ତିର୍ତ୍ତୋଲ,୨୯ା୫(ଡି.ଏନ୍.ଏ.): ଜଗତସିଂହପୁର ଜିଲା ତିର୍ତ୍ତୋଲ ଥାନା ଅଧୀନ ପାଇକା ନଦୀପଠାରେ କୃଷ୍ଣାନନ୍ଦପୁର ଫାଣ୍ଡିର ଅନତି ଦୂରରୁ ପୋଲିସ ୪ଟି ମଣିଷ ଖପୁରୀ ଜବତ କରିଛି। ଏଥି ସହ ସିନ୍ଦୁର ଲଗାଥିବା କଳସ ଓ ପଇଡ଼ ସେଠାରୁ ପୋଲିସ ପାଇଛି। ଏହାକୁ ନେଇ ସଂପୃକ୍ତ ଅଞ୍ଚଳରେ ନାନା କଥା ଚର୍ଚ୍ଚା ହେଉଛି। ଏହି ଖପୁରୀ କିଏ କାହଁକି ଏଠାକୁ ଆଣିଲା ସେ ସମ୍ପର୍କରେ ପୋଲିସ ଖୋଳତାଡ଼ ଆରମ୍ଭ କରିଛି। ଗୁଣିଗାରେଡ଼ି କିମ୍ବା କୌଣସି ମାନସିକ ବିକୃତ ବ୍ୟକ୍ତି ଏହି କାର୍ଯ୍ୟ କରିଥିବା ପୋଲିସ ସନ୍ଦେହ କରୁଛି। ଏ ସମ୍ପର୍କରେ ଫାଣ୍ଡି ଅଧିକାରୀ ଅନିରୁଦ୍ଧ ନାୟକଙ୍କୁ ପଚାରିବାରୁ ପୋଲିସ ପକ୍ଷରୁ ଖପୁରୀ ଜବତ ସହ ଅନୁସନ୍ଧାନ ଆରମ୍ଭ ହୋଇଛି। କିଛି ସୂଚନା ମିଳିଲେ ମାମଲା ରୁଜୁ ହେବ ବୋଲି କହିଛନ୍ତି।
