ନୂଆଦିଲ୍ଲୀ,୧୧।୨: ଦିଲ୍ଲୀ ବିଧାନସଭା ନିର୍ବାଚନର ଭୋଟ ଗଣତି ମଙ୍ଗଳବାର ଆରମ୍ଭ ହୋଇଛି। କାହା ମୁଣ୍ଡରେ ହାତୀ ସୁନା କଳସ ଢ଼ାଳିବ ଏବଂ କିଏ ଶାସନ କ୍ଷମତା ହାତେଇବ ସେନେଇ ଏବେ କଳ୍ପନାଜଳ୍ପନା ଲାଗି ରହିଛି। ଇତିମଧ୍ୟରେ ଭାଜପାର ଦିଲ୍ଲୀ ପ୍ରଦେଶ କାର୍ଯ୍ୟାଳୟରେ ଲାଗିଥିବା ଏକ ପୋଷ୍ଟର ଏବେ ଚର୍ଚ୍ଚାର ପରିସରକୁ ଆସିଛି। ଏହି ପୋଷ୍ଟର ସାମ୍ନାକୁ ଆସିବା ପରେ ଅନୁମାନ କରାଯାଉଛି ଯେ, ଭାଜପା ଭୋଟ ଗଣତି ପୂର୍ବରୁ ନିଜର ବିଫଳତା ସ୍ବୀକାର କରିନେଇଛି। ସୂଚନା ମୁତାବକ ଦିଲ୍ଲୀ କାର୍ଯ୍ୟାଳୟରେ ଲାଗିଥିବା ଏହି ପୋଷ୍ଟରରେ ସ୍ବରାଷ୍ଟ୍ରମନ୍ତ୍ରୀ ଅମିତ ଶାହାଙ୍କ ଫଟୋ ଲାଗିଛି। ଆଉ ଏଥିରେ ଲେଖାହୋଇଛି, ଆମେ ବିଜୟରେ ଅଂହକାରୀ ହୋଇ ନ ଥିବା ବେଳେ ପରାଜୟରେ ମଧ୍ୟ ନିରାଶ ହୋଇ ନ ଥାଉ। ପୂର୍ବରୁ ଭାଜପା ନେତା ଦିଲ୍ଲୀ ନିର୍ବାଚନରେ ବହୁମତରେ ବିଜୟ ହାସଲ କରିବୁ ବୋଲି ଦାବି କରୁଥିବା ବେଳେ ଏହି ପୋଷ୍ଟର ଏବେ ଅଲଗା ମୋଡ ନେଇଛି।
