ଭବାନୀପାଟଣା,୧୦।୬ (ଡି.ଏନ.ଏ.): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅଧୀନ ମାଳିଗାଁ ପଁଚେତ୍ର ଭିତରପଦର ଗଁାର ସ୍ବର୍ଗତ ଗଙ୍ଗା ମାଝୀକଁର ବିଧବା ମାଏକିନା ବୁଦାଏ ବଓ୍ବୋ। ଆପନେର ମୁର୍ତୁ ଉତାରୁ ସେ ନିସାହା ହେଇଯାଇଛନ୍। ଏହେଦେ ସେ ୫ ନାବାଲକ ଛୁଆପିଲାକୁ ନେଇ ଜିଁଇବା ଖାଏବା ସମସିଆ ସଂଗେ ଯୁଝୁଛନ୍। ହେଲେ ଇ ଦୁଖି ପରିବାର ସବୁପରକାର ସରକାରୀ ଯୋଜନାରୁ ବଁଚିତ୍ ହେଇଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ଗଲା ୩ ବଛର୍ ତଲେ କେହେନ୍ସି କାରନ୍ରୁ ଗଙ୍ଗା ମାଝୀକଁର ମୁର୍ତୁ ହେଇଯାଇଥିଲା। ଆପନେ ଆରପାରକେ ଚାଲିଗଲା ଉତାରୁ ୫ ନାବାଲକ୍ ଛୁଆକର ବୋଝ୍ ବୁଦାଏକଁର ଉପରେ ପଡ଼ିଥିଲା। ଇଆଡ଼େ ପରିବାରଟା ନିହାତି ଗରିବ୍ ହେଇଥିଲାବେଲେ ସଁପତି କହେଲେ ଘରଡିହ ଖଁଡ଼େ। ଫିଦିନ୍ ସଖାଲ ପାଏଲେ ପରହର କାମ୍ବୁତା କଲେଯାଇ ଘରର ଚୁଲି ଜଲୁଛେ। ଇଆଡ଼େ ସରକାରୀ ଯୋଜନା ହିସାବେ ଘରର କମାନିଆଁ ଲୋକ୍ର ମୁର୍ତୁ ହେଲେ କେନ୍ଦ୍ର ସରକାରକଁର ଜାତୀୟ ପରିବାର ମଙ୍ଗଳ ଯୋଜନାରୁ ୨୦ ହଜାର ଟଁକା ସାହାଯ୍ ଦେବାର ନିୟମ ରହିଛେ। ହେଲେ ଦୁଖର କଥା ବୁଦାଏକଁର ଲେଖେଁ ଝନେ ହକ୍ଦାର ହିତାଧିକାରୀ ଇ ଯୋଜନାର ଲାଭ ପାଏବାରୁ ବଁଚିତ୍ ହେଇ ରହିଛନ୍। ସେନ୍ତା ସରକାରୀ ଯୋଜନାର ଲାଭ ପାଏବାର ଲାଗି ଗଲା ୩ ବଛର ହେଲା ସେ ଭିନେ ଭିନେ ଅଫିସ କିଁଦ୍ରୁଛନ୍। ହେଲେ କେହି ତାକର ଦୁଖ ନାଇଁ ବୁଝ୍ବାର କି ଗୁହାରି ନାଇଁ ଶୁନୁଥବାର ସେ ଅଭିଯୋଗ କରିଛନ୍। ରାଏଜ୍ ସରକାରକଁର ‘ପିଠା’ କାଯ୍କରମରେ ତାହାକୁ ଭତା ଦିଆଯିବା ବଲି ପରତିଶୁରତି ମିଲିଥିଲା। ହେଲେ ପରତିଶୁରତି ତାରବାଟେ ରହିଗଲା। ଇ ବାବ୍ଦେ ଥୁ.ରାମପୁର ବ୍ଲକର ସାମାଜିକ ସୁରକ୍ଷା ଅଧ୍କାରୀ ଜୟନ୍ତ କୁମାର ପ୍ରହରାଜକୁଁ ପଚରାଲାରୁ ନିରବାଚନ୍ ଆଚରନ୍ବିଧିର ଲାଗି ସବୁ ବଁଦ୍ ଥିଲା। ଏହେଦେ ଆଚରନ୍ବିଧି ଉଠ୍ଲାନ, ଯେତେ ଜଲଦି ହେବା ତାହାକୁ ଭତା ଯୁଗେଇ ଦେବାର ବେବସ୍ତା କରାଯିବା ବଲି ସେ କହିଥିଲେ। ହେଲେ ନିରବାଚନ୍ ଆଚରନ୍ବିଧି ଉଠ୍ବାର ପାଖାପାଖି ମାସେ ହେଇଯାଇଥିଲେ ବି ନିସାହା ବୁଦାଏ ବଓ୍ବୋକଁର ଉପରେ କହାରି ନଜର ନାଇଁ ପଡ଼ବାରଟା ନିହାତି ଦୁଖର କଥା ଆଏ। ଯେତେ ଜଲଦି ହେବା ଇ ନିସାହା ବିଧବା ମହିଲାକୁଁ ସବୁପରକାର ସରକାରୀ ସାହାଯ୍ ଯୁଗେଇ ଦେବାକେ ବୁଧିଜୀବୀ ମହଲରେ ଦାବି ହେଉଛେ।
