ନୂଆଦିଲ୍ଲୀ,୬-୯:କଶ୍ମୀର ସମ୍ପର୍କିତ କେନ୍ଦ୍ରର ନିଷ୍ପତ୍ତିକୁ ମାସେ ପୂରିଥିବାବେଳେ ଏହି ପ୍ରସଙ୍ଗକୁ ନେଇ ଭାରତ-ପାକିସ୍ତାନ ମଧ୍ୟରେ ଉତ୍ତେଜନା ପ୍ରଶମିତ ହୋଇନାହିଁ। ଅନ୍ତର୍ଜାତୀୟ ସମୁଦାୟ ନିକଟରେ କଶ୍ମୀର ପ୍ରସଙ୍ଗ ଉଠାଇ ବିଫଳ ହେବା ପରେ ପାକିସ୍ତାନ ଏବେ ଜମ୍ମୁ-କଶ୍ମୀର ସଂଲଗ୍ନ ନିୟନ୍ତ୍ରଣରେଖା (ଏଲ୍ଓସି)କୁ ଅଧିକ ୨ ହଜାରରୁ ଊର୍ଦ୍ଧ୍ୱ ସୈନ୍ୟଙ୍କୁ ପଠାଇଛି। ପ୍ରତିପକ୍ଷ ସୈନ୍ୟ ପାକ୍-ଅଧିକୃତ କଶ୍ମୀର (ପିଓକେ)ର ବାଗ୍ ଓ କୋଟ୍ଲି ସେକ୍ଟରର ନିକଟତର ହୋଇଛନ୍ତି ବୋଲି ଗୁରୁବାର ଭାରତୀୟ ସେନା ପକ୍ଷରୁ ସ୍ପଷ୍ଟ କରାଯାଇଛି। ସେହିପରି ଉପତ୍ୟକାରେ ଆତଙ୍କ ଖେଳାଇ ଅସ୍ଥିରତା ସୃଷ୍ଟି ପାଇଁ ସୀମା ସେପଟେ ୧୦ ହଜାର ଆତଙ୍କବାଦୀଙ୍କ ପାଇଁ ଭ୍ରାମ୍ୟମାଣ ଶିବିର ପ୍ରତିଷ୍ଠା କରିଥିବା ଗୋଇନ୍ଦା ରିପୋର୍ଟ ମିଳିଛି।
ମିଳିଥିବା ସୂଚନାନୁସାରେ ୨ ହଜାରରୁ ଊର୍ଦ୍ଧ୍ୱ ପାକିସ୍ତାନୀ ସୈନ୍ୟ ଏଲ୍ଓସି ଆଡ଼କୁ ଅଗ୍ରସର ହେଉଛନ୍ତି। ସେମାନେ ଏବେ ଭାରତ-ପାକିସ୍ତାନ ସୀମାରୁ ୩୦ କି.ମି. ଦୂରରେ ରହିଛନ୍ତି। ପାକିସ୍ତାନୀ ସେନା ଆତଙ୍କବାଦୀଙ୍କୁ ସକ୍ରିୟ କରିଥିବାବେଳେ ଲଶ୍କର-ଇ-ତୋଇବା (ଏଲ୍ଇଟି) ଏବଂ ଜୈଶ୍-ଇ-ମହମ୍ମଦ (ଜେଇଏମ୍) ସ୍ଥାନୀୟ ଓ ଆଫଗାନ ଯୁବକଙ୍କୁ ବ୍ୟାପକ ନିଯୁକ୍ତି ଦେଉଛି। ଜମାତ୍-ଇ-ଇସ୍ଲାମୀ ପିଓକେରେ ଆତଙ୍କବାଦୀଙ୍କ ଅସ୍ଥାୟୀ ତଥା ଭ୍ରାମ୍ୟମାଣ ଶିବିର ପ୍ରତିଷ୍ଠାର ନେତୃତ୍ୱ ନେଉଛି। ରାଓ୍ବଲକୋଟର ତର୍ନୁତି ଓ ପୋଥି ବାଲାରେ ଏହି ସଙ୍ଗଠନ ପକ୍ଷରୁ ନବନିଯୁକ୍ତ ଆତଙ୍କବାଦୀଙ୍କ ବ୍ରେନ୍ଓ୍ବାଶ୍ କରାଯାଉଛି। ଖାଇବର-ପାଖ୍ତୁନ୍ଖ୍ବା ପ୍ରଦେଶର ଓ୍ବାଜିରିସ୍ତାନ ଅଞ୍ଚଳରୁ ୧୦,୦୦୦ ଆତଙ୍କବାଦୀଙ୍କୁ ଉପତ୍ୟକାରେ ଅନୁପ୍ରବେଶ କରାଇବା ପାଇଁ ପାକିସ୍ତାନର କୁଖ୍ୟାତ ଗୋଇନ୍ଦା ସଂସ୍ଥା ଇଣ୍ଟର-ସର୍ଭିସେସ୍ ଇଣ୍ଟେଲିଜେନ୍ସ (ଆଇଏସ୍ଆଇ) ଉଦ୍ୟମ କରୁଛି। ସେନା ଆତଙ୍କବାଦୀଙ୍କୁ ଅସ୍ତ୍ରଶସ୍ତ୍ର ଯୋଗାଇ ତାଲିମ ଦେଉଥିବାବେଳେ ହିଜ୍ବୁଲ ମୁଜାହିଦ୍ଦିନ କମାଣ୍ଡର ଶମ୍ଶେର ଖାନ୍ ସେମାନଙ୍କ ଅନୁପ୍ରବେଶର ନେତୃତ୍ୱ ନେଉଛନ୍ତି। ପିଓକେରେ ଥିବା ୧୮ଟି ଲଞ୍ଚ୍ ପ୍ୟାଡ୍କୁ ଭାରତୀୟ ଗୋଇନ୍ଦା ସଂସ୍ଥାଗୁଡ଼ିକ ଚିହ୍ନଟ କରିଥିବା ଜଣାପଡ଼ିଛି। ଶତ୍ରୁପକ୍ଷର ଗତିବିଧି ଉପରେ ଭାରତୀୟ ସେନା କଡ଼ା ନଜର ରଖିଛି। ଅନୁଚ୍ଛେଦ ୩୭୦ ଉଚ୍ଛେଦ ପରେ ୧୦୦ରୁ ଊର୍ଦ୍ଧ୍ୱ ଏସ୍ଏସ୍ଜି କମାଣ୍ଡୋ ଏଲ୍ଓସିରେ ମୁତୟନ ଥିବାବେଳେ ଗୁଜରାଟସ୍ଥିତ କଚ୍ଛର ସାର୍ କ୍ରିକ୍ ଏରିଆରେ ବହୁସଂଖ୍ୟକ ସ୍ପେଶାଲ ଫୋର୍ସଙ୍କୁ ନିୟୋଜିତ କରିଛି ପାକିସ୍ତାନ। ଶୀତ ଋତୁ ପୂର୍ବରୁ ଆତଙ୍କବାଦୀଙ୍କ ଅନୁପ୍ରବେଶ ସୁଗମ କରିବା ଲାଗି ପାକିସ୍ତାନୀ ସୈନ୍ୟ ସୀମାରେ ଅସ୍ତ୍ରବିରତି ଉଲ୍ଲଂଘନ ପାଇଁ ଯୋଜନା କରିଥିବା କୁହାଯାଉଛି।
