ଅନୁଗୋଳ ଅଫିସ, ୨୨।୬ (ଅମିତ କୁମାର ସାମଲ) : କେମିତି ମପାଯାଏ ଦିନର ତାପମାତ୍ରା। କିପରି ଠିକ୍ ଆକଳନ କରାଯାଏ ଖରା, ବର୍ଷା ଓ ଶୀତର। ପାଣିପାଗ ବିଭାଗର ଏହି ନିତିଦିନିଆ କାର୍ଯ୍ୟ କେଉଁ ଉପାୟରେ ପରିଚାଳନା କରାଯାଏ ତାହା ଜାଣିବାକୁ ପିଲାଦିନରୁ ଭାରି ଇଚ୍ଛା ଥିଲା। ହେଲେ କେବେ ସୁଯୋଗ ପାଇ ନ ଥିଲେ ଅନୁଗୋଳ ନିବାସୀ ଭଗବାନ ପାଣି। ୨୦୦୭ରେ କିରାଣି ଚାକିରିରୁ ଅବସର ନେବା ପରେ ସେହି ଇଚ୍ଛା ପୂରଣ ହୋଇଛି ତାଙ୍କର। ପରିଣତ ବୟସରେ ଜିଲା ପାଣିପାଗ ବିଭାଗର ପର୍ଯ୍ୟବେକ୍ଷକ ଦାୟିତ୍ୱ ତୁଲାଉଥିବା ପାଣି ଏଇ ଦୀର୍ଘବର୍ଷ ମଧ୍ୟରେ କେବଳ ତାପମାତ୍ରା ବିଷୟରେ ଜାଣିନାହାନ୍ତି ବରଂ ରାଜ୍ୟବାସୀଙ୍କୁ ଅନୁଗୋଳର ପାଣିପାଗ ସମ୍ପର୍କରେ ଦୈନିକ ସୂଚନା ମଧ୍ୟ ଦେଇ ଆସିଛନ୍ତି।
ଭଗବାନ କହିଛନ୍ତି, ପାଣିପାଗ ନେଇ ଅନେକ ସମୟରେ କରାଯାଉଥିବା ଠିକ୍ ଅନୁମାନ ପିଲାବେଳେ ତାଙ୍କୁ ଆଶ୍ଚର୍ଯ୍ୟ କରିଦେଉଥିଲା। କେଉଁ କାରିଗରି ଜ୍ଞାନକୌଶଳ ବଳରେ ଏପରି ପୂର୍ବାନୁମାନ ଲଗାଯାଇପାରୁଛି ତାହା ଜାଣିବାକୁ ସେ ଆଗ୍ରହୀ ଥିଲେ। ୨୦୦୭ରେ ଜିଲା ମୁଖ୍ୟ କାର୍ଯ୍ୟାଳୟ କିରାଣି ପଦରୁ ଅବସର ନେବା ପରେ ଉକ୍ତ ଜ୍ଞାନକୌଶଳ ସମ୍ପର୍କରେ ଜାଣିବାର ସୁଯୋଗ ଜୁଟିଥିଲା। ଜିଲା କାର୍ଯ୍ୟାଳୟରେ ଥିବା ପାଣିପାଗ ବିଭାଗର ପର୍ଯ୍ୟବେକ୍ଷକ ଭାବେ ଦାୟିତ୍ୱ ଦିଆଯିବା ପରେ ସେ ଖୁସିହୋଇ ଯାଇଥିଲେ। ଏଥିପାଇଁ ୭ ଦିନିଆ ପ୍ରଶିକ୍ଷଣ ନେବାକୁ ତାଙ୍କୁ କୋଲକାତା ପଠାଯାଇଥିଲା। ଟ୍ରେନିଂ ଶେଷ କରି ଅନୁଗୋଳ ଅଫିସରେ ପହଞ୍ଚିବା ପରେ ପ୍ରଥମେ କିଛିଟା ସମସ୍ୟା ଅନୁଭବ କରିଥିଲେ। କିନ୍ତୁ ପରବର୍ତ୍ତୀ ଅବସ୍ଥାରେ ତାହା ଦୂର ହୋଇଯିବା ସହ ଖରା, ବର୍ଷା ସମ୍ପର୍କରେ ସେ ସୂଚନା ଦେଇପାରିଲେ। ଏବେ ଦୈନିକ ସକାଳ ସାଢ଼େ ଆଠଟା ଭିତରେ ତାଙ୍କୁ କାର୍ଯ୍ୟାଳୟରେ ପହଞ୍ଚି ଭୁବନେଶ୍ୱର ପାଣିପାଗ ବିଭାଗକୁ ରିପୋର୍ଟ ଦେବାକୁ ପଡ଼ୁଛି। ପାଗ ଯେତେ ପ୍ରତିକୂଳ ଥିଲେ ବି ସେ ଅଫିସ ଆସି ନିର୍ଦ୍ଧାରିତ ସମୟରେ ହିଁ ରିପୋର୍ଟ ପ୍ରଦାନ କରୁଛନ୍ତି। କିରାଣି ପଦବୀରୁ ଅବସର ପରେ ସେ କେବଳ ଜିଲାର ପାଣିପାଗ ସୂଚନା ଦେଉନାହାନ୍ତି, ସାଧାରଣ ନିର୍ବାଚନ ବେଳେ ମଧ୍ୟ ଅନ୍ୟ କାର୍ଯ୍ୟରେ ଯୋଗ ଦେଉଛନ୍ତି। ଅନୁଗୋଳ ଉପଜିଲାପାଳଙ୍କ ଅଧୀନରେ ଥିବା ନିର୍ବାଚନମଣ୍ଡଳୀରେ ଆଡଭାଇଜର କାର୍ଯ୍ୟ ତାଙ୍କୁ ପ୍ରଦାନ କରାଯାଉଛି। ପରିଣତ ବୟସରେ ଦୈନିକ ୮ ଘଣ୍ଟା ଖଟୁଥିଲେ ବି ପିଲାବେଳ ଇଚ୍ଛା ପୂରଣ ହୋଇପାରିଥିବାରୁ ଖୁସି ଥିବା ଭଗବାନ ପ୍ରକାଶ କରିଛନ୍ତି।
