ଖଜୁରିପଡା,୨୦ା୫(ଡି.ଏନ.ଏ.)-କନ୍ଧମାଳ ଜିଲା ଖଜୁରିପଡା ବ୍ଲକ ବିଲାବାଡି ପଞ୍ଚାୟତର ମେଣିଆଁକୋଠି ଗାଁ। ଜଙ୍ଗଲ ଘେରା ଏହି ଗାଁରେ ୧୫ ପରିବାର ରହୁଥିବାବେଳେ ଜନସଂଖ୍ୟା ୬୦ରୁ ୭୦। ସ୍ବାଧୀନତାର ୭୨ବର୍ଷ ବିତିଥିଲେ ମଧ୍ୟ ଗାଁକୁ ପକ୍କାରାସ୍ତା, ପାନୀୟଜଳ ଓ ବିଦ୍ୟୁତ୍ ବ୍ୟବସ୍ଥା ନାହିଁ। ଭୋଟ ଆସିଲେ ନେତାଙ୍କ ପାଦପଡେ, ବହୁ ପ୍ରତିଶ୍ରୁତି ମିଳେ, ମାତ୍ର ଭୋଟ ସରିଗଲେ ଆଉ ଦେଖା ମିଳେନାହିଁ। ଏବେ ଏହି ଗାଁ ଖଜୁରିପଡା ବ୍ଲକ ବିଲାବାଡି ପଞ୍ଚାୟତରୁ ବାହାର କରାଯାଇ ଫୁଲବାଣୀ ବ୍ଲକ ତୁଡିପାଜୁ ପଞ୍ଚାୟତରେ ସାମିଲ କରାଯାଇଥିବା ଶୁଣିବାକୁ ମିଳୁଛି। ମାତ୍ର ଗ୍ରାମବାସୀ ଏବେବି ମୌଳିକ ସମସ୍ୟାରୁ ବଞ୍ଚତ୍ତ। ଗାଁକୁ ପକ୍କା ରାସ୍ତା ନ ଥିବାବେଳେ ଲୋକେ ଜଙ୍ଗଲ ରାସ୍ତା ଦେଇ ଯାତାୟାତ କରୁଛନ୍ତି।
ପିଇବା ପାଣିର ବ୍ୟବସ୍ଥା ନଥିବାରୁ ନାଳ, ଝରଣା ଓ ଚୁଆ ଉପରେ ନିର୍ଭର କରିଥାନ୍ତି ଗ୍ରାମବାସୀ। ଖରାଦିନରେ ଅବସ୍ଥା ଶୋଚନୀୟ ହୋଇପଡେ। ପିଡିଏସ୍ ଚାଉଳ ପାଇଁ ୧୦ କିମି ଦୂର ଭେଟଖୋଲ ଚାଲିକି ଯିବାକୁ ପଡୁଛି ବୋଲି କହିଛନ୍ତି ଗ୍ରାମବାସୀ। କିଛିଦିନ ତଳେ ଗ୍ରାମର ସମସ୍ୟା ନେଇ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ଫୁଲବାଣୀ ବିଡିଓ ସୁବ୍ରତ କୁମାର ଜେନା ଓ ବ୍ଲକ ଅଧ୍ୟକ୍ଷା ମଞ୍ଜୁ କହଁର ଗାଁକୁ ଯାଇ ସମସ୍ୟାର ଅନୁଧ୍ୟାନ କରିଥିଲେ। ସେଠାରୁ ଆସି ଅବ୍ୟବସ୍ଥା ସମ୍ପର୍କରେ ଜିଲାପାଳଙ୍କୁ ଅବଗତ କରାଇଥିଲେ। ଜିଲାପାଳ ଡ. ବୃନ୍ଦା ଡି ଗ୍ରାମ ଲୋକଙ୍କୁ ଡକାଇ ସେଠାରୁ ପାଖ ପଡିଶା ଗ୍ରାମକୁ ଯାଇ ଥଇଥାନ ହେବାକୁ ପରାମର୍ଶ ଦେଇ ଜାଗା ଓ ବାସଗୃହ ଦିଆଯିବ ବୋଲି କହିଥିଲେ। କିନ୍ତୁ ଗ୍ରାମବାସୀ କହିବା କଥା, ସେଠାରେ ଆମର ଜମିବାଡି, ଘରଦ୍ୱାର ଅଛି ଆମେ ଅନ୍ୟକୁଆଡେ ଯିବୁନାହିଁ। ତୁରନ୍ତ ଏଥିପ୍ରତି ଦୃଷ୍ଟି ଦେଇ ସମସ୍ୟାର ସମାଧାନ କରିବାକୁ ଗ୍ରାମବାସୀ ଦାବି କରିଛନ୍ତି। ଫୁଲବାଣି ବ୍ଲକର ତୁଡିପାଜୁ ପଞ୍ଚାୟତ ନୂଆ ପଞ୍ଚାୟତ। ଏଥିରେ ଆମ୍ଭ ଗ୍ରାମକୁ ମିଶାଯାଇଥିବାରୁ ଆହୁରି ଅଡୁଆ ହେଲା। ସୁଡ୍ରେଜୁ ପଞ୍ଚାୟତ ବରଂ ଭଲ ଥିଲା ବୋଲି କହିଛନ୍ତି ଗ୍ରାମବାସୀ। ଫୁଲବାଣୀ ବ୍ଲକ ଓ ତୁଡିପାଜୁ ପଞ୍ଚାୟତକୁ ଯଦି ଆମ୍ଭମାନଙ୍କୁ ନିଆଯାଇଛି। ଯଥାଶୀଘ୍ର ସମସ୍ୟା ଦୂର କରି ରାସ୍ତା କରିଦେଲେ ଆମ୍ଭେ ମାନେ ଉନ୍ନତି କରିପାରିବୁ ବୋଲି କହିଥିଲେ।
