ନୂଆଦିଲ୍ଲୀ, ୨୮।୭: ଅଗଷ୍ଟରୁ ପର୍ବପର୍ବାଣୀ ଋତୁ ଆରମ୍ଭ ହେବା ସହିତ ମହଙ୍ଗା ମଧ୍ୟ ଆପଣଙ୍କୁ ଅପେକ୍ଷା କରିଛି। ସକାଳର ଚା’ଠାରୁ ଆରମ୍ଭ କରି କାର୍ ପର୍ଯ୍ୟନ୍ତ ଅଗଷ୍ଟରେ ସମସ୍ତ ଜିନିଷର ଦର ବୃଦ୍ଧି ପାଇବାକୁ ଯାଉଛି। ବର୍ଷ ୨୦୨୬ରେ ଏହା କ୍ରମାଗତ ତୃତୀୟ ଥର ପାଇଁ ହେବାକୁ ଯାଉଛି, ଯେତେବେଳେ ଉପଭୋକ୍ତା ସାମଗ୍ରୀ (କନଜ୍ୟୁମର ଗୁଡ୍ସ) କମ୍ପାନୀଗୁଡ଼ିକ ଦର ବୃଦ୍ଧି କରିବାକୁ ପ୍ରସ୍ତୁତି ଚଳାଇଛନ୍ତି। ଏଥର ଦରରେ ୬ ରୁ ୮ ପ୍ରତିଶତ ବୃଦ୍ଧି ପାଇଥିବାର ଦେଖିବାକୁ ମିଳୁଛି।
ଅଗଷ୍ଟରୁ ଚା’, କେଶ ତେଲ, କାର୍, ଫ୍ରିଜ, ଟିଭି, ପୋଷାକ, ଇସ୍ପାତ (ଷ୍ଟିଲ) ବାସନ, କୁକର୍ ଇତ୍ୟାଦିର ଦର ବୃଦ୍ଧି ପାଇପାରେ। ଉତ୍ସବର ଋତୁ ପୂର୍ବରୁ ପୁଣିଥରେ ଦର ବୃଦ୍ଧି ଗ୍ରାହକଙ୍କ ପାଇଁ ଏକ ବଡ଼ ଝଟକା ହୋଇପାରେ। ରକ୍ଷାବନ୍ଧନ, ଦଶହରା, ଦିୱାଲୀ ଋତୁ ଆସିବା ପୂର୍ବରୁ କମ୍ପାନୀଗୁଡ଼ିକ ସେମାନଙ୍କର ଉତ୍ପାଦଗୁଡ଼ିକର ମୂଲ୍ୟ ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି।
ଜୁନ 2୨୦୨୬ରେ ଖୁଚୁରା ମହଙ୍ଗା ହାର (Retail Inflation Rate) ବୃଦ୍ଧି ପାଇ ୪.୩୮% ରେ ପହଞ୍ଚିଛି। ମେ’ ମାସରେ CPI ୩.୯୩% ଥିଲା। ଖାଦ୍ୟ ମହଙ୍ଗା ହାର ୫.୩୨% ପର୍ଯ୍ୟନ୍ତ ପହଞ୍ଚିଯାଇଛି। ମହଙ୍ଗା ସମ୍ପର୍କିତ ଏହି ପରିସଂଖ୍ୟାନଗୁଡ଼ିକ ଚିନ୍ତାଜନକ ଅଟେ ଏବଂ ଅଗଷ୍ଟ ମାସରେ ଗ୍ରାହକମାନଙ୍କୁ ଏକ ବଡ଼ ଝଟକା ଲାଗିବା ନିଶ୍ଚିତ। କମ୍ପାନୀଗୁଡ଼ିକର ଯୁକ୍ତି ରହିଛି ଯେ ଖାଡ଼ି ଯୁଦ୍ଧ (Gulf War) କାରଣରୁ କଞ୍ଚାମାଲର ମୂଲ୍ୟ ଏବଂ ସିପିଂ ଖର୍ଚ୍ଚ ବୃଦ୍ଧି ପାଇବା ଯୋଗୁ ସେମାନଙ୍କର ଖର୍ଚ୍ଚ ବଢ଼ିବାରେ ଲାଗିଛି। ଉତ୍ପାଦନ ଖର୍ଚ୍ଚ (Manufacturing Cost), ପରିବହନ ଖର୍ଚ୍ଚ (Transportation Cost) ଏବଂ କଞ୍ଚାମାଲ ଯୋଗାଣରେ ସୃଷ୍ଟି ହେଉଥିବା ବାଧାବିଘ୍ନ ଯୋଗୁ କମ୍ପାନୀଗୁଡ଼ିକ ଦର ବଢ଼ାଇବାକୁ ବାଧ୍ୟ ହେଉଛନ୍ତି। ଫେବୃଆରୀ 2026ରେ ଇରାନ ଯୁଦ୍ଧ ଆରମ୍ଭ ହେବା ପରଠାରୁ ଅଟୋମୋବାଇଲ କମ୍ପାନୀ ମାରୁତି ସୁଜୁକି (Maruti Suzuki) ଦ୍ୱିତୀୟ ଥର ପାଇଁ ସେମାନଙ୍କ ଗାଡ଼ିର ଦର ବୃଦ୍ଧି କରିଛି।
