ବାରିପଦା ଅଫିସ,୨୦ା୨- ବାରିପଦାସ୍ଥିତ ପଣ୍ଡିତ ରଘୁନାଥ ମୁର୍ମୁ ମେଡ଼ିକାଲ କଲେଜ ଓ ହସପିିଟାଲ୍ (ପିଆରଏମ୍)ର ଅଧୀକ୍ଷକ ବୈକୁଣ୍ଡ ନାଥ ମହାପାତ୍ରଙ୍କ ବହିଷ୍କାର ଦାବିରେ ଭଞ୍ଜସେନା ପକ୍ଷରୁ ବୁଧବାର ମେଡ଼ିକାଲ ଆଗରେ ଧାରଣା ଦିଆଯିବା ସହିତ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏପରିକି ଅଧୀକ୍ଷକଙ୍କୁ ମେଡ଼ିକାଲ୍ ଭିତରକୁ ଭଞ୍ଜସେନାର କର୍ମକର୍ତ୍ତା ଛାଡ଼ି ନ ଥିଲେ। ଫଳରେ ବାଧ୍ୟ ହୋଇ ଅଧୀକ୍ଷକ ଫେରି ଯାଇଥିବା ଦେଖିବାକୁ ମିଳିଥିଲା।
ଉଲ୍ଲେଖଯୋଗ୍ୟ ଯେ, ମେଡ଼ିକାଲରେ ବିପର୍ଯ୍ୟସ୍ତ ସ୍ବାସ୍ଥ୍ୟସେବା ଓ ଅନିୟମିତତା ବିରୋଧରେ ଗତ ୩ ତାରିଖରେ ଅଧୀକ୍ଷକଙ୍କ ବହିଷ୍କାର ଦାବିରେ ଭଞ୍ଜସେନା ପକ୍ଷରୁ ଜିଲା ପ୍ରଶାସନ ଜରିଆରେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯାଇଥିଲା। ସ୍ବାସ୍ଥ୍ୟସେବାରେ ୫-ଟି ଲାଗୁ ହୋଇଥିବା ବେଳେ ମେଡ଼ିକାଲର ଅଧୀକ୍ଷକ (ସୁପରିଣ୍ଟେଣ୍ଡଣ୍ଟ) ଓ କର୍ମଚାରୀ ସମୂହ ଏହାକୁ ମାନୁ ନାହାନ୍ତି। ଠିକ୍ ଭାବେ ମେଡ଼ିକାଲରେ କାର୍ଯ୍ୟ ହେଉ ନ ଥିବା ଯୋଗୁଁ ଦୂର ଦୂରାନ୍ତରୁ ଆସୁଥିବା ରୋଗୀ ଓ ସାଧାରଣ ଲୋକଙ୍କ ଉପରେ ଏହାର ପ୍ରଭାବ ପଡ଼ୁଛି। ସେହିଭଳି ମେଡିକାଲ୍ରେ ଯଦି କୌଣସି ଅବ୍ୟବସ୍ଥା ଦେଖା ଦିଏ ତାହେଲେ ଅଧୀକ୍ଷକ ଏହାର ସମାଧାନ କରୁ ନାହାନ୍ତି। ତେଣୁ ଅଧୀକ୍ଷକଙ୍କୁ ବହିଷ୍କାର ନେଇ ଭଞ୍ଜସେନା ଉଭୟ ଜିଲା ପ୍ରଶାସନ ଓ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରାଯାଇଥିଲେ ମଧ୍ୟ କୌଣସି ନିଷ୍ପତ୍ତି ହୋଇ ନ ଥିବାରୁ ବୁଧବାର ସକାଳ ୯ଟାରେ ସେନାର ସଭାପତି ପିଣ୍ଟୁ ମାଇତିଙ୍କ ନେତୃତ୍ୱରେ ଶତାଧିକ କାର୍ଯ୍ୟକର୍ତ୍ତା ମେଡ଼ିକାଲ କଲେଜ ଓ ହସ୍ପିଟାଲ୍ର ମୁଖ୍ୟ ଦ୍ୱାରରେ ବିକ୍ଷୋଭ ପ୍ରଦର୍ଶନ କରିଥିଲେ। ଅଧୀକ୍ଷକ ଗୋ ବ୍ୟାକ୍ ଗୋ ବ୍ୟାକ୍ ନାରାବାଜି ଦେଇଥିଲେ। ୯ଟା ୩୦ ସମୟରେ ଅଧୀକ୍ଷକ ବିରଞ୍ଚି କୁମାର ମହାପାତ୍ର ହସ୍ପିଟାଲ ପରିସରକୁ ଯାଉଥିବା ବେଳେ ସେନାର କର୍ମକର୍ତ୍ତା ତାଙ୍କୁ ଭିତରକୁ ଛାଡ଼ି ନ ଥିଲେ। ଆଗାମୀ ଦିନରେ ମଧ୍ୟ ଏହିଭଳି ବିକ୍ଷୋଭ କରାଯିବ ବୋଲି ସେନା ପକ୍ଷରୁ ସୂଚନା ଦିଆଯାଇଛି। ମୟୂରଭଞ୍ଜବାସୀ ଓ ଗରିବ ରୋଗୀମାନଙ୍କ ସାମୁହିକ ସ୍ବାର୍ଥକୁ ଦୃଷ୍ଟିରେ ରଖି ମାର୍ଚ୍ଚ ୨୫ ତାରିଖରେ ୧୨ ଘଣ୍ଟିଆ ବାରିପଦା ସହର ବନ୍ଦ କରାଯିବ ବୋଲି ସେନାର ସହର ସଭାପତି ସୌମ୍ୟରଞ୍ଜନ ମିଶ୍ର ପ୍ରକାଶ କରିଛନ୍ତି। ଯୁବ ଛାତ୍ର ସଂଯୋଜନ ରାକେଶ ବେହେରା, ସମ୍ପାଦକ ରାକେଶ ମହାନ୍ତିି, ଉପସଭାପତି ପ୍ରଶାନ୍ତ ମହାକୁଡ଼, ସାଧାରଣ ସମ୍ପାଦକ ମାନସ ବେହେରା, ସହର ଉପସଭାପତି ଏସ୍. କେ. ରାଜା ଖାନ, ଉପାଧ୍ୟକ୍ଷ ଲାଲ ବାହାଦୁର ମହାନ୍ତି, ଦୀପେଶ ଅଗ୍ରୱାଲ, ନିମାଇଁ ତ୍ରିପାଠୀ ପ୍ରମୁଖ ନେତୃମଣ୍ଡଳୀ ଓ କର୍ମୀମାନେ ବିକ୍ଷୋଭରେ ଉପସ୍ଥିତ ଥିଲେ।