ଛେଣ୍ଡିପଦା,୧୦ା୭(ସ୍ବ.ପ୍ର.)-ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କୁ ରାଜ୍ୟ ସରକାର ମାଗଣାରେ ପାଠ୍ୟ ପୁସ୍ତକ ଯୋଗାଇ ଦେଉଛନ୍ତି। ସେହିପରି ସ୍ବାସ୍ଥ୍ୟର ଯତ୍ନ ପାଇଁ ଆଇରନ ଓ କୃମି ନାଶକ ଔଷଧ ମଧ୍ୟ ସ୍କୁଲଗୁଡ଼ିକରେ ବଣ୍ଟନ କରାଯାଉଛି। ହେଲେ ଛେଣ୍ଡିପଦା ସଦର ମହକୁମାରେ ବନ୍ଦ ପଡ଼ିଥିବା ଏକ ପ୍ରାଥମିକ ବିଦ୍ୟାଳୟ ଗୋଦାମରେ ରଖାଯାଇଥିବା ପାଠ୍ୟ ପୁସ୍ତକ ଏବଂ ଔଷଧ ମଧ୍ୟରୁ କେତେକକୁ ବାହାରେ ପୋଡ଼ି ଦିଆଯାଇଥିବା ସୋମବାର ଅଭିଯୋଗ ହୋଇଛି। ଏ ନେଇ ଖବରପାଇବା ପରେ ବ୍ଲକ ଶିକ୍ଷା ଅଧିକାରୀ ଈଶ୍ବର ଚନ୍ଦ୍ର ସାହୁ ତୁରନ୍ତ ଘଟଣାର ସତ୍ୟାସତ୍ୟ ଅନୁସନ୍ଧାନ ପାଇଁ ନିର୍ଦ୍ଦେଶ ଦେଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ଉକ୍ତ ପୁରାତନ ସ୍କୁଲକୁ ରାଜ୍ୟ ସରକାରଙ୍କ ପକ୍ଷରୁ ବନ୍ଦ କରି ଦିଆଯାଇଛି। ଛେଣ୍ଡିପଦା କ୍ଲଷ୍ଟରର ପୂର୍ବତନ ସିଆରସିସି ନିକୁଞ୍ଜ ସାହୁ ଉକ୍ତ ସ୍କୁଲକୁ ଗୋଦାମ କରି ସେଠାରେ ବ୍ଲକର ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କ ପାଇଁ ଆସିଥିବା ପାଠ୍ୟପୁସ୍ତକ ଓ ଔଷଧ ଗଚ୍ଛିତ ରଖିଥିଲେ। ତେବେ ଉକ୍ତ ସ୍କୁଲ ଗୋଦମ ଗୃହରୁ ବହୁ ପାଠ୍ୟପୁସ୍ତକ, ଔଷଧ ଆଣି କେହି ବାହାରେ ପୋଡ଼ି ଦେଇଥିବା ସାଧାରଣରେ ଅଭିଯୋଗ ହେଉଛି। ଏପରି କି ଶ୍ରେଣୀ ଗୃହ ବାହାରେ କେତେକ ପୁସ୍ତକ ଏତେତେଣେ ପଡ଼ି ବର୍ଷାରେ ଭିଜି ଯାଇଥିବା ଦେଖିବାକୁ ମିଳିଛି। କେଉଁ ପରିସ୍ଥିତିରେ ପିଲାମାନଙ୍କୁ ବଣ୍ଟନ କରାଯିବାକୁ ଥିବା ନୂଆ ଓ କିଛି ପୁରୁଣା ପୁସ୍ତକକୁ ପୋଡ଼ି ଦିଆଗଲା ତାହା ଏବେ ଚର୍ଚ୍ଚାର ବିଷୟ ହୋଇଛି। ଏ ନେଇ ବ୍ଲକ ଶିକ୍ଷା ଅଧିକାରୀ ସାହୁ କହିଛନ୍ତି, ଘଟଣା ଜଣାପଡ଼ିବା ପରେ ସତ୍ୟାସତ୍ୟ ଅନୁସନ୍ଧାନ ପାଇଁ ଅତିରକ୍ତ ବ୍ଲକ ଶିକ୍ଷା ଅଧିକାରୀ ଶରତ ଚନ୍ଦ୍ର ଗଡନାୟକଙ୍କୁ ନିର୍ଦ୍ଦେଶ ଦିଆଯାଇଛି। ତଦନ୍ତ ପରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶିକ୍ଷା ଅଧିକାରୀ ପ୍ରକାଶ କରିଛନ୍ତି।
