ରାଞ୍ଚି: କରୋନା ଭାଇରସ୍ ସଂକ୍ରମଣ ରୋକିବାକୁ ସାରା ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଏଥିପାଇଁ ଲଢ଼େଇ କରିବାକୁ ହେଲେ ମାସ୍କ ପିନ୍ଧିବା ନିହାତି ଆବଶ୍ୟକ। ମାସ୍କ ପିନ୍ଧିବା ହେଉଛି ସୁରକ୍ଷା କବଚ। ସେଥିଲାଗି ପିଲାଠୁ ଆରମ୍ଭ କରି ବୁଢ଼ା ପର୍ଯ୍ୟନ୍ତ ସମସ୍ତେ ମାସ୍କ ବ୍ୟବହାର କରୁଛନ୍ତି। କିନ୍ତୁ ସବୁଠୁ ଅଲଗା ହେଉଛି ଝାଡ଼ଖଣ୍ଡ ଦେବଘର ଅଞ୍ଚଳରେ ରହୁଥିବା ଆଦିବାସୀ ମହିଳମାାନେ। ଏହି ମହିଳାମାନେ କ୍ଲିନିକାଲ ମାସ୍କ ତିଆରିର ଏକ ନୂଆ ବିକଳ୍ପ ପ୍ରସ୍ତୁତ କରିଛନ୍ତି। ସେମାନେ ନିମପତ୍ରରେ ମାସ୍କ ତିଆରି କରି ମୁହଁରେ ପିନ୍ଧୁଛନ୍ତି। ସେମାନଙ୍କ କହିବା ଅନୁଯାୟୀ, ନିମପତ୍ରରେ ବହୁ ଔଷଧୀୟ ଗୁଣ ରହିଛି। ତେଣୁ କରୋନା ସଂକ୍ରମଣରୁ ରକ୍ଷା ପାଇବା ପାଇଁ ନିମପତ୍ରରେ ତିଆରି ମାସ୍କ ବହୁତ ଉପକାରୀ। ଏବେ ଫସଲ ଅମଳ ସମୟ। କ୍ଷେତକୁ ତ ଯିବାକୁ ପଡ଼ିବ। ଗରିବ ହୋଇଥିବାରୁ ସବୁବେଳେ ବ୍ୟୟବହୁଳ ସହରୀ ମାସ୍କ ତ ପିନ୍ଧିପାରିବୁ ନାହିଁ। ସେଥିଲାଗି ଏହାକୁ ଆପଣେଇଛୁ ବୋଲି ଜଣେ ମହିଳା କହିଛନ୍ତି। ମହିଳାମାନେ ନିଜ ହାତରେ ପୁରୁଷମାନଙ୍କ ପାଇଁ ମଧ୍ୟ ନିମପତ୍ରରେ ମାସ୍କ ତିଆରି କରିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ ଯେ, ମାସ୍କ ନ ଥିଲେ ଗାମୁଛା କିମ୍ବା ରୁମାଲ ବ୍ୟବହାର କରିପାରିବେ। କିନ୍ତୁ ନିମରେ ବହୁ ଔଷଧୀୟ ଗୁଣ ଥିବାରୁ ଏଥିରେ ପ୍ରସ୍ତୁତ ମାସ୍କ କରୋନା ଭୂତାଣୁ ସହ ଲଢ଼େଇ କରିପାରିବ। ଏହା ସ୍ବାସ୍ଥ୍ୟପକ୍ଷେ ବେଶ୍ ହିତକର ବୋଲି ଆଦିବାସୀ ମହିଳାମାନେ କହିଛନ୍ତି।
