ଶ୍ରୀନଗର,୨୫।୬: ପାକ୍ ଅଧିକୃତ କଶ୍ମୀର(ପିଓକେ)ରେ ପୁଣି ପାକିସ୍ତାନ ସୈନ୍ୟ ବାହିନୀ ଆରମ୍ଭ କରିଛି ଆତଙ୍କବାଦୀ ଅନୁପ୍ରବେଶ ପ୍ରସ୍ତୁତି। ଏଠାରେଥିବା ୧୧ଟି ଲଞ୍ଚ୍ପ୍ୟାଡ୍ରେ ୩ ଶହରୁ ଅଧିକ ଆତଙ୍କବାଦୀଙ୍କୁ ଏକତ୍ରିତ କରାଯାଇଛି। ସୁଯୋଗ ଦେଖି ଭାରତରେ ଅନୁପ୍ରବେଶ ପାଇଁ ଆତଙ୍କବାଦୀମାନେ ଯୋଜନା କରୁଛନ୍ତି। ଏନେଇ ଭାରତୀୟ ଗୋଇନ୍ଦା ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଛି। ନିୟନ୍ତ୍ରଣ ରେଖାର ପୁଞ୍ଚ୍ ଏବଂ ନୌଶେରା ସେକ୍ଟରରେ ଅଧିକ ଆତଙ୍କବାଦୀଙ୍କୁ ଏକତ୍ରିତ କରାଯାଇଛି। ଏସବୁ ଲଞ୍ଚ୍ ପ୍ୟାଡ୍ରେ ଲଶ୍କର-ଇ-ତୋଏବା, ଅଲ୍ ବଦର ଏବଂ ଜୈଶ୍-ଇ-ମହମ୍ମଦ୍ ସଂଗଠନର ତାଲିମପ୍ରାପ୍ତ ଆତଙ୍କବାଦୀଙ୍କୁ ଏକତ୍ରିତ କରାଯାଇଥିବା ଗୋଇନ୍ଦା ରିପୋର୍ଟରେ ଦର୍ଶାଯାଇଛି। ପୁଞ୍ଚ୍ରେ ୫୧ ଆତଙ୍କବାଦୀଙ୍କୁ ଏକତ୍ରିତ କରାଯାଇଥିବାବେଳେ ନୌଶେରା ସେକ୍ଟରରେ ୫୩ ଆତଙ୍କବାଦୀ ଅନୁପ୍ରବେଶ ପାଇଁ ସୁଯୋଗକୁ ଅପେକ୍ଷା କରିଛନ୍ତି। ସେହିପରି ସେକ୍ଟରରେ ୧୪, ତଙ୍ଗଧାରରେ ୧୯, କେରନ୍ରେ ୧୪, ଉରିରେ ୨୫, ନୌଗାମ୍ରେ ୨୫ ଏବଂ ଗୁଲମାର୍ଗର ସଟେ ସେକ୍ଟରରେ ୩୪ ଆତଙ୍କବାଦୀ ଆଇଏସ୍ଆଇ ଇଶାରାକୁ ଚାହିଁ ବସିଛନ୍ତି। ସାମ୍ବା ସେକ୍ଟରରେ ୯ ଏବଂ ରାମଗଢ଼ ସେକ୍ଟରରେ ୧୫ ଆତଙ୍କବାଦୀ ଭାରତରେ ଅନୁପ୍ରବେଶ ଲାଗି ଯୋଜନା ପ୍ରସ୍ତୁତ କରୁଥିବା ରିପୋର୍ଟରେ କୁହାଯାଇଛି। ଏହାକୁ ଦୃଷ୍ଟିରେ ରଖି ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।
