ବଅଁରପାଳ,୨।୧(ଡି.ଏନ.ଏ.) – ବଅଁରପାଳ ବ୍ଲକ ତଳମୂଳ ଗ୍ରାମରେ ପାନୀୟ ଜଳ ଯୋଗାଣ ବ୍ୟବସ୍ଥାର ବିଚିତ୍ର ଦୃଶ୍ୟ ଦେଖିବାକୁ ମିଳିଛି। ପାନୀୟ ଜଳ ମୁନ୍ଦେ ପାଇଁ ଅନେକ ସ୍ଥାନରେ ଲୋକ ଡହଳ ବିକଳ ହେଉଥିବାବେଳେ ଏଠାରେ ଅନବରତ ପାଣି ପ୍ରବାହିତ ହୋଇ କୃତ୍ରିମ ବନ୍ୟା ପରିସ୍ଥିତି ସୃଷ୍ଟି ହେଉଛି। ଗ୍ରାମରେ ସ୍ଥାପନ କରାଯାଇଥିବା ପାଣି ପଏଣ୍ଟରେ ଟ୍ୟାପ୍ ନ ଥିବାରୁ ଏପରି ସମସ୍ୟା ସୃଷ୍ଟି ହୋଇଥିବା ଜଣାପଡ଼ିଛି।
ଅଞ୍ଚଳବାସୀଙ୍କ କହିବା କଥା, ତଳମୂଳ ଗ୍ରାମରେ ଲୋକଙ୍କୁ ପାନୀୟ ଜଳ ଯୋଗାଇ ଦେବା ପାଇଁ ପାଇପ ପାଣିର ବ୍ୟବସ୍ଥା କରାଯାଇଛି। ତଳମୂଳ ଶାସନ, ଗଡ଼ ତଳମୂଳ ଏବଂ ପାଟଣା ସାହିରେ ୭୦ରୁ ଊର୍ଦ୍ଧ୍ୱ ପାଣି ପଏଣ୍ଟ ମାନ ସ୍ଥାପନ ହୋଇଛି। ସେଥିମଧ୍ୟରୁ ୨୦ରୁ ଊର୍ଦ୍ଧ୍ୱ ପଏଣ୍ଟରେ ଟ୍ୟାପ ନାହିଁ। ଫଳରେ ଉକ୍ତ ସ୍ଥାନଗୁଡ଼ିକରୁ ଅନବରତ ପାଣି ବୋହି ଚାଲୁଛି। ଡ୍ରେନ୍ ନ ଥିବାରୁ ଉକ୍ତ ପାଣି ପାଟଣାଠାରୁ ଗଡ଼ତଳମୂଳ ପର୍ଯ୍ୟନ୍ତ ପ୍ରାୟ ୬୦୦ ମିଟର ପର୍ଯ୍ୟନ୍ତ ରାସ୍ତାରେ ଜମି ରହୁଛି। ଏହାଦ୍ୱାରା ପରିବେଶ ଦୂଷିତ ହେବା ସହ ମଶାବଂଶ ବୃଦ୍ଧି ପାଇବାରେ ଲାଗିଛି। ରାସ୍ତାରେ ପାଣି ଜମିବା ଯୋଗୁ ଯାତାୟାତରେ ସମସ୍ୟା ସୃଷ୍ଟି ହେଉଛି। ତୁରନ୍ତ ଉକ୍ତ ପାଣି ପଏଣ୍ଟ ଗୁଡ଼ିକରେ ଟ୍ୟାପ ଲଗାଇବା ପାଇଁ ଗ୍ରାମବାସୀ ଦାବି କରିଛନ୍ତି। ଏ ନେଇ ବିଡିଓ ଡ. ସ୍ବରୂପାନନ୍ଦ ସାହୁ କୁହନ୍ତି, ବିଭାଗୀୟ ଅଧିକାରୀଙ୍କୁ ଘଟଣାସ୍ଥଳକୁ ପଠାଯିବ। ସମସ୍ୟାର ତୁରନ୍ତ ସମାଧାନ କରାଯିବ।
