ରୂପ୍ସା,୨୫।୮(ଡି.ଏନ.ଏ.)-ଦକ୍ଷିଣ-ପୂର୍ବ ରେଳପଥର ଖଡ଼ଗପୁର ଡିଭିଜନ ଅନ୍ତର୍ଗତ ରୂପ୍ସା-ବାଙ୍ଗିରିପୋଷି ରେଳଲାଇନର ଭଗବାନପୁର ଗାଁ ଛକରୁ ବାମଡ଼ା ଲେଭଲ୍ କ୍ରସିଂ ପର୍ଯ୍ୟନ୍ତ ନୂତନ ଲିଙ୍କରୋଡ଼ ନିର୍ମାଣ ହେଉ ନ ଥିବାରୁ ଜନ ଅସନ୍ତୋଷ ଦେଖାଦେଇଛି। ୧୦ରୁ ଊର୍ଦ୍ଧ୍ୱ ଗ୍ରାମବାସୀଙ୍କ ପାଇଁ ଏହି ରେଳବାଇ ରାସ୍ତା ବାଧକ ସାଜିଥିବାରୁ ଯାତାୟାତରେ ସମସ୍ୟା ଲାଗି ରହିଛି। ବର୍ଷା ଦିନେ କାଦୁଅ ପଚପଚ ଖାଲଖମା ରାସ୍ତା ଯୋଗୁ ଗାଁ ଭିତରକୁ ଆମ୍ବୁଲାନ୍ସ, ଦମକଳ ଆଦି ଜରୁରୀ ପରିସ୍ଥିତିରେ ପ୍ରବେଶ କରିପାରୁ ନ ଥିବା ଅଭିଯୋଗ ହୋଇଛି। ତୁରନ୍ତ ଏହି ଲିଙ୍କରୋଡ଼ ନିର୍ମାଣ କରାଯିବା ପାଇଁ ଭଗବାନପୁର ବିକାଶ ପରିଷଦର ସଭାପତି ଭଗବାନ ମହପାତ୍ର, ଉପଦେଷ୍ଟା ସୁଧାକର ଗିରି, ସଂଯୋଜକ ଚକ୍ରଧର ଆଚାର୍ଯ୍ୟ, ସମ୍ପାଦକ ସୁଦର୍ଶନ ମହାପାତ୍ରଙ୍କ ସମେତ ବହୁ କର୍ମକର୍ତ୍ତା କେନ୍ଦ୍ରମନ୍ତ୍ରୀ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କୁ ଭେଟି ଲିଖିତ ଭାବେ ଦାବିପତ୍ର ପ୍ରଦାନ କରିଛନ୍ତି। ଏଥିସହ ବିଭାଗୀୟ ପଦକ୍ଷେପ ଗ୍ରହଣ ନିମନ୍ତେ ବଡ଼ସାହି ବିଧାୟକ ସନାତନ ବିଜୁଳି, ସଦର ବିଧାୟକ ମଦନମୋହନ ଦତ୍ତ, ମୟୂରଭଞ୍ଜ ଜିଲାପାଳ, ଡିଭିଜନାଲ ରେଳବାଇ ମ୍ୟାନେଜର, ଡିଭିଜନାଲ ଇଞ୍ଜିନିୟର, ଆସିଷ୍ଟାଣ୍ଟ ମ୍ୟାନେଜର, ରୂପ୍ସା ଷ୍ଟେସନ ମ୍ୟାନେଜର ପ୍ରମୁଖଙ୍କୁ ମଧ୍ୟ ଲିଖିତ ଅବଗତ କରାଯାଇଛି।
ଭଗବାନପୁରଠାରେ ରେଳ ଲେଭଲକ୍ରସିଂ ଫାଟକ ନ ଥିବାରୁ ଆମ୍ବଗଡ଼ିଆ ପଞ୍ଚାୟତ ଅନ୍ତର୍ଗତ ଭଗବାନପୁର, ଟିକିରାସାହି, ଅଙ୍ଗାରଗଡ଼ିଆ, ଗୁଆବଣିଆ, ଚୋରମରା, ଗୋପାଳସାହି ଆଦି ୧୦ରୁ ଉର୍ଦ୍ଧ୍ୱ ଗ୍ରାମର ବାସିନ୍ଦା ହଇରାଣ ହରକତ ହେଉଛନ୍ତି। ରେଳ ଲାଇନ୍ ସଂଲଗ୍ନ ଉତ୍ତରପାର୍ଶ୍ୱରେ ଭଗବାନପୁର-ବାମଡ଼ା ନୂତନ ଲିଙ୍କ ରୋଡ଼ ନିର୍ମାଣ ହେଉ ନ ଥିବାରୁ ମହିଳା, ପୁରୁଷଙ୍କ ସମେତ ଛାତ୍ରୀଛାତ୍ର, ରୋଗୀ, ପ୍ରସୂତି ଓ ବରିଷ୍ଠ ନାଗରିକଙ୍କ ପାଇଁ ଦୈନନ୍ଦିନ ଜୀବନରେ ଗମନାଗମନ ବାଧକ ସାଜିଛି। ଲିଙ୍କ ରୋଡ଼ ନିର୍ମାଣ ଦାବିରେ ଗତ ଫେବୃୟାରୀ ୨୭ତାରିଖରେ ବିକାଶ ପରିଷଦ ତରଫରୁ ପଞ୍ଚାୟତବାସୀ ଏଠାରେ ରେଳରୋକୋ ଆନ୍ଦୋଳନ କରିଥିଲେ। ବିଭାଗୀୟ ଅଧିକାରୀ ପହଞ୍ଚତ୍ ବୁଝାଶୁଝା କରିଥିଲେ। ଡିଆରଏମ୍ଙ୍କ ସହ ମୋବାଇଲରେ କଥା ହୋଇ ୧୫ଦିନ ମଧ୍ୟରେ ବାରିପଦା ଉପଜିଲାପାଳଙ୍କ ଚାମ୍ବରରେ ତ୍ରିପାକ୍ଷିକ ଆଲୋଚନା ପରେ ସମସ୍ୟାର ସମାଧାନ ଦିଗରେ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଥିଲେ। ହେଲେ ୬ମାସ ବିତିଯାଇଥିଲେ ମଧ୍ୟ ଏଯାବତ ରେଳ ମନ୍ତ୍ରଣାଳୟ ପକ୍ଷରୁ ଲିଙ୍କ୍ରୋଡ଼ ନିର୍ମାଣ ଦିଗରେ କୌଣସି ପଦକ୍ଷେପ ନିଆଯାଇନାହଁି। କେନ୍ଦ୍ରମନ୍ତ୍ରୀ ଷଡ଼ଙ୍ଗୀ କେନ୍ଦ୍ର ରେଳମନ୍ତ୍ରୀଙ୍କ ସହ ଜନସାଧାରଣଙ୍କ ସମସ୍ୟାର ସମାଧାନ ଦିଗରେ ଆଲୋଚନା କରିବେ ବୋଲି କହିଛନ୍ତି।
