ବ୍ରହ୍ମପୁର ଅଫିସ,୧ା୨ – ଗୋପାଳପୁର ବେଳାଭୂମି ପ୍ରତି ପର୍ଯ୍ୟଟକଙ୍କୁ ଆକୃଷ୍ଟ କରାଇବା ନିମନ୍ତେ ବିକ୍ରମପୁରଠାରେ ରାଜ୍ୟର ତୃତୀୟ ପ୍ଲାନେଟାରିୟମ ଓ ସାଇନ୍ସ ପାର୍କ ନିର୍ମାଣ ପାଇଁ ଯୋଜନା ହୋଇଛି । ହେଲେ କାର୍ଯ୍ୟରେ ଅଗ୍ରଗତି ହେଉ ନ ଥିବାରୁ ଏହା କେବଳ ଘୋଷଣାରେ ରହିଯିବା ଭଳି ମନେହେଉଛି। ପ୍ଲାନେଟାରିୟମ ପାଇଁ ଗତ ମାର୍ଚ୍ଚରୁ ପାଚେରି ନିର୍ମାଣ କାର୍ଯ୍ୟ ସରିଥିଲେ ମଧ୍ୟ ଆଉ ପଥର ଖଣ୍ଡିଏ ମଧ୍ୟ ପଡିନାହିଁ । ଫଳରେ ପ୍ଲାନେଟାରିୟମ ଓ ସାଇନ୍ସ ପାର୍କ ପ୍ରକଳ୍ପ ବାସ୍ତବ ରୂପ ନେବା ନେଇ ଆଶଙ୍କା ସୃଷ୍ଟି ହୋଇଛି । ଏଥିରୁ ଗଞ୍ଜାମ ଜିଲାର ପର୍ଯ୍ୟଟନ କ୍ଷେତ୍ରର ବିକାଶ ଦିଗରେ ରାଜ୍ୟ ସରକାରଙ୍କ ଉଦାସୀନତା ସ୍ପଷ୍ଟ ପ୍ରତିଫଳିତ ହେଉଥିବା ବୁଦ୍ଧଜୀବୀ ମହଲରେ ପ୍ରତିକ୍ରିୟା ପ୍ରକାଶ ପାଇଛି ।
ପର୍ଯ୍ୟଟନ କ୍ଷେତ୍ରକୁ ଅଧିକ ଆକର୍ଷଣୀୟ କରାଇବା ନେଇ ପଠାଣି ସାମନ୍ତ ପ୍ଲାନେଟାରିୟମ ଢାଞ୍ଚାରେ ଏକ ପ୍ଲାନେଟାରିୟମ ଓ ସାଇନ୍ସ ପାର୍କ ର୍ନିମାଣ ପାଇଁ ଯୋଜନା କରାଯାଇଥିିଲା ।
ଏଥିପାଇଁ ୨୦୧୮ ଜାନୁୟାରୀରେ ବିକ୍ରମପୁରଠାରେ ୧୦ ଏକର ଜାଗା ଚିହ୍ନଟ କରାଯାଇ ୫ ଏକର ଜମିରେ ସାଇନ୍ସ ପାର୍କ ଓ ଅନ୍ୟ ୫ ଏକର ଜମିରେ ପ୍ଲାନେଟାରିୟମ ନିର୍ମାଣ କରାଯିବାକୁ ସ୍ଥିର କରାଯାଇଥିଲା। ଏହାର ନିର୍ମାଣ କାର୍ଯ୍ୟ ଇଡକୋ (ଓଡିଶା ଶିଳ୍ପ ଭିତ୍ତିଭୂମି ବିକାଶ ବିଭାଗ)କୁ ହସ୍ତାନ୍ତର କରାଯାଇଥିଲା। ୧୨ କୋଟି ଟଙ୍କା ବିିନିମୟରେ ହେବାକୁ ଥିବା ଏହି ପ୍ରକଳ୍ପର ପ୍ରଥମ ପର୍ଯ୍ୟାୟରେ କେବଳ ପ୍ଲାନେଟାରିୟମ ପାଚେରି ନିର୍ମାଣ ପାଇଁ ୨୦୧୮ ଏପ୍ରିଲରେ ରାଜ୍ୟ ସରକାରଙ୍କ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗ ୪୯ ଲକ୍ଷ ଟଙ୍କା ଇଡକୋକୁ ହସ୍ତାନ୍ତର କରିଥିଲା। ସେହିବର୍ଷ ନଭେମ୍ବରରୁ ପାଚେରି ନିର୍ମାଣ କାର୍ଯ୍ୟ ଆରମ୍ଭ ହୋଇ ଗତ ମାର୍ଚ୍ଚ ମାସରେ ଶେଷ ହୋଇଥିଲା। ଏହାବ୍ୟତୀତ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗ ପକ୍ଷରୁ ରାଜ୍ୟ ଇଡକୋ କାର୍ଯ୍ୟାଳୟକୁ ସାଇନ୍ସ ପାର୍କର ନିର୍ମାଣ କାର୍ଯ୍ୟ ହାତକୁ ନେବାକୁ ୨୦୧୯ ଫେବୃୟାରୀ ୪ରେ ଏକ ଚିଠି ମାଧ୍ୟମରେ ଅବଗତ କରାଇଥିଲା। ବରଗଡ ଜିଲା ଭଟଲି ବ୍ଲକ ଅନ୍ତର୍ଗତ ଟୁକୁରଲାଠାରେ ଥିବା ସାଇନ୍ସ ପାର୍କ ଢାଞ୍ଚାରେ ସାଇନ୍ସ ପାର୍କ ନିର୍ମାଣ କରିବା ସହ ୬.୫ କୋଟି ଟଙ୍କାର ବ୍ୟୟ ବରାଦ କରାଯିବା ନେଇ ମଧ୍ୟ ଉକ୍ତ ପ୍ରସ୍ତାବିତ ଚିଠିରେ ଦର୍ଶାଇଥିଲା। ଇତିମଧ୍ୟରେ ସାଇନ୍ସ ପାର୍କ ପାଇଁ ଆସିଥିବା ପ୍ରସ୍ତାବିତ ଚିଠି ଓ ପାଚେରି ନିର୍ମାଣକୁ ବର୍ଷେ ବିତିବାକୁ ଯାଉଛି। ତଥାପି ଏହି ପ୍ରକଳ୍ପ ଅଗ୍ରଗତି ତଥା ନିର୍ମାଣ ଦିଗରେ କୌଣସି ପଦକ୍ଷେପ ଗ୍ରହଣ କରାଯାଇ ନାହିଁ। ଅନ୍ୟପକ୍ଷରେ ବ୍ରହ୍ମପୁରସ୍ଥିତ ଇଡକୋ ଆଞ୍ଚଳିକ ମୁଖ୍ୟ ଅଶୋକ କୁମାର ମିଶ୍ରଙ୍କ କହିଛନ୍ତି, ପାଚେରି ନିର୍ମାଣ ପରେ ସାଇନ୍ସ ପାର୍କ ପାଇଁ କେବଳ ପ୍ରସ୍ତାବିତ ଚିଠି ଆସିଥିଲା। କିନ୍ତୁ ଏ ନେଇ ବାରମ୍ବାର ବୈଠକ ବସିଥିଲେ ମଧ୍ୟ ସାଇନ୍ସ ପାର୍କ ଓ ପ୍ଲାନେଟାରିୟମ ନିର୍ମାଣ ପାଇଁ ଅର୍ଥ ସରକାରଙ୍କ ପକ୍ଷରୁ ଆସି ନ ଥିବା ଇଡକୋର ଆଞ୍ଚଳିକ ମୁଖ୍ୟ କହିଛନ୍ତି। ସୂଚନାଯୋଗ୍ୟ, ଗଞ୍ଜାମ ଜିଲାର ଗୋପାଳପୁର ବେଳାଭୂମି ପ୍ରତି ପର୍ଯ୍ୟଟକଙ୍କ ଆକୃଷ୍ଟ କରିବାକୁ ବିଗତ ଦିନରେ ରାଜ୍ୟର ପ୍ରଥମ ରକ୍ ଗାର୍ଡେନ ନିର୍ମାଣ ପାଇଁ ରାଜ୍ୟ ସରକାର ନିଷ୍ପତ୍ତି ନେଇଥିଲେ। ବିଡିଏ ଦ୍ୱାରା ନିର୍ମାଣ ହେଉଥିବା ଏହି ରକ୍ ଗାର୍ଡେନ ନିର୍ମାଣ ପାଇଁ ଅର୍ଥ ପ୍ରଦାନରେ ବିଳମ୍ବ ଯୋଗୁଁ ଦୀର୍ଘ ଦେଢ ବର୍ଷ ଧରି ଏହି ପ୍ରକଳ୍ପ କେବଳ ପାଚେରିରେ ସୀମିତ ରହିଥିଲା। ସେହିପରି ଦୀର୍ଘ ଦେଢ ବର୍ଷରୁ ଉର୍ଦ୍ଦ ସମୟ ପରେ ମଧ୍ୟ ବିଡିଏ ପକ୍ଷରୁ ଗୋପାଳପୁର ଇକୋ ରିଟ୍ରିଟ ହବ କାର୍ଯ୍ୟ ମଧ୍ୟ ଏ ଯାଏଁ ସରିନାହଁ। ଉପରୋକ୍ତ ପ୍ରକଳ୍ପର ନିର୍ମାଣ କାର୍ଯ୍ୟକୁ ଲକ୍ଷ୍ୟ କଲେ ପ୍ଲାନେଟାରିୟମ ଓ ସାଇନ୍ସ ପାର୍କର ବାସ୍ତବତା ରୂପ ନେବା ନେଇ ସନ୍ଦେହ ସୃଷ୍ଟି ହୋଇଛି।
