ସେମିଳିଗୁଡ଼ା, ୨୧।୬(ସ୍ବ.ପ୍ର.) : ପାଇଖାନା ନିର୍ମାଣ ଅର୍ଥ ଆଣିବା ପାଇଁ କୋରାପୁଟ ଜିଲା ସେମିଳିଗୁଡ଼ା ବ୍ଳକ କାର୍ଯ୍ୟାଳୟକୁ ଯାଇଥିବା ଜଣେ ଦିବ୍ୟାଙ୍ଗଙ୍କୁ ସ୍ଥାନୀୟ ବିଡିଓ ଅସଭ୍ୟ ଗାଳିଗୁଲଜ କରିବା ସହ ମାଡ଼ ମାରିଥିବା ଅଭିଯୋଗ ହୋଇଛି। ଏଭଳି ଅଭିଯୋଗ ଧରି ପୀଡ଼ିତ ଦିବ୍ୟାଙ୍ଗ ଜଣକ ନ୍ୟାୟ ପାଇଁ ଗୁରୁବାର ଥାନାର ଦ୍ୱାରସ୍ଥ ହେବା ସହ ବିଡିଓଙ୍କ ନାଁରେ ଏତଲା ଦେଇଛନ୍ତି। ବିଡିଓ ତ୍ରିନାଥ ମାଝି ପ୍ରତିକ୍ରିୟା ଦେଇ କହିଛନ୍ତି, ଚନ୍ଦ୍ର ଖରାଙ୍କୁ ପେମେଣ୍ଟ ଦିଆସରିଛି। କିନ୍ତୁ ସେ ବାରମ୍ବାର ଅଫିସ୍ରେ ଆସି କାର୍ଯ୍ୟରେ ବାଧା ସୃଷ୍ଟି କରୁଛନ୍ତି। ପୂର୍ବରୁ ଏନେଇ ତାଙ୍କୁ ପୋଲିସକୁ ହସ୍ତାନ୍ତର କରିଥିଲୁ। ସେ ମାଓବାଦୀଙ୍କ ସହ ସମ୍ପର୍କ ଥିବା କହି ବାରମ୍ବାର ଧମକ ଦେଉଛନ୍ତି। ଗୁରୁବାର ପୁଣିଥରେ ଅଫିସ୍କୁ ଆସି କାମରେ ବାଧା ଦେବାରୁ କର୍ମଚାରୀଙ୍କୁ କହି ମୁଁ ତାଙ୍କୁ ଅଫିସ୍ରୁ ବାହାର କରିଛି।
ସୂଚନା ଅନୁଯାୟୀ, ସେମିଳିଗୁଡ଼ା ବ୍ଲକ ସୋରିଷପଦର ପଞ୍ଚାୟତ ମୁଷାଗୁଡ଼ା ଗ୍ରାମର ଚନ୍ଦ୍ର ଖରା ଗରିବ ଶ୍ରେଣୀର ହୋଇଥିବା ବେଳେ ବଡ଼ କଷ୍ଟରେ ପରିବାର ଗୁଜୁରାଣ କରନ୍ତି। ସ୍ବଚ୍ଛ ଭାରତ ମିଶନ ଯୋଜନାରେ ଶୌଚାଳୟ ନିର୍ମାଣ କରିବା ପରେ ଏହି କାର୍ଯ୍ୟାଦେଶ ପାଇଁ ପ୍ରଶାସନ ପାଖରୁ ସେ ନିର୍ମାଣ ବାବଦକୁ ୧୨ ହଜାର ଟଙ୍କା ପାଇବାର ଥିଲା। ଏହି ଟଙ୍କା ନେବା ପାଇଁ ସେ ବହୁବାର ବିଡିଓଙ୍କ ପାଖକୁ ଆସି ନିରାଶ ହୋଇ ଫେରୁଥିଲେ। ଗୁରୁବାର ପୁଣି ଥରେ ଚନ୍ଦ୍ର ଖରା ବକେୟା ଅର୍ଥ ପ୍ରଶାସନଠାରୁ ପାଇବା ପାଇଁ ସେମିଳିଗୁଡ଼ା ବିଡିଓ ତ୍ରିନାଥ ମାଝିଙ୍କ ପାଖକୁ ଆସିଥିଲେ। କିନ୍ତୁ ବିଡିଓ ତାଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିବା ସହ ଅଫିସ୍ରୁ ବାହାରିଯିବାକୁ କହିଥିଲେ। ସେ ନ ଶୁଣିବାରୁ ବିଡିଓ ତାଙ୍କୁ ଧକ୍କା ଓ ମାଡ଼ ମାରିବା ଯୋଗୁ ସେ ଆହତ ହୋଇଥିବା ନେଇ ସେମିଳିଗୁଡ଼ା ଥାନାରେ ଦେଇଥିବା ଏତଲାରେ ଦର୍ଶାଇଛନ୍ତି। ଏ ସମ୍ପର୍କରେ ସୁନାବେଡ଼ା ଏସ୍ଡିପିଓ ନିରଞ୍ଜନ ବେହେରାଙ୍କୁ ପଚାରିବାରୁ ସେ କହିଥିଲେ, ସୁନାବେଡ଼ା ଆଇଆଇସିଙ୍କୁ ତଦନ୍ତ ଦାୟିତ୍ୱ ଦିଆଯାଇଛି। ରିପୋର୍ଟ ଆସିବା ପରେ କାର୍ଯ୍ୟାନୁଷ୍ଠାନ ନିଆଯିବ।
