ଅରୁଣାଚଳ ପ୍ରଦେଶସ୍ଥିତ ଏକ ଲୋକପ୍ରିୟ ପର୍ଯ୍ୟଟନସ୍ଥଳୀ ହେଉଛି ତଓ୍ବାଙ୍ଗ। ପର୍ଯ୍ୟଟକ ଏଠାରେ ଆକର୍ଷଣୀୟ ପାହାଡି ଗାଁ ସାଙ୍ଗକୁ ମନ କିଣି ନେଲା ଭଳି ଝରଣା ତଥା ଅନେକ ଦର୍ଶନୀୟ ସ୍ଥାନ ସବୁ ଦେଖିବାକୁ ପାଇପାରିବେ। ଖାସ୍କରି ଏଠାକାର ତଓ୍ବାଙ୍ଗ ମଠ ଆଗନ୍ତୁକଙ୍କୁ ବେଶ୍ ଆକର୍ଷିତ କରିଥାଏ…
ତଓ୍ବାଙ୍ଗ ଅରୁଣାଚଳ ପ୍ରଦେଶସ୍ଥିତ ଏମିତି ଏକ ସହର, ଯାହାର ପ୍ରାକୃତିକ ସୌନ୍ଦର୍ଯ୍ୟ ଖୁବ୍ ଆକର୍ଷଣୀୟ। ସମୁଦ୍ରପତ୍ତନଠାରୁ ପ୍ରାୟ ୩,୦୪୮ ମିଟର ଉଚ୍ଚତାରେ ଥିବା ଏହି ସହରରେ ଦେଖିବା ନିମନ୍ତେ ରହିଛି ଅନେକ ଦର୍ଶନୀୟ ସ୍ଥାନ। ଖାସ୍କରି ଏଠାକାର ତଓ୍ବାଙ୍ଗ୍ ମଠ ପର୍ଯ୍ୟଟକଙ୍କୁ ବେଶ୍ ଆକର୍ଷିତ କରିଥାଏ। ସେହିପରି ତଓ୍ବାଙ୍ଗର ସଂସ୍କୃତି ଓ ପରମ୍ପରା ବି ବେଶ୍ ମନଛୁଆଁ। ଫଳରେ ଏଠାକୁ ବୁଲିଗଲେ ଅନେକ ଅନୁଭୂତି ସାଉଁଟିବାର ସୁଯୋଗ ମିଳିଥାଏ।
ତଓ୍ବାଙ୍ଗ ମଠ
ଏହା ଏକ ବୌଦ୍ଧମଠ। ଏହି ମଠର ନିର୍ମାଣ କାର୍ଯ୍ୟ ମେରାକ ଲାମା ଲୋଡ୍ରେ ଗ୍ୟାଟ୍ସୋଙ୍କ ଦ୍ୱାରା ୧୬୮୦-୮୧ ମସିହାବେଳେ କରାଯାଇଥିଲା। ସ୍ଥାନୀୟ ଏକ ପାହାଡ ଉପରେ ସ୍ଥାପିତ ହୋଇଥିବା ଉକ୍ତ ମଠଟି ସମୁଦ୍ରପତ୍ତନଠାରୁ ପ୍ରାୟ ଦଶ ହଜାର ଫୁଟ ଉଚ୍ଚତାରେ ରହିଅଛି, ଯଦ୍ଦ୍ବାରା ଏହି ସ୍ଥାନରେ ଠିଆ ହେଲେ ପ୍ରକୃତିର ଅପରୂପ ସୌନ୍ଦର୍ଯ୍ୟକୁ ମନଭରି ଉପଭୋଗ କରିହୁଏ। ତା’ଛଡ଼ା ଆକାର ଦୃଷ୍ଟିକୋଣରୁ ବି ତଓ୍ବାଙ୍ଗ ମଠକୁ ଭାରତର ଅନ୍ୟତମ ବଡ଼ ମଠ ବୋଲି ମଧ୍ୟ କୁହାଯାଇଥାଏ, ଯେଉଁଠାରେ ଏକକାଳୀନ ସହସ୍ରାଧିକ ବୌଦ୍ଧ ସାଧୁ ରହିବାର ସୁବିଧା ଉପଲବ୍ଧ। ସେହିପରି ଏହି ମଠରେ ବୁଦ୍ଧଦେବଙ୍କର ଏକ ବିରାଟକାୟ ପ୍ରତିମୂର୍ତ୍ତି ବି ରହିଛି। ଅନ୍ୟପକ୍ଷେ ମଠ ନିକଟରେ ଏକ ଜଳଧାରା ମଧ୍ୟ ପ୍ରବାହିତ ହେଉଅଛି, ଯାହା ଦେଖିବାକୁ ଖୁବ୍ ସୁନ୍ଦର ହେବା ସହିତ ମଠରେ ଆବଶ୍ୟକ ହେଉଥିବା ଜଳାଭାବକୁ ବି ଦୂର କରି ଦେଇଥାଏ।
ଅନ୍ୟାନ୍ୟ ଦର୍ଶନୀୟ ସ୍ଥାନ
ପର୍ଯ୍ୟଟକ ଏଠାରେ ତଓ୍ବାଙ୍ଗ ମଠ ବ୍ୟତୀତ ଅନେକ ପାହାଡ, ଘାଟି, ପାହାଡି ଗାଁ, ଝରଣା ଆଦି ବି ଦେଖିପାରିବେ। ଏସବୁ ବ୍ୟତୀତ ତଓ୍ବାଙ୍ଗରେ ଇତିହାସ, ଧର୍ମ ତଥା ପୌରାଣିକ କଥାବସ୍ତୁର ଅନେକ ଉଦାହରଣ ଦେଖିବାକୁ ମିଳେ। ଫଳରେ ଏଠାକୁ ବୁଲି ଆସୁଥିବା ପର୍ଯ୍ୟଟକ ଅନେକ ନୂଆ ସ୍ଥାନ ଭ୍ରମଣ କରିବା ସହ ସ୍ଥାନୀୟ ଅଞ୍ଚଳର କଳା, ସଂସ୍କୃତି ସମ୍ପର୍କରେ ଅବଗତ ହୋଇପାରିବେ।
କେବେ ଯିବେ
ତଓ୍ବାଙ୍ଗ ଯିବା ପାଇଁ ବର୍ଷର ସବୁ ସମୟ ଠିକ୍ ଥିଲେ ହେଁ, ଖାସ୍ କରି ଶୀତଦିନେ ଏଠାକୁ ପର୍ଯ୍ୟଟକ ବୁଲିଯିବା ପାଇଁ ଅଧିକ ପସନ୍ଦ କରିଥାନ୍ତି। ଏହାର ମୁଖ୍ୟ କାରଣ ହେଉଛି ଶୀତଦିନେ ଏଠାକାର ସ୍ଥାନେ ସ୍ଥାନେ ତୁଷାରପାତ ହୋଇଥାଏ, ଯାହା ଦେଖିବାକୁ ବେଶ୍ ଆକର୍ଷଣୀୟ ଲାଗିଥାଏ। ତା’ଛଡ଼ା ତୁଷାରପାତ ହେଲେ ଏଠାରେ ସ୍କିଂ କରିବାକୁ ବି ସୁବିଧା ହୋଇଥାଏ।
କେମିତି ଯିବେ
ଏଠାକୁ ଯିବା ପାଇଁ ଗମନାଗମନର ବି ବେଶ୍ ଭଲ ବ୍ୟବସ୍ଥା ରହିଛି। ତେବେ ଗୌହାଟୀ ଏୟାରପୋର୍ଟ ଏବଂ ତେଜପୁର ଏୟାରପୋର୍ଟ ହେଉଛି ତଓ୍ବାଙ୍ଗର ଦୁଇ ନିକଟବର୍ତ୍ତୀ ପ୍ରମୁଖ ବିମାନବନ୍ଦର। ସେହିପରି ଏହାର ନିକଟବର୍ତ୍ତୀ ରେଳଷ୍ଟେଶନ ହେଉଛି ନାହାରଲାଗୁନ୍। ତା’ଛଡ଼ା ଦେଶର ବିଭିନ୍ନ ସ୍ଥାନରୁ ଏଠାକୁ ଟୁରିଷ୍ଟ ବସ୍ ବି ଯା’ଆସ କରିଥାଏ। ପର୍ଯ୍ୟଟକ ନିଜ ସୁବିଧାନୁସାରେ ଯେଉଁଥିରେ ଚାହିଁବେ ସେଥିରେ ଯାଇ ଆରାମରେ ତଓ୍ବାଙ୍ଗରେ ପହଞ୍ଚତ୍ପାରିବେ।
