରାଯାଇଛି। ଏହାର ଅପରପାର୍ଶ୍ୱକୁ ଦେଖିଲେ ଜଣାଯାଏ ଯେ, ପିଡିଏର ଗୁଡାଏ ଜାଗା ଥିବା ସତ୍ତ୍ୱେ ଏପର୍ଯ୍ୟନ୍ତ ନିଜସ୍ବ ଅଫିସ ଘର ନାହିଁ। ଟାଉନ ପ୍ଲାନର ନାହାନ୍ତି। କଟକର ଜଣେ ଟାଉନ ପ୍ଲାନର ମାସକୁ ମାତ୍ର ୨ ଦିନ ଡ୍ୟୁଟିକୁ ଆସନ୍ତି। ପିଡିଏର ଅଧ୍ୟକ୍ଷ ହେଲେ ଶିଳ୍ପ ସଚିବ, ଉପାଧ୍ୟକ୍ଷ ଜଗତ୍ସିଂହପୁର ଜିଲାପାଳ ସଂଗ୍ରାମକେଶରୀ ମହାପାତ୍ର, ସଚିବ ହେଲେ ପାରାଦୀପ ଅତିରିକ୍ତ ଜିଲାପାଳ। କିନ୍ତୁ ଅଫିସ ଚାଲିଛି ପୌରପାଳିକା ପ୍ରାଶାସନିକ ଭବନର ଉପର ମହଲାରେ। ଅଫିସର ଏପରି ସ୍ଥିତିକୁ ନେଇ ପ୍ରାୟତଃ କେହି ଘର ପାଇଁ ପ୍ଲାନ୍ ଦେବାକୁ ଉଚିତ୍ ମନେ କରିନାହାନ୍ତି। ଉଦାହରଣତଃ ପାରାଦୀପ ବିଜୟଚନ୍ଦ୍ରପୁରରେ ଗତ ୧୦ ବର୍ଷ ମଧ୍ୟରେ ତିଆରି ହୋଇଛି ୬୦୦ରୁ ଅଧିକ ସୁଉଚ୍ଚ ଅଟ୍ଟାଳିକା। ଉକ୍ତ ଜାଗାର ପଟ୍ଟା ନ ଥିବାରୁ ୯୯ ପ୍ରତିଶତ ଲୋକ ପିଡିଏ ପ୍ଲାନ୍ କରିନାହାନ୍ତି। ଏବେ ସର୍ବକ୍ଷମା ଆବେଦନ କରିବାକୁ ସେମାନଙ୍କ ପାଖରେ ଡକ୍ୟୁମେଣ୍ଟ ମଧ୍ୟ ନ ଥିବା ଜଣାଯାଏ। ସହର ବ୍ୟତୀତ ଗ୍ରାମାଞ୍ଚଳରେ ଥିବା ଘରବାଡିକୁ ଏପର୍ଯ୍ୟନ୍ତ ପିଡିଏ ପକ୍ଷରୁ ସର୍ଭେ କରାଯାଇନାହିଁ। ୧୨୦ ଗ୍ରାମରେ କେତେ କୋଠାଘର ଅଛି ସେ ତାଲିକା ପିଡିଏ ପାଖରେ ନାହିଁ। ଏମିତି ସ୍ଥିତିରେ ସର୍ବକ୍ଷମାକୁ ଲୋକେ କେମିତି ଗ୍ରହଣ କରିବେ ଏବଂ ସରକାର କି ପଦକ୍ଷେପ ନେବେ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ପ୍ରସଙ୍ଗରେ ପିଡିଏ ସଚିବ ତଥା ପାରାଦୀପ ଅତିରକ୍ତ ଜିଲାପାଳ କାହ୍ନଚରଣ ଧୀର କହିଛନ୍ତି, ଆଇନ ଆଗରେ ସମସ୍ତେ ସମାନ। ଯିଏ ଆଇନକୁ ଫାଙ୍କିବେ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ। ଏବେ ଦେଖିବାକୁ ଅପେକ୍ଷା ଆଗକୁ ଏ ଦିଗରେ କି ପଦକ୍ଷେପ ନିଆଯାଉଛି।
