ସୋନପୁର, ୫।୭(ନି.ପ୍ର.)-ସୁବର୍ଣ୍ଣପୁର ଜିଲା ମୁଖ୍ୟାଳୟ ସହିତ ସମ୍ବଲପୁର ଜିଲା ଓ ବୀରମହାରାଜପୁର ଉପଖଣ୍ଡକୁ ସଂଯୋଗ କରୁଛି ବିଜୁ ପଟ୍ଟନାୟକ ସେତୁ। ମହାନଦୀ ଉପରେ ନିର୍ମିତ ୧୬୫୪.୫୪ ମିଟର ଲମ୍ବ ବିଶିଷ୍ଟ ଏହି ସେତୁ ୨୦୦୩ ମସିହାରେ ଉଦ୍ଘାଟିତ ହୋଇଥିଲା। ଗମନାଗମନ ପାଇଁ ବେଶ ଗୁରୁତ୍ୱପୂର୍ଣ୍ଣ ହୋଇ ପଡିଥିବା ଏହି ସେତୁ ଏବେ ପୂର୍ତ୍ତ ବିଭାଗର ପରିଣାମଦର୍ଶିତା ପାଇଁ ହିଁ ମରଣଯନ୍ତା ପାଲଟିଛି। ଦୈନିକ ଦୁର୍ଘଟଣା ଘଟୁଛି। ଲୋକେ ଯାତାୟାତ କରିବାକୁ ବହୁ ଅସୁବିଧା ଭୋଗୁଛନ୍ତି। ମାତ୍ର କର୍ତ୍ତୃପକ୍ଷଙ୍କର ଏଥିପ୍ରତି ଦୃଷ୍ଟି ନାହିଁ। ଲୋକପ୍ରତିନିଧି ମଧ୍ୟ ଚୁପ୍। କଂକ୍ରିଟ୍ ସେତୁ ଉପରେ ନୂଆ ପିଚୁ କରିବା ପାଇଁ ପୂର୍ତ୍ତ ବିଭାଗ ୨କୋଟି ଟଙ୍କାର ବ୍ୟୟ ଅଟକଳ ପ୍ରସ୍ତୁତ କରି ଟେଣ୍ଡର ଆହ୍ବାନ କରିଥିଲା। ଠିକାଦାର ଟେଣ୍ଡର ପାଇବା ପରେ ମାର୍ଚ୍ଚ ମାସ ପ୍ରଥମ ସପ୍ତାହରେ ସେତୁ ଉପରେ ଥିବା ପୁରୁଣା ପିଚୁ ରାସ୍ତାକୁ ଖୋଳି ପକାଇଲେ। କିନ୍ତୁ ତା ପରଠାରୁ କାମ ବନ୍ଦ ରହିଛି। ୟାଭିତରେ ୪ ମାସ ବିତିଲାଣି। ଅସୁରକ୍ଷିତ ଅବସ୍ଥାରେ ଲୋକେ ପୋଲ ଉପରେ ଯାତାୟାତ କରୁଛନ୍ତି। ସେତୁର ୩୯ଟି ପିଲର ଜଏଣ୍ଟ ସ୍ଥାନରେ ହମ୍ପସ୍ ଭଳି ଉଚ୍ଚ ସ୍ଥାନ ଥିବାରୁ ଖାଲଖମା ରାସ୍ତାରେ ବାଇକ୍ ଓ ସାଇକେଲ ଆରୋହୀ ଅଧିକ ଅସୁବିଧା ଭୋଗୁଛନ୍ତି। ଅଜଣା ଲୋକଟିଏ ମଧ୍ୟମ ଗତିରେ ଆସିଲେ ମଧ୍ୟ ଦୁର୍ଘଟଣାର ଶିକାର ହେଉଛି। ଏ ସମ୍ପର୍କରେ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ଇଂ. ଅସିତ କୁମାର ବଡପଣ୍ଡା କୁହନ୍ତି ପିଚୁ ଖୋଳା ଯିବା ସମୟରେ ଜଣାପଡିଲା ସେତୁ ନିର୍ମାଣରେ ତ୍ରୁଟି ରହିଛି। ସେତୁ ମଝି ପୁରୁଣା ସ୍ଲାବ୍ ବଙ୍କା ଅଛି। ତେଣୁ ପୁରୁଣା ଏଷ୍ଟିମେଟ୍ରେ ଠିକାଦାର କାମ କଲେ ସେତୁ ଉପର ରାସ୍ତା ସମତଳ ହେବନି। ବିଭାଗ ପକ୍ଷରୁ ରିଭାଇଜଡ୍ ଏଷ୍ଟିମେଟ୍ ପ୍ରସ୍ତୁତ କରାଯାଇ ଉପରିସ୍ଥ ଅଧିକାରୀଙ୍କୁ ପ୍ରଦାନ କରାଯାଇଛି। ମଞ୍ଜୁରୀ ମିଳିଲେ କାମ ଆରମ୍ଭ ହେବ। ତେବେ ଟେଣ୍ଡର ହୋଇ କାମ ଆରମ୍ଭ ପରେ ରିଭାଇଜଡ୍ ଏଷ୍ଟିମେଟ୍ ପ୍ରସ୍ତୁତ କରିବା ଠିକାଦାରଙ୍କ ସ୍ବାର୍ଥ ପାଇଁ ଉଦ୍ଦିଷ୍ଟ ବୋଲି ସାଧାରଣରେ ଅଭିଯୋଗ ହେଉଛି।
