ଅନୁଗୋଳ ଅଫିସ,୨୮।୬ – ଅନୁଗୋଳ ନିର୍ବାଚନମଣ୍ଡଳୀରୁ ଲଗାତାର ୪ ଥର ବିଧାନସଭାକୁ ନିର୍ବାଚିତ ହୋଇଥିବା ବିଧାୟକ ରଜନୀକାନ୍ତ ସିଂ ମନ୍ତ୍ରୀ ପଦ ପାଇଁ ଏଥର ଦୃଢ଼ ଦାବିଦାର ଥିଲେ। ନବୀନ ସରକାରଙ୍କ ମନ୍ତ୍ରିମଣ୍ଡଳରେ ସେ ପୂର୍ବରୁ ଗୁରୁତ୍ୱପୂର୍ଣ୍ଣ ପଦବୀରେ ରହିସାରିଥିବାରୁ ଏଥର ମଧ୍ୟ ତାଙ୍କୁ ଅଭିଜ୍ଞତା ଭିତ୍ତିରେ ମନ୍ତ୍ରୀପଦ ମିଳିବ ବୋଲି ତାଙ୍କ ନିର୍ବାଚନମଣ୍ଡଳୀବାସୀ ଆଶା ରଖିଥିଲେ। କିନ୍ତୁ ନୂଆ ମନ୍ତ୍ରିମଣ୍ଡଳ ଗଠନ ବେଳେ ରଜନୀକାନ୍ତଙ୍କୁ ସେଥିରେ ସାମିଲ କରାଯାଇ ନ ଥିଲା। ଏହା ତାଙ୍କ ସମର୍ଥକ ଓ ନିର୍ବାଚନମଣ୍ଡଳୀର ଲୋକଙ୍କୁ ନିରାଶ କରିଥିଲା। ହେଲେ ବିଧାନସଭାର ଉପବାଚସ୍ପତି ଭାବେ ଗୁରୁବାର ରଜନୀକାନ୍ତ ନିର୍ବାଚିତ ହୋଇଥିବାରୁ ଅନୁଗୋଳବାସୀ ଖୁସି ପ୍ରକଟ କରିଛନ୍ତି। ମନ୍ତ୍ରୀ ନ ହେଲେ ବି ମର୍ଯ୍ୟାଦାଜନକ ପଦବୀ ମିଳିଥିବାରୁ ରଜନୀକାନ୍ତ ବିଧାନସଭାର ପରମ୍ପରା ରକ୍ଷା କରି ଗରିମା ବଢ଼ାନ୍ତୁ ବୋଲି ସେମାନେ ମତପ୍ରକାଶ କରିଛନ୍ତି। ଏଥିସହ ଅନୁଗୋଳ ନିର୍ବାଚନମଣ୍ଡଳୀରେ ଅଧୁରା ରହିଯାଇଥିବା ବହୁ ଉନ୍ନୟନ କାର୍ଯ୍ୟକୁ ସମ୍ପୂର୍ଣ୍ଣ କରିବା ଦିଗରେ ବିଧାୟକ ରଜନୀକାନ୍ତ ତାଙ୍କ ଦାୟିତ୍ୱ ତୁଲାନ୍ତୁ ବୋଲି ଲୋକେ ଦାବି କରିଛନ୍ତି।
(ଅମିତ୍ ସାମଲ)
