ଭୁବନେଶ୍ୱର,୭।୨(ସ୍ପୋଟର୍ସ ବ୍ୟୁରୋ)- ଆଗକୁ ଖେଳାଯିବାକୁ ଥିବା ଅନ୍ତର୍ଜାତୀୟ ହକି ଫେଡେରେଶନ (ଏଫ୍ଆଇଏଚ୍) ପ୍ରୋ ଲିଗ୍ ମ୍ୟାଚ୍ ଅବସରରେ ଭୁବନେଶ୍ୱରରେ ପୁଣି ଥରେ ଟେକ୍ନିକାଲ ଅଫିସିଆଲ କୋର୍ସ ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି। ପୂର୍ବରୁ ୨୦୧୮ ଏଫ୍ଆଇଏଚ୍ ପୁରୁଷ ହକି ଓ୍ବଲର୍ଡ କପ୍ ଓ ଏଫ୍ଆଇଏଚ୍ ପୁରୁଷ ସିରିଜ ଫାଇନାଲ୍ସ ୨୦୧୯ ଅବସରରେ ମଧ୍ୟ ଏଫ୍ଆଇଏଚ୍ ଏକାଡେମୀ ହକି ଇଣ୍ଡିଆ ଲେଭଲ ୨ ଓ ଲେଭଲ ୩ କୋର୍ସ ସଫଳତାର ସହ ଆୟୋଜିତ ହୋଇଥିଲା।
ଏହି ଟେକ୍ନିକାଲ ଅଫିସିଆଲ କୋର୍ସ ପାଇଁ ଏଫ୍ଆଇଏଚ୍ ଏଡୁକେଟର୍ସ ବା ପ୍ରଶିକ୍ଷକ ଭାବେ ଏଡ୍ନା ରୁଟ୍ଟେନ (ନେଦରଲାଣ୍ଡ୍ସ, ଏଫ୍ଆଇଏଚ୍ ପ୍ରୋ ଲିଗ୍ ପ୍ୟାନେଲ) ଓ ରୋଜିଏର ଓ୍ବାରିସ୍ (ନେଦରଲାଣ୍ଡ୍ସ, ଏଫ୍ଆଇଏଚ୍ ଅଲିମ୍ପିକ୍ ପ୍ୟାନେଲ) ଦାୟିତ୍ୱରେ ରହିବେ। ରୁଟ୍ଟେନଙ୍କ ତତ୍ତ୍ୱାବଧାନରେ ଲେଭଲ -୨ କୋର୍ସ ଆସନ୍ତା ୭ ତାରିଖରୁ ଆରମ୍ଭ ହୋଇ ୯ ତାରିଖରେ ଶେଷ ହେବ। ସେହିପରି ଓ୍ବାରିସ୍ଙ୍କ ତତ୍ତ୍ୱାବଧାନରେ ଲେଭଲ- ୩ କୋର୍ସ ମଧ୍ୟ ଏହି ଦିନରେ ଆୟୋଜନ ହେବ। ଏହି କୋର୍ସରେ ୨୫ରୁ ଊର୍ଦ୍ଧ୍ୱ ପ୍ରାର୍ଥୀ ଭାଗ ନେବାର କାର୍ଯ୍ୟକ୍ରମ ରହିଛି।
ସେହିପରି ଏଫ୍ଆଇଏଚ୍ ଏକାଡେମୀ- ହକି ଇଣ୍ଡିଆ ଲେଭଲ ୨ ଅମ୍ପାୟର କୋର୍ସ, ଲିଭେଲ ୩ ଅମ୍ପାୟର କୋର୍ସ, ଗୋଲ କିପର କୋଚିଂ କୋର୍ସ ଲିଭେଲ ୧ ଆସନ୍ତା ୨୧ରୁ ୨୩ ତାରିଖ ମଧ୍ୟରେ ଆୟୋଜନ ହେବ। ଅମ୍ପାୟର ଓ କୋଚ୍ମାନଙ୍କ ବୈଷୟିକ ଜ୍ଞାନରେ ଉନ୍ନତି ଆଣିବା ପାଇଁ ଏଭଳି କୋର୍ସର ଆୟୋଜନ କରାଯାଇଛି ବୋଲି କୁହାଯାଇଛି। ରେଲଓ୍ବେର ଟେକ୍ନିକାଲ ଅଫିସିଆଲ ରେଣୁବାଳା ଓ ବିହାରର ରାବି ରୋଶନ ଲେଭଲ ୨ ଟେକ୍ନିକାଲ ଅଫିସିଆଲ କୋର୍ସର ନେଇ ବେଶ୍ ଉତ୍ସାହ ପ୍ରକଟ କରିଛନ୍ତି। ମଧ୍ୟପ୍ରଦେଶର ବନ୍ଦନା ରଘୁବଂଶୀ ଓ ଛତିଶଗଡ଼ର ସତିନ୍ଦର ଶର୍ମା ଏହି କୋର୍ସଗୁଡିକରେ ଅଂଶଗ୍ରହଣ କରି ଅଧିକ ଜ୍ଞାନ ଆରୋହଣ କରିବା ଲକ୍ଷ୍ୟରେ ରହିଛନ୍ତି । ଏ କୋର୍ସ ନେଇ ଏମାନେ ବେଶ୍ ଉତ୍ସାହ ପ୍ରକଟ କରିଛନ୍ତି ।
