ଦାରିଙ୍ଗବାଡ଼ି,୧୯।୬(ଡି.ଏନ.ଏ.)- ଦାରିଙ୍ଗବାଡ଼ି ବ୍ଲକ ପର୍ତ୍ତମାହା ପଞ୍ଚାୟତ ସୁଜାମାଜୁ ଉନ୍ନୀତ ଉଚ୍ଚ ବିଦ୍ୟାଳୟ ଭାରପ୍ରାପ୍ତ ପ୍ରଧାନ ଶିକ୍ଷକ ସମୀର କୁମାର ପ୍ରଧାନ ବିଇଓଙ୍କ ନିର୍ଦ୍ଦେଶକୁ ଅବମାନନା କରିବା ଅଭିଯୋଗରେ ବୁଧବାର ସସ୍ପେଣ୍ଡ ହୋଇଛନ୍ତି। ବିଦ୍ୟାଳୟର ଦାୟିତ୍ୱ ହସ୍ତାନ୍ତର ନ କରିବା ସହ ମାଟ୍ରିକ୍ ସପ୍ଲିମେଣ୍ଟାରି ପରୀକ୍ଷାର୍ଥୀଙ୍କ ଫର୍ମ ପୂରଣ ପାଇଁ ରହିଥିବା ବିଦ୍ୟାଳୟ ଆଇଡି ଏବଂ ପାସ୍ୱାର୍ଡ ପ୍ରଦାନରେ ଅବହେଳା ଯୋଗୁ ଏଭଳି ପଦକ୍ଷେପ ନିଆଯାଇଥିବା ଦାରିଙ୍ଗବାଡ଼ି ବିଇଓ ବ୍ରହ୍ମାନନ୍ଦ ରାଉତ ସୂଚନା ଦେଇଛନ୍ତି। ସେ କହିଛନ୍ତି ଯେ, ୨୦୧୮ରେ ବିଦ୍ୟାଳୟରେ ରହିଥିବା ୧ଶହ ଶଯ୍ୟା ବିଶିଷ୍ଟ ଛାତ୍ରୀନିବାସ ଦାୟିତ୍ୱ ବିଦ୍ୟାଳୟର ଜଣେ ଶିକ୍ଷୟିତ୍ରୀଙ୍କୁ ହସ୍ତାନ୍ତର କରିବାରେ ଅବହେଳା ସହ ମଧ୍ୟାହ୍ନଭୋଜନର ହିସାବ ସହ ବିଭିନ୍ନ ରେକର୍ଡ଼ର ହିସାବ ଦେଇପାରିନଥିଲେ। ତତ୍କାଳ ବିଇଓ ପୁରେନ୍ଦ୍ର ବେହେରା ଏନେଇ ତାଙ୍କୁ କାରଣ ଦର୍ଶାଅ ନୋଟିସ କରିଥିଲେ। ୨ଥର ନୋଟିସ ସହ ଡ୍ରାଫ୍ଟଚାର୍ଜ କରିଥିଲେ ମଧ୍ୟ ପ୍ରଧାନ ଶିକ୍ଷକ ଦାୟିତ୍ୱରେ ରହିଥିବା ସମୀର ବିଇଓଙ୍କୁ ଉତ୍ତର ଦେଇନଥିଲେ। ଏବେକାର ବିଇଓ ବ୍ରହ୍ମାନନ୍ଦ ରାଉତ ସମ୍ପୃକ୍ତ ଶିକ୍ଷକଙ୍କ ବିରୋଧରେ କାରଣ ଦର୍ଶାଅ ନୋଟିସ ସହ ଡ୍ରାଫ୍ଟଚାର୍ଜ କରିଥିଲେ। ହେଲେ ସେ ଏଥିରେ କୌଣସି ଉତ୍ତର ରଖିନଥିଲେ। ଏହାର ସମାଧାନ ପାଇଁ ବିଇଓ ଶିକ୍ଷକ କଲ୍ୟାଣ ସଂଘର କର୍ମକର୍ତ୍ତାଙ୍କ ସହଯୋଗ ଲୋଡ଼ିଥିଲେ, ମାତ୍ର ସୁଫଳ ମିଳି ନ ଥିଲା। ଫଳରେ କନ୍ଧମାଳ ଜିଲା ଶିକ୍ଷା ଅଧିକାରୀ ବିକାଶ ପ୍ରଧାନଙ୍କ ନିର୍ଦ୍ଦେଶକ୍ରମେ ସସ୍ପେଣ୍ଡ କରାଯାଇଥିବା ବିଇଓ ରାଉତ କହିଛନ୍ତି। ଅନ୍ୟପକ୍ଷରେ ଗତ ୫ ବର୍ଷ ପୂର୍ବରୁ ସେଠାରେ ପ୍ରଧାନ ଶିକ୍ଷକ ଦାୟୀତ୍ୱରେ ରହିଥିବା ଉତ୍କଳ କେଶରୀ ବିବାର ସିଆରସିସି ହୋଇ ୫ବର୍ଷ କାମ କରି ତାଙ୍କ କାର୍ଯ୍ୟକାଳ ଶେଷ ହେବା ପରେ ସେ ପୁଣି ସୁଜାମାଜୁ ଉନ୍ନୀତ ଉଚ୍ଚ ବିଦ୍ୟାଳୟକୁ ଶିକ୍ଷକ ଭାବେ ଫେରିଲେ। ହେଲେ ଦାୟିତ୍ୱରେ ରହିଥିବା ସମୀର ତାଙ୍କୁ ଦାୟିତ୍ୱ ପ୍ରଦାନରେ ବିଳମ୍ବ କରିଥିଲେ ବୋଲି ଅଭିଯୋଗ ହୋଇଥିଲା।
